Forbes جۋرنالى الەمدەگى ەڭ باي ادامداردىڭ جاڭارتىلعان ءتىزىمىن جاريالادى.
وعان قازاقستاننان التى ادام ەندى. ولاردىڭ بەسەۋىنىڭ بايلىعى اقش-تىڭ بۇرىنعى پرەزيدەنتى دونالد ترامپتان اسىپ ءتۇستى، دەپ حابارلايدى aqshamnews.kz.
قازاقستاندىقتاردىڭ اراسىندا كوش باسىنا ۆياچەسلاۆ كيم جايعاستى – ول 464-ورىندا، ونىڭ بايلىعى 7،1 ميلليارد دوللار دەپ باعالانادى. Forbes سايتىنىڭ مالىمەتىنشە، كيم – قازاقستانداعى ەڭ ءىرى فينتەح-كومپانيا سانالاتىن Kaspi.kz اكسيونەرى جانە ديرەكتورلار كەڭەسىنىڭ ءتوراعاسى.
ميحايل لومتادزە 597-ورىنعا يە بولدى، ونىڭ بايلىعى 5،9 ميلليارد دوللار دەپ باعالانعان.
ءۇشىنشى ورىندا تيمۋر تۋرلوۆ تۇر – ول 605-ورىنعا جايعاسقان، ونىڭ بايلىعى 5،8 ميلليارد دوللار. تۋرلوۆ – Freedom Holdingء-تىڭ نەگىزىن قالاۋشى جانە باس ديرەكتورى. بۇل كومپانيا قازاقستاندا، ورتالىق ازيادا، ەۋروپا مەن اقش-تا قارجىلىق قىزمەت كورسەتەدى.
تىزىمدە ۆلاديمير كيم دە بار – ول 620-ورىندا، ونىڭ بايلىعى 5،7 ميلليارد دوللار. ۆلاديمير كيم – «قازاحمىس» حولدينگىنىڭ پرەزيدەنتى.
673-ورىندا دينارا جانە تيمۋر قۇلىبايەۆتار ورنالاسقان. ولار Halyk Bank پەن «المەكس» حولدينگتىك توبىنىڭ نەگىزگى يەلەرى. ولاردىڭ بايلىعى 5،3 ميلليارد دوللار دەپ باعالانادى.
قازاقستاندىقتاردان ءتىزىمدى بولات وتەمۇراتوۆ قورىتىندىلادى. ول 3،7 ميلليارد دوللار بايلىققا يە. Forbesء-تىڭ مالىمەتىنشە، وتەمۇراتوۆ – قوناق ءۇي بيزنەسى مەن Kar-Tel، سونداي-اق قىرعىزستاندىق Sky Mobile ءموبيلدى بايلانىس وپەراتورلارىنا ينۆەستيسيا سالعان كاسىپكەر.
ايتا كەتەرلىگى، اقش-تىڭ بۇرىنعى پرەزيدەنتى دونالد ترامپ بۇل تىزىمدە 711-ورىندا، ونىڭ بايلىعى 4،9 ميلليارد دوللار دەپ كورسەتىلگەن.