ق ر مادەنيەت جانە سپورت ءمينيسترى داۋرەن ابايەۆ الەم شاحماتى تاريحىنداعى ەڭ جاس الەم چەمپيونى ءبيبىسارا اساۋبايەۆامەن كەزدەستى، دەپ حابارلايدى Almaty-akshamy.kz Elorda.info سايتىنا سىلتەمە جاساپ
كەزدەسۋ بارىسىندا مينيستر ءبيبىسارا اساۋبايەۆانى قۇتتىقتاي كەلە، اناسى ليانا تاڭجارىقوۆاعا العىسىن ءبىلدىرىپ، «دەنە شىنىقتىرۋ مەن سپورتتى دامىتۋعا سىڭىرگەن ەڭبەگى ءۇشىن» توسبەلگىسىمەن ماراپاتتادى.
«ءبيبىسارا – ەل ماقتانىشى. بۇكىل الەم كوز تىككەن بەدەلدى تۋرنيردەگى ءبيبىسارا اساۋبايەۆانىڭ جارقىن جەڭىسى ەلىمىزدەگى شاحمات تاريحىندا التىن ارىپپەن جازىلاتىن بولادى. وسى ورايدا ءبيبىسارانىڭ اتا-اناسىنا، جاتتىقتىرۋشىلارىنا ەرەكشە العىس بىلدىرگىم كەلەدى. ءبيبىسارا اساۋبايەۆانىڭ ايتۋلى جەڭىسى وسكەلەڭ ۇرپاقتىڭ شاحمات سپورتىنا دەگەن قىزىعۋشىلىعىن ارتتىرىپ، ىنتالاندىراتىنى ءسوزسىز»، - دەپ اتاپ ءوتتى مادەنيەت جانە سپورت ءمينيسترى.
ەستەرىڭىزگە سالا كەتەيىك، پولشا استاناسى ۆارشاۆا قالاسىندا وتكەن الەم چەمپيوناتىندا 17 جاستاعى قازاقستاندىق شاحماتشى ءبيبىسارا اساۋبايەۆا «بليستە» ءبىرىنشى ورىندى جەڭىپ الىپ، الەمدىك شاحمات تاريحىندا ايەلدەر اراسىندا ەڭ جاس شاحماتشى اتاعىنا يە بولدى.
سونداي-اق اتالمىش چەمپيوناتتا ءبيبىسارا جىلدام شاحماتتان (راپيد) 2-ورىندى يەلەندى. بۇعان دەيىن قازاقستاندىق سپورتشى ءبيبىسارا اساۋبايەۆا قىزدار اراسىندا 8، 10، 12 جانە 14 جاسقا دەيىنگى كلاسسيكالىق شاحماتتان الەم چەمپيونى، 7، 9 جاسقا دەيىنگى وقۋشىلار اراسىندا الەم چەمپيونى اتانعان.