ءبىر ەلدە سۋ تاسىسا، باسقا جەردە داۋىل سوعىپ، ءدۇيىم جۇرتتىڭ دەگبىرىن قاشىرىپ جاتىر
الەمدە تابيعي اپات جيىلەپ بارادى، دەپ حابارلايدى Almaty-akshamy.kz.
«حابار24» مالىمەتى بويىنشا ۆەتنامداعى اپتاپتىڭ بەتى قايتار ەمەس. كۇن ماي ەريتىندەي كۇيىپ تۇر. شىجىعانى سونشا، جان شىداتپايدى. سىناپ باعاناسى 44 گرادۋستان اسادى. جۇرت ىستىقتان قورعانۋدىڭ امالىمەن الەك. كوبى جەلدەتكىش قوسىپ ۇيدەن شىقپاۋدى ءجون ساناعان. ءبىراق بۇل ەنەرگيا جۇيەسىنە ۇلكەن سالماق بولىپ تۇر. سوندىقتان ەلەكتر قۋاتى ءوشىرىلىپ جاتىر. ويتكەنى مۇنداي جۇكتەمەگە ەلدەگى ەنەرگەتيكا كەشەندەرى شىداس بەرمەۋى مۇمكىن.
كۇننىڭ ىسۋى ءقازىر مەترو جۇمىسىنا دا كەرى اسەرىن تيگىزىپ جاتىر. وسىعان بايلانىستى تاشكەنتتە پويىز قوزعالىسىنىڭ جىلدامدىعى تومەندەتىلمەك. قاۋىپسىزدىك ەرەجەلەرىنە سايكەس، رەلستەردىڭ تەمپەراتۋراسى 55 گرادۋستان اسقاندا جىلدامدىق ۋاقىتشا شەكتەلەدى. بۇگىندە جەراستىنداعى شويىن جولدىڭ كەي بولىكتەرىندە تەمپەراتۋرا 77 گرادۋسقا جەتەدى ەكەن.
يراك استاناسى قۇمدى داۋىلدىڭ استىندا قالدى. باعدات بىرنەشە ساعاتقا قارا تۇنەككە باتىپ، كوشەلەرىن قۇم باستى. تۇرعىندار سىرتقا شىعا الماي، ۇيلەرىندە قامالۋعا ءماجبۇر. بەتپەردەسىز شىعۋ مۇمكىن ەمەس. ايتا وتەيىن، قۇمدى داۋىل يراك تۇرعىندارى ءۇشىن ۇيرەنشىكتى قۇبىلىس. ءبىراق كەيىنگى ۋاقىتتا ول جيىلەپ كەتكەن. وسىعان قاتىستى ماماندار قاتتى الاڭداۋشىلىق ءبىلدىرىپ وتىر. ويتكەنى ەلدە جاۋىن-شاشىن ازايىپ كەتكەن.
ال جاپونيانىڭ ايتي پرەفەكتۋراسىندا تولاسسىز جاڭبىر جاۋىپ، جولداردى سۋ شايىپ كەتتى. نوسەر دەمالىس كۇندەرى توقتاماي جاۋعان. سونىڭ كەسىرىنەن وڭىردە كولىك قوزعالىسى ىركىلدى. پويىز قاتىناسى ۋاقىتشا توقتادى. 7 ءۇي جارىقسىز وتىر. ءقازىر اپات ايماعىندا قالپىنا كەلتىرۋ جۇمىستارى ءجۇرىپ جاتىر. ەستەرىڭىزدە بولسا، بىرنەشە كۇن بۇرىن عانا جاپونيادا ماۆار تايفۋنى سوققان ەدى. ءسويتىپ 7 پرەفەكتۋرادا ءقاۋىپتىڭ 4 دەڭگەيى جاريالاندى. 300 مىڭ ادام ءقاۋىپسىز جەرگە كوشىرىلدى. ءبىر ادام قايتىس بولىپ، ەكەۋى ءىز-تۇزسىز جوعالىپ كەتتى.