وقۋ-اعارتۋ مينيسترلىگىنىڭ وكىلدەرى ءاربىر جەتىم بالانىڭ وتباسىندا ءومىر ءسۇرۋ قۇقىعىن قامتاماسىز ەتۋدىڭ قانشالىقتى ماڭىزدى ەكەنىن اتاپ ءوتتى.
بۇل تۋرالى ولار ورتالىق كوممۋنيكاسيالار قىزمەتىندە وتكەن دوڭگەلەك ۇستەلدە ايتتى، دەپ حابارلايدى Almaty-akshamy.kz وقۋ-اعارتۋ مينيسترلىگىنە سىلتەمە جاساپ.
بۇگىندە جەتىم بالالاردىڭ 80%-ى قازاقستاندىق وتباسىلاردىڭ قامقورلىعىنا بەرىلگەن. جىل سايىن قازاقستان ازاماتتارى ءوز وتباسىلارىنا 1000-نان استام جەتىم بالالاردى قابىلداپ كەلەدى.
«ءبىز بالالار ۇيلەرىن ينستيتۋسيونالسىزداندىرۋدى جالعاستىرىپ كەلەمىز جانە 3 جىل ىشىندە ولاردىڭ سانى 21 ۇيىمعا ازايدى. مەملەكەت باسشىسىنىڭ تاپسىرماسىنا سايكەس بالالاردى وتباسىلارعا ورنالاستىرۋدىڭ جاڭا تاسىلدەرىن ازىرلەۋ، سونداي-اق ينتەرنات ۇيىمدارى تاربيەلەنۋشىلەرىنىڭ سانىن قىسقارتۋ بويىنشا جۇمىستار جۇرگىزىلۋدە»، - دەپ اتاپ ءوتتى ق ر وقۋ-اعارتۋ مينيسترلىگى بالالاردىڭ قۇقىقتارىن قورعاۋ كوميتەتىنىڭ ءتوراعاسى ناسىمجان وسپانوۆا.
سونداي-اق، وتكەن جىلى 700-دەن استام جەتىم بالا باسپانالى بولعانىن ايتا كەتۋ كەرەك، بۇل ولاردىڭ نەگىزگى قۇقىقتارى جانە تولىققاندى دامۋى ءۇشىن جاعداي تۋدىرۋداعى تاعى ءبىر ماڭىزدى قادام بولدى.