قازاقستان تۇرعىن ءۇي كومپانياسى ۇلەسكەردىڭ ينۆەستيسيالارىنا كەپىلدىك بەرەدى.
قازاقستاندا ايماقتارعا ارنالعان جاڭا "وردا ايماق" يپوتەكالىق باعدارلاماسى ىسكە قوسىلادى، دەپ حابارلايدى aqshamnews.kz قازاقستان تۇرعىن ءۇي كومپانياسىنا سىلتەمە جاساپ.
قازاقستان تۇرعىن ءۇي كومپانياسى بيىل 7 ساۋىردەن باستاپ يپوتەكالىق نەسيەلەندىرۋدىڭ "وردا ايماق" باعدارلاماسىن ىسكە قوسادى. كومپانيا كەپىلدىگىمەن قۇرىلىسقا ۇلەستىك قاتىسۋ تۋرالى شارت بويىنشا سالىنىپ جاتقان تۇرعىن ءۇيدى ساتىپ الۋعا بولادى. ياعني ۇلەسكەردىڭ ينۆەستيسيالارىنا كومپانيا كەپىلدىك بەرەدى. قۇرىلىس اياقتالماعان نەمەسە قۇرىلىس كومپانياسى بانكروت بولعان جاعدايدا، قازاقستان تۇرعىن ءۇي كومپانياسى باسپانانىڭ سالىنىپ بىتۋىنە كەپىل بولادى.
"وتىنىمدەر "وتباسى بانكى" ۋاكىلەتتى اگەنتتەرى ارقىلى قابىلدانادى. 21 جاستان اسقان قازاقستاننىڭ كەز كەلگەن ازاماتى قارىز الۋشى بولا الادى. "وردا ايماق" باعدارلاماسىندا "وتباسى بانكتە" دەپوزيتتىڭ بولۋى، قارىز الۋشىعا قويىلاتىن تالاپ پەن تۇرعىن ءۇيدىڭ بولۋى تۋرالى شەكتەۋ قولدانىلمايدى"، - دەيدى كومپانيا.
باعدارلامانىڭ نەگىزگى ارتىقشىلىقتارى:
15،9 % مولشەرىندە بەلگىلەنگەن سىياقى؛
جىلدىق ءتيىمدى سىياقى مولشەرلەمەسى 17،26 %-تەن 22،81 %-كە دەيىن.
يكەمدى شارتتار:
باستاپقى جارنا 20% باستاپ؛
قارىز سوماسى 1 ملن تەڭگەدەن 75 ملن تەڭگەگە دەيىن؛
قارىز مەرزىمى 12 ايدان 240 ايعا دەيىن.
سالىنىپ جاتقان تۇرعىن ءۇيدىڭ باعاسى دايىن تۇرعىن ۇيگە قاراعاندا تومەن. جاڭا قۇرىلىس وبەكتىلەرىنىڭ سيپاتتاماسىمەن سونداي-اق ساتۋ بولىمشەلەرى مەن كونسۋلتانتتاردىڭ بايلانىستارىمەن قتك تۇرعىن ءۇي پورتالىندا تانىسۋعا بولادى.