اقشا – تەك تولەم قۇرالى ەمەس. ول – ءار حالىقتىڭ مادەنيەتى مەن بولمىسىن بەينەلەيتىن ناعىز ونەر تۋىندىسى. شۆەيساريا فرانكتەرىنىڭ زاماناۋي ديزاينىنان باستاپ، تروپيكالىق مالديۆ رۋفييلەرىنە دەيىن – ءار ەلدىڭ بانكنوتى وزىنشە ەرەكشە.
بانكنوتتىڭ كوركەمدىك قۇندىلىعى
اقشانىڭ ادەمىلىگى – كەز كەلگەن سۇلۋلىق سياقتى سالىستىرمالى ۇعىم. بىرەۋ ءۇشىن ول ونەر تۋىندىسى بولسا، ەكىنشىسى ءۇشىن – جاي عانا ءتۇرلى-تۇستى قاعاز.
بانكنوتتىڭ تارتىمدىلىعىن قابىلداۋ كوبىنە ادامنىڭ مادەني ورتاسى مەن ومىرلىك تاجىريبەسىنە بايلانىستى. بىرەۋگە مينيماليستىك امەريكالىق دوللار ۇناۋى مۇمكىن، ال كەيبىرى كەرىسىنشە، پولينەزيانىڭ اشىق رەڭدى، تروپيكالىق بەينەلى فرانكىنە سۇيسىنەدى.
ءبىراق ءبىر نارسە انىق: كەز كەلگەن اقشادا وزىندىك كوركەمدىك ءمان بار. بانكنوتتار – ۇلتتىق جەتىستىكتەر مەن تاريحي مۇرالاردى شاعىن فورماتتا بەينەلەيتىن ەرەكشە گالەرەيا. ولاردىڭ ديزاينىندا حالىقتىڭ ءداستۇرى مەن قازىرگى گرافيكالىق ۇردىستەر ۇيلەسىم تابادى.
سوندىقتان اقشانىڭ سىرتقى كورىنىسى – جاي ەستەتيكا ەمەس، ەلدىڭ مادەني كودى مەن تاريحي ساناسىن كوركەم تۇردە جەتكىزەتىن بەينە.
شۆەيساريا فرانكى
شۆەيساريا – الەمدەگى ەڭ قورعالعان ءارى كوركەم بانكنوتالار شىعاراتىن ەلدەردىڭ ءبىرى. 2016–2019 جىلدارى جارىق كورگەن 9-سەريا – ناعىز ديزاينەرلىك جاڭالىق.
بۇل سەرياداعى ءار كۋپيۋرا ءومىردىڭ بەلگىلى ءبىر قۇبىلىسىنا ارنالعان:
• 10 فرانك – ديريجەردىڭ قولى،
• 50 فرانك – جەل مەن ءالپىنىڭ پەيزاجى،
• 100 فرانك – سۋ،
• 200 فرانك – جارىق پەن اي.
2016 جىلى 50 فرانك «جىلدىڭ ەڭ ۇزدىك بانكنوتى» دەپ تانىلدى. وندا باقباق ۇستاپ تۇرعان قول بەينەلەنگەن، ونىڭ داندەرى جەر شارىنىڭ ۇستىنەە شاشىلعان – بۇل جاھاندىق بىرلىكتىڭ نىشانى. سىرتقى جاعىندا ءپاراشيۋتشى بەينەلەنگەن.
كانادا دوللارى
كانادا – پوليمەر بانكنوتتاردى العاش ەنگىزگەن ەلدەردىڭ ءبىرى جانە ونى ەرەكشە تالعاممەن جاساعان.
• 5 دوللاردا – كانادانىڭ 7-پرەمەر-مينيسترى ۋيلفريد لورە جانە كانادانىڭ مادەني بىرەگەيلىگىن بىلدىرەتىن قىسقى سپورت تۇرلەرى،
• 10 دوللاردا – ەلدىڭ تۇڭعىش پرەمەر-مينيسترى دجون ماكدونالد پەن بۇۇ-داعى كانادالىق بىتىمگەرلەر،
• 20 دوللاردا – پاتشايىم ەليزاۆەتا II جانە كانادانىڭ مادەني مۇراسى سانالاتىن ۇلتتىق ەسكەرتكىشتەر،
• 50 دوللاردا – كانادانىڭ 10-پرەمەر-مينيسترى ۋيليام لايون ماكەنزي مەن «اتاقتى 5 ايەل» قوزعالىسىنىڭ وكىلدەرى.
كانادالىق بانكنوتالاردىڭ ەرەكشەلىگى — ءمولدىر گولوگرامما، كوزى ناشار كورەتىندەرگە ارنالعان بەدەرلى بەلگىلەر جانە ءتۇرلى بۇرىشتان قاراعاندا ءتۇسىن وزگەرتەتىن بوياۋلار.
جاڭا زەلانديا دوللارى
بۇل بانكنوت اقشا ەلدىڭ تابيعي بايلىعىنىڭ كورىنىسى بولا الاتىنىنا جارقىن مىسال.
• 5 دوللاردا – ەدمۋند حيللاري جانە سيرەك كەزدەسەتىن سارىكوز پينگۆين،
• 10 دوللاردا – كوك ۇيرەك (ۋايو)،
• 20 دوللاردا – جاڭازەلانديالىق سۇڭقار (كارەا)،
• 50 دوللاردا – ورمەلەگىش كوك قارعا (كوكاكو).
بۇل ەلدىڭ بانكنوتتارى بەرىك پوليمەردەن جاسالىپ، ۇلتتىق نىشان – پاپوروتنيك پىشىنىندەگى ءمولدىر گولوگراممامەن تولىقتىرىلعان.
مالديۆ ءرۋفييى
مالديۆ بانكنوتتارى – تروپيكالىق ءومىردىڭ كورىنىسى. ءار كۋپيۋرانىڭ ءوز ءتۇسى مەن تاقىرىبى بار:
• 5 رۋفيي – ارالداعى تانىمال سپورت تۇرلەرى،
• 10 – بالىقشىلار مەن ءداستۇرلى دحوني قايىعى،
• 20 – تەڭىز تاقىرىبى، بالىقشى كاسىبى،
• 50 – يسلام مەن ءبىلىم،
• 100 – ۇلتتىق مۋزىكالىق اسپاپتار،
• 500 – ارال تۇرعىندارىنىڭ قولونەرى،
• 1000 – تەڭىز تاسباقالارى مەن مارجان ريفتەرى.
قانىق كوك، قىزعىلت جانە كۇلگىن تۇستەر بۇل كۋپيۋرالاردى ناعىز ونەر تۋىندىسىنا اينالدىرعان.
نورۆەگ كرونى
2017–2019 جىلدارى شىققان 8-سەريا «تەڭىز» تاقىرىبىنا ارنالعان.
• 50 كرون – سۋلۋنن قالاسىنداعى ۋتۆەر ماياگى،
• 100 – IX عاسىرداعى ۆيكينگ كەمەسى،
• 200 – ترەسكا بالىعى،
• 500 – RS 14 Stavanger قۇتقارۋ كەمەسى،
• 1000 – تولقىن مەن كوكجيەك بەينەسى.
پيكسەلدى ديزاين مەن ابستراكتىلى رەڭكتەر ۇيلەسىم تاپقان بۇل سەريا سكانديناۆيالىق ءمينيماليزمنىڭ ۇزدىك ۇلگىسى رەتىندە حالىقارالىق ماراپاتتارعا يە بولعان.
قازاقستان تەڭگەسى
ديزاينى جاعىنان الەمدە لايىقتى باعاسىن الا قويماعانىمەن، 2006–2015 جىلدارداعى «سامۇرىق-قازىنا» سەرياسى ۇلتتىق ناقىش پەن زاماناۋي تەحنولوگيانى تاماشا ۇشتاستىرعان.
• 1000 تەڭگە – «قازاق ەلى» مونۋمەنتى،
• 2000 – «قازاقستان» كونسەرت زالى،
• 5000 – الماتىداعى «قازاقستان» ءقوناقۇيى،
• 10 000 – «اقوردا - پرەزيدەنت سارايى»،
• 20 000 – «استانا-بايتەرەك» مونۋمەنتى.
سىرتقى بەتىندە ەلدىڭ كارتاسى مەن تابيعي پەيزاجدار بەينەلەنگەن.
2019–2022 جىلدارى شىققان جاڭا سەريادا تاريحي تۇلعالاردىڭ پورترەتتەرى قوسىلىپ، ۆيزۋالدى بەينە بايىتىلعان. ءتۇس ايقىن، برايل ءشريفتى بار، بۇل كوزى ناشار كورەتىندەرگە ىڭعايلى.
فيدجي دوللارى
ءفيدجيدىڭ اقشالارى – ەكزوتيكالىق فلورا مەن فاۋنانىڭ كورىنىسى.
• 5 دوللار – جاسىل توتىقۇس كۋلاۆاي،
• 10 دوللار – مارجان ريفتەرى مەن تروپيكالىق بالىقتار،
• 20 دوللار – مۇحيت ۇستىندە قالىقتاعان فرەگات قۇسى،
• 50 دوللار – ۇلتتىق گۇلدەر توپتاماسى،
• 100 دوللار – سيرەك جاندىكتەر بەينەسى.
فيدجي بانكنوتالارى گولوگرامما، سۋتاڭبا جانە ميكروباسپا ارقىلى قورعالعان.
بەرمۋد دوللارى
بەرمۋد اقشالارى تىك فورماتتا جاسالعان جانە ءتۇرلى تۇستەرمەن ەرەكشەلەنەدى.
• 2 دوللار – سومەرسەت-بريدج پارومى،
• 5 دوللار – اۋليە پەتر شىركەۋى،
• 10 – كوبەلەكتەر مەن وسىمدىكتەر،
• 20 – حاي-پوينت توبەسى جانە گيببس-حيلل ماياگى،
• 50 – اۋليە يوانن شىركەۋى،
• 100 – پارلامەنت عيماراتى.
تەڭىز تاسباقالارى، مارجان ريفتەرى مەن تروپيكالىق گۇلدەر بانكنوتتارعا ەرەكشە كورىك بەرەدى. گەومەتريالىق ورنەك تۇرىندەگى ايگىلى «بەرمۋد ءۇشبۇرىشى» دا بەينەلەنگەن.
افريكا فرانكى
باتىس افريكاداعى سەگىز ەل (بەنين، بۋركينا-فاسو، گۆينەيا-بيساۋ، كوت-د’يۆۋار، مالي، نيگەر، سەنەگال، توگو) قولدانادى.
• 5000 فرانك – انتيلوپا مەن ءداستۇرلى ورنەكتەر،
• 10 000 فرانك – ۇلتتىق باس كيىم كيگەن ايەل بەينەسى.
تۇستەردىڭ قانىقتىعى مەن ەتنيكالىق ناقىش – بۇل ۆاليۋتانىڭ باستى ەرەكشەلىگى.