ەلىمىزدە 5-8 جاستاعى بالالاردىڭ 45%-ى ينتەرنەت قولدانادى.
يۋنيسەف-تىڭ بالالىق شاقتى قورعاۋ باعدارلامالارىنىڭ جەتەكشىسى ايسۇلۋ بەكمۇسا بالالاردىڭ ونلاين قاۋىپسىزدىگىنە بايلانىستى جۇرگىزىلىپ جاتقان جۇمىستار تۋرالى باياندادى، دەپ حابارلايدى Almaty-akshamy.kz.
ايسۇلۋ بەكمۇسا ورتالىق كوممۋنيكاسيالار قىزمەتىندە وتكەن دوڭگەلەك ۇستەل وتىرىسىندا يۋنيسەف ۇيىمى مەن سالالىق مينيسترلىك جۇرگىزگەن زەرتتەۋ ناتيجەسىن جاريالادى.
«يۋنيسەف-تىڭ جاھاندىق ەسەبىندە الەمدەگى ءاربىر ءۇشىنشى ينتەرنەت قولدانۋشىسى بالا دەلىنگەن. وقۋ-اعارتۋ مينيسترلىگىمەن بىرلەسىپ بىلتىر قازاقستانداعى بالالاردىڭ ونلاين-قاۋىپسىزدىگى مەن تاجىريبەسى بويىنشا زەرتتەۋ جۇرگىزدىك. ناتيجەسىندە قازاقستاندا بالالار ينتەرنەتكە بۇرىن-سوڭدى بولماعان جىلدامدىقپەن جانە ەرتە جاستان قوسىلاتىنىن انىقتادىق. زەرتتەۋگە سايكەس، بالالاردىڭ 45%-ى ينتەرنەتكە 5-8 جاسىندا، ال بالالاردىڭ 5%-ى ودان دا ەرتە - 4 جانە ودان كىشى جاستا قوسىلادى»، - دەدى سپيكەر.
ايسۇلۋ بەكمۇسا ينتەرنەت بالالاردىڭ دامۋىنا، ولاردى وقىتۋعا، شىعارماشىلىعىنا، الەۋمەتتەنۋىنە مۇمكىندىك بەرەتىنىنە توقتالا كەلە، تاۋەكەلدەردى دە ەسكەرۋ قاجەت ەكەنى ايتتى.
ونىڭ ايتۋىنشا، بالالاردىڭ 21%-ى قۇرداستارى مەن دوستارىنىڭ كيبەربۋللينگكە ۇشىراعانىن كورگەن. ءبىراق ولاردىڭ جارتىسى عانا ەرەسەكتەرگە ينتەرنەتتە كيبەربۋللينگكە تاپ بولعاندارىن ايتقان.
«ءبىز بالالاردىڭ قۇقىقتارىن قورعاۋ كوميتەتىمەن بىرلەسىپ بالالار ءۇشىن ءقاۋىپسىز پايدالانۋشىلىق ينتەرنەت قالىپتاستىرۋعا باعىتتالعان «كيبەرتۇمار» اقپاراتتىق ءبىلىم بەرۋ ناۋقانىن باستادىق. سونىمەن قاتار، كومپانيا اتا-انالارعا دا ارنالعان: ەگەر بالا ينتەرنەتتە قانداي دا ءبىر قاۋىپ-قاتەرگە تاپ بولسا، اتا-انالارعا ارنالعان نەگىزگى ءىس-قيمىل الگوريتمدەرى ۇسىنىلادى»، - دەدى يۋنيسەف وكىلى.