مەملەكەت باسشىسى قاسىم-جومارت توقايەۆ «ەگەمەن قازاقستان» گازەتىنە بەرگەن سۇحباتىندا الەۋمەتتىك جانە ساياسي ماسەلەلەرگە توقتالىپ، ەلدەگى قاراپايىم حالىقتىڭ جاي-كۇيى مەن حال-احۋالى جايلى كەڭىنەن وي ءبولىستى. سونداي-اق، ءبىلىم، عىلىم، جاستاردىڭ جۇمىسقا قابىلەتتىلىگىن ارتتىرۋ دا پرەزيدەنتىمىزدىڭ نازارىنان تىس قالعان جوق.
2023 جىلى اتقارىلعان جۇمىستاردىڭ اراسىنان ەلىمىزدىڭ تۇكپىر-تۇكپىرىنەن اشىلا باستاعان ءبىلىم وشاقتارى، ونىڭ ىشىندە «جايلى مەكتەپتەر» تۋرالى دا ايرىقشا اتاپ ءوتتى. مەديسينا قىزمەتكەرلەرىنىڭ، مەكتەپتە، كوللەدجدە جانە بالاباقشادا جۇمىس ىستەيتىن پەداگوگتەردىڭ جالاقىسىنىڭ ءوسۋى، ۇلتتىق قوردان بالالارعا قارجى بەرۋ ماسەلەلەرى دە 2024 جىلى ارى قاراي ءوز جالعاسىن تاباتىنىن ايتتى.
بيىلعى جىلى عىلىم سالاسىندا ايگىلى عالىم قانىش ساتبايەۆتىڭ 125 جىلدىعى تويلانباق. عىلىم سالاسىنا ولشەۋسىز ۇلەس قوسقان عالىمنىڭ مەرەيتويىنىڭ اياسىندا عىلىمعا بار ءومىرىن ارناپ، ايانباي ەڭبەك ەتىپ جۇرگەن جاندار ءۇشىن پايدالى ءىس-شارالار وتكىزىلەدى دەپ سەنەمىز.
سونداي-اق، مەملەكەت باسشىسى دارىندى جاستاردى قولداۋ ماسەلەسىنە قاتىستى پىكىرىن ءبىلدىردى. وتكەن جىلى پرەزيدەنتتىك جاستار كادر رەزەرۆى جاساقتالعان بولاتىن. ىرىكتەۋدەن وتكەن كاسىبي جاس ماماندار قازىرگى تاڭدا مەملەكەتتىك باسشىلىق لاۋازىمداعى جۇمىستارىن باستاپ كەتكەندىگىن ايتتى. الەمنىڭ كۇن سايىن وزگەرىپ جاتقاندىعىن، جاڭا تەحنولوگيالار مەن ماماندىقتار، سالالار پايدا بولعانىن، وسى ورايدا وزگەشە ويلايتىن، تىڭ يدەيالارى بار جاس مامانداردىڭ اتقاراتىن ءرولى زور ەكەندىگىن جەتكىزدى. قازاق جاستارىنا سەنەتىنىن، ەلىمىزدىڭ ەكونوميكاسى دامىعان، دەموكراتيالى ەلدەردىڭ قاتارىنان كورىنۋى ءۇشىن اعا بۋىننىڭ تاجىريبەسى مەن جاس ۇرپاقتىڭ وزگەشە سىني كوزقاراسىنىڭ توعىسۋى قاجەتتىلىگىن ايقىندادى.
پرەزيدەنتىمىز وسىعان دەيىنگى ايتقان سوزدەرىندە قازىرگى تاڭدا نارىقتا تەحنيكالىق ماماندىق يەلەرىنىڭ جەتىسپەۋشىلىگىن تىلگە تيەك ەتكەن بولاتىن. جاھاندىق ەكونوميكا جانە حالىقارالىق ەڭبەك نارىعى تۇبەگەيلى وزگەرىپ جاتقان تۇستا ەلىمىزدىڭ مىقتى ونەركاسىپتىك نەگىزىن قالىپتاستىرۋ جانە ەكونوميكامىزدى ءوزىمىز تولىق قامتاماسىز ەتە الاتىن جاعدايعا جەتۋ قازىرگى تاڭداعى ەڭ ماڭىزدى مىندەتتەردىڭ ءبىرى بولىپ وتىر.
پرەزيدەنت سايلاۋ الدىنداعى باعدارلاماسىندا «عىلىم جانە تەحنولوگيالىق ساياسات تۋرالى» زاڭ قابىلداۋ تۋرالى باستاما كوتەرگەن بولاتىن. ءقازىر ازىرلەنىپ جاتقان زاڭ جوباسىندا ەكونوميكامىزدى عىلىم مەن يننوۆاسياعا سۇيەنە وتىرىپ دامىتۋ لوگيكاسىنىڭ كورىنىس تابۋى ماڭىزدى ەكەنىن ايتتى.
ءبىلىم – تاۋسىلمايتىن قازىنا. ءبىلىمدى، ساپالى، باسەكەگە قابىلەتتى جاستار – ەلىمىزدىڭ بولاشاعى. مەملەكەت باسشىسى جاڭا ەكونوميكالىق ۇلگىگە كوشۋ، 2029 جىلعا قاراي جالپى ىشكى ءونىمدى قازىرگىدەن ەكى ەسە ارتتىرۋ ماسەلەسىنىڭ ەرەكشە قولعا الىنۋ قاجەتتىلىگىن اتاپ ءوتتى. ول ءۇشىن ساپالى كادرلاردى دايىنداۋ جۇمىستارى جۇرگىزىلۋى قاجەت. وسى ورايدا ازاماتتىق اۆياسيا اكادەمياسى كادر جەتىسپەۋشىلىگىن ازايتىپ، جۇمىس بەرۋ مەكەمەلەرىنىڭ تالاپتارىنا ساي اۆياسيا سالاسى قىزمەتكەرلەرىنە ساپالى ءبىلىم بەرۋ ءۇشىن بارىن سالۋدا. ۇستازدارىمىز ۇنەمى كاسىبي بىلىكتىلىگىن ارتتىرىپ، ستۋدەنتتەرگە سوڭعى ۇلگىدەگى مەتوديكالارمەن ساباق بەرۋدە. ءبىر جاعادان باس، ءبىر جەڭنەن قول شىعارا وتىرىپ، ەلىمىزدىڭ دامۋىنا بارىنشا ۇلەس قوسۋ، ءبىلىم مەن عىلىمدى دامىتىپ، وسكەلەڭ ۇرپاقتى ادالىنان ەڭبەكتەنۋگە، حالىققا قىزمەت ەتۋگە شاقىرۋ، ءوز ازاماتتىق اۆياسيا سالامىزدى تەرەڭىنەن مەڭگەرىپ، ناعىز كاسىبي مامان بولىپ قالىپتاسۋ، قازاقستانىمىزدىڭ گۇلدەنۋىنە، الەمدىك نارىقتا ءوز ورنىن ويىپ تۇرىپ الۋىنا ءسال دە بولسىن ۇلەس قوسۋ – ءاربىر قازاقستاندىقتىڭ وتان الدىنداعى مىندەتى بولىپ قالا بەرمەك!