الەمدەگى ەڭ ۇلكەن كەمەنىڭ ساياحاتقا شىعۋى ەكولوگتاردى الاڭداتىپ وتىر

الەمدەگى ەڭ ۇلكەن كرۋيزدىك كەمە Icon of the Seas ءوزىنىڭ العاشقى جەتى كۇندىك كاريب تەڭىزى ساياحاتىنا اتتاندى. 

كەمەنىڭ ۇزىندىعى – 365 م، بۇل الەم بويىنشا رەكوردتىق كورسەتكىش. سالىستىرۋ ءۇشىن، اتى اڭىزعا اينالعان تيتانيك 100 مەترگە دەرلىك قىسقا (269 م)، ال اقش اسكەري-تەڭىز كۇشتەرىنىڭ ەڭ ءىرى ۇشاق تاسىعىش كەمەسى دجەرالد ر.فوردتىڭ ۇزىندىعى 333 مەتر.

7600 جولاۋشىنى قابىلداي الاتىن كەمەدە 40-تان استام مەيرامحانا مەن كافەلەر بار. سونداي-اق كەمەدە تروپيكالىق وسىمدىكتەر وسەتىن شاعىن ساياباق، تەاتر، كاراوكە، تەننيس جانە ۆولەيبول الاڭدارى، بالالارعا ارنالعان اتتراكسيوندار مەن اكۆاپارك بار.

فينليانديا جاسالعان الىپ كەمەنىڭ قۇرىلىسىنا 2 ميلليارد دوللار جۇمسالعان. كەمەنىڭ قوزعالتقىشتار سۇيىتىلعان تابيعي گازبەن (LNG) جۇمىس ىستەيدى.

ەكولوگتار كەمەدە وتىننىڭ بۇل ءتۇرىن پايدالانۋ اتموسفەراعا مەتاننىڭ تارالۋىنا اكەلەتىنىن ايتىپ، سىنعا الدى.

ەكولوگتاردىڭ ايتۋىنشا، قازىرگى سۇيىتىلعان تابيعي گازدىڭ 85-95% مەتاننان تۇرادى. سوندىقتان سۇيىتىلعان تابيعي گازدى پايدالانعان كەزدە مەتاننىڭ اتموسفەراعا اعىپ كەتۋ ىقتيمالدىعى ارتادى، ال مەتان كومىرقىشقىل گازىنا قاراعاندا الدەقايدا قاۋىپتىرەك.

«بۇل دۇرىس ەمەس. ءبىزدىڭ ەسەبىمىزشە، سۇيىتىلعان تابيعي گازدى تەڭىز وتىنى رەتىندە پايدالانۋ كەمەنىڭ قىزمەت ەتۋ مەرزىمى ىشىندە اتموسفەراعا پارنيكتىك گازداردىڭ كادىمگى تەڭىز گازويلىمەن جۇمىس ىستەيتىنىنە قاراعاندا 120%-عا كوپ تۇسۋىنە اكەلەدى»، – دەدى تازا كولىك جونىندەگى حالىقارالىق كەڭەستىڭ (ICCT) تەڭىز باعدارلاماسىنىڭ ديرەكتورى برايان كومەر.

الايدا كەمە يەلەرى Royal Caribbean كومپانياسى Icon of the Seas كەمەسىنىڭ زاماناۋي تەڭىز كولىگى ەرەجەلەرى تالاپ ەتكەننەن 24 پايىزعا كوبىرەك ەنەرگيا ۇنەمدەيتىنىن مالىمدەدى. سونداي-اق كومپانيا 2035 جىلعا قاراي نولدىك شىعارىندىلارى بار كەمە ۇسىنۋدى جوسپارلاپ وتىر.