2026 جىلى قازاقستاندا تاۋ-كەن ءىسى مەن ينجەنەريا سالاسىنداعى بەدەلدى جوعارى وقۋ ورنى – Colorado School of Mines ۋنيۆەرسيتەتىنىڭ الەمدەگى العاشقى فيليالى اشىلادى.
بۇل تۋرالى عىلىم جانە جوعارى ءبىلىم مينيسترلىگى مالىمدەدى، دەپ حابارلايدى aqshamnews.kz.
QS WUR پاندىك رەيتينگىندە «مينەرالدى جانە تاۋ-كەن ينجەنەرياسى» باعىتى بويىنشا الەمدە ءبىرىنشى ورىندى يەلەنەتىن بۇل ۋنيۆەرسيتەتتىڭ قازاقستاندا اشىلاتىن فيليالى ورتالىق ازياداعى اكادەميالىق حابتىڭ قارقىندى دامۋىنىڭ جارقىن كورىنىسى بولماق.
شەتەلدىك الدىڭعى قاتارلى جوعارى وقۋ ورىندارىن قازاقستانعا تارتۋ بويىنشا جۇرگىزىلگەن جۇمىس ساپارى اياسىندا قازاقستان رەسپۋبليكاسىنىڭ عىلىم جانە جوعارى ءبىلىم مينيسترلىگى مەن Colorado School of Mines ۋنيۆەرسيتەتى اراسىندا اتالعان وقۋ ورنىنىڭ فيليالىن قازاقستاندا اشۋ تۋرالى كەلىسىمگە قول قويىلدى.
قول قويۋ راسىمىنە قازاقستان رەسپۋبليكاسىنىڭ عىلىم جانە جوعارى ءبىلىم ءمينيسترى ساياسات نۇربەك، Colorado School of Mines ۋنيۆەرسيتەتىنىڭ جاھاندىق باستامالار جونىندەگى ۆيسە-پرەزيدەنتى دجون برەدفورد جانە قازاقستان رەسپۋبليكاسى پرەزيدەنتىنىڭ كومەكشىسى قانات شارلاپايەۆ قاتىستى.
فيليال قازاقستاننىڭ گەولوگيا سالاسىنىڭ جۇرەگى سانالاتىن جەزقازعان قالاسىندا، قۇرىلىپ جاتقان ۇلىتاۋ تەحنيكالىق ۋنيۆەرسيتەتىنىڭ بازاسىندا اشىلادى. بۇل ۋنيۆەرسيتەت تاۋ-كەن-مەتاللۋرگيا سالاسى ءۇشىن جوعارى بىلىكتى ماماندار دايارلايتىن بولادى. ۇلىتاۋ تەحنيكالىق ۋنيۆەرسيتەتىنىڭ اۋماعى 20 گەكتاردى قۇرايدى، وقىتۋ تولىعىمەن اعىلشىن تىلىندە جۇرگىزىلەدى جانە باكالاۆرياتتىڭ 4 نەگىزگى ماماندىعى بويىنشا جۇزەگە اسىرىلادى:
تاۋ-كەن ءىسى؛
گەولوگيا جانە بارلاۋ؛
گەوفيزيكالىق ينجەنەريا؛
مۇناي ينجەنەرياسى.
ايتا كەتۋ كەرەك، بۇل كولورادو تاۋ-كەن مەكتەبىنىڭ شەتەلدەگى العاشقى كامپۋسى بولماق. فيليالدىڭ ءدال قازاقستاندا اشىلۋى ەلىمىزدىڭ سەنىمدى ءبىلىم بەرۋ سەرىكتەسى رەتىندەگى جانە ينۆەستيسيالار مەن تەحنولوگيا ترانسفەرىن تارتۋ سالاسىنداعى باسىم ايماق رەتىندەگى ماڭىزىن كورسەتەدى.
Colorado School of Mines – 1873 جىلى نەگىزى قالانعان مەملەكەتتىك ۋنيۆەرسيتەت. بۇل وقۋ ورنى ستۋدەنتتەردى تەك زەرتتەۋشىلىك قابىلەتكە عانا ەمەس، ناقتى سالالىق مىندەتتەرمەن جۇمىس ىستەۋگە ۇيرەتۋمەن تانىمال. ولار وقۋ بارىسىندا حالىقارالىق ينجەنەرلىك جوبالارعا قاتىسۋ ارقىلى تاجىريبە جيناقتاي الادى.
بۇعان دەيىن Colorado School of Mines ۋنيۆەرسيتەتى Satbayev University-مەن گەولوگيا، مۇناي-گاز ينجەنەرياسى جانە تاۋ-كەن ءىسى باعىتتارى بويىنشا 3+1+1 فورماتىندا قوس ديپلوم باعدارلاماسىن ىسكە قوسۋ جانە وسى سالالاردا بىرلەسكەن عىلىمي زەرتتەۋلەردى دامىتۋ تۋرالى كەلىسىمگە كەلگەن بولاتىن.
جەزقازعان قالاسىندا تولىققاندى كامپۋستىڭ اشىلۋى وڭىرگە جاستار اعىنىن ارتتىرىپ، جاڭا جۇمىس ورىندارىنىڭ قۇرىلۋىنا جانە وڭىرلىك ءارى جاھاندىق ەڭبەك نارىعىنا ارنالعان الەمدىك دەڭگەيدەگى كادرلاردى دايارلاۋعا مۇمكىندىك بەرەدى.