اپاتتىڭ ايتىپ كەلمەيتىنى قۇتقارۋشىلاردىڭ قىزمەتىنە زارۋلىكتى ارتتىردى، دەپ حابارلايدى almaty-akshamy.kz.
كۇننىڭ ىسۋى، تابيعاتتاعى وزگەرىستەر ءقاۋىپتى كۇشەيتتى. ەندى كوپ جەردە قۇتقارۋشى جەتىسپەي جاتقان كورىنەدى.
24.kz حابارلاۋىنشا، قىتايدىڭ حۋنان پروۆينسياسىندا 2 اپتادان بەرى تولاسسىز جاڭبىر جاۋىپ، سوڭى الاپات تاسقىنعا ۇلاستى. قۇتقارۋشىلار جەتىسپەي، ءبىراز جۇرت ۇيىنەن شىعا الماي قالعان. ءتىپتى كەي جەردە سۋ دەڭگەيى 3 مەترگە جەتكەن. جۇزگە جۋىق وزەن تاسىعان. وسى كەزدە سەرفينگپەن اينالىساتىن سپورتشى جىگىت كىشكەنتاي رەزەڭكە قايىعىمەن جەرلەستەرىن قۇتقارۋعا كىرىستى. 42 جاستاعى يۋ زۋەن از ۋاقىتتا 50-دەن استام ادامدى قامالعان ۇيىنەن امان-ەسەن الىپ شىققان. ول زارداپ شەككەندەردى قايىققا وتىرعىزىپ، قۇتقاردى.
ال اقش-تا مۇحيت جاعاسىندا شومىلۋ ءقاۋىپتى. جان-جاعىن 3 مۇحيت شايىپ جاتقان اقش-تاعى جاعاجايلاردا جىل سايىن جۇزدەگەن ادام جازاتايىم سۋعا كەتەدى. ءبىر عانا فلوريدا شتاتىندا كەشە عانا 6 تۇرعىن وپات بولدى. ەلدەگى قۇتقارۋ قاۋىمداستىعى وپەراسيانىڭ 80%-تەن استامى مۇحيتتىڭ جاعاعا ۇراتىن تولقىندارىمەن بايلانىستى دەيدى.
دەنيەل بارنيكەل، قۇتقارۋشى:
مۇحيتتان جاعاعا ۇراتىن تولقىندارمەن كۇرەسۋ وتە قيىن. سۋعا كەتە باستاعان ادام تۇك ىستەي الماي قالادى. ونى قۇتقارۋ دا وڭايعا سوقپايدى. ويتكەنى تولقىن وتە اساۋ. قۇتقارۋشىنىڭ ەركىن قيمىلداۋىنا ەرىك بەرمەيدى. وكىنىشكە قاراي، كوپتەگەن ادامدار مۇحيتتاعى شومىلۋعا تىيىم سالىنعان مەجەدەن اسىپ، جاعادان الىستاپ، اساۋ تولقىندارعا تاپ بولادى.
گازاداعى قۇتقارۋ قىزمەتى تەحنيكاسىنىڭ 40%ء-ى تالقاندالدى توتەنشە جاعدايدىڭ ءتۇرى كوپ. ەڭ اۋىرى – سوعىس. ءقازىر الەمدە قۇتقارۋ قىزمەتى ەڭ كەرەك ەل گازا سەكتورى بولىپ تۇر. يزرايل اسكەرى قۇتقارۋ قىزمەتىنە تيەسىلى تەحنيكانىڭ 40%ء-ى تالقانداپ تاستاعان. ماماندار 2 ساعاتتا بىتۋگە ءتيىس قۇتقارۋ وپەراسياسىنىڭ كەمىندە 6 ساعاتقا سوزىلاتىنىن ايتادى. «رەيتەر» اگەنتتىگىنىڭ حابارلاۋىنشا، ءقازىر گازا سەكتورىنىڭ سولتۇستىگىندە ءبىر عانا قۇتقارۋ مەكەمەسى مەن ءبىر عانا ءورت ءسوندىرۋ ءبولىمى جۇمىس ىستەيدى.
موحاممەد ال-مۋگەير، قۇتقارۋ قىزمەتىنىڭ باسشىسى:
ءبىز حالىقارالىق زاڭناما بويىنشا گۋمانيتارلىق باعىتتا جۇمىس ىستەيتىن ماماندارمىز. ءبىز قارۋ اسىنعان اسكەر ەمەسپىز. ءبىزدىڭ ميسسيامىز – ادامداردى قۇتقارۋ، ومىرىنە اراشا ءتۇسۋ. ءبىراق يزرايل اسكەرىنىڭ ارەكەتى بارلىق مۇمكىندىگىمىزدى جوق قىلدى، ادىمىمىزدى اشتىرماي قويدى. بۇل جاعدايعا حالىقارالىق قاۋىمداستىق باتىل ارالاسۋى كەرەك!
قۇتقارۋشىلار – تابيعي اپات، توسىن وقيعا، ءتىپتى قارۋلى قاقتىعىس كەزىندە بەيبىت تۇرعىندار ءۇشىن باسىن بايگەگە تىگەتىن ادامدار. ولار – ادام ءومىرىن ساقتاۋشى.
ال قازاقستاندا قۇتقارۋشىلارعا قانداي جۇك ارتىلعان؟ توتەنشە جاعداي مينيسترلىگىندە قۇتقارۋشىلاردىڭ ءتۇرى سان الۋان. ونىڭ قاتارىندا ۇشقىشتار دا، سۇڭگۋىرلەر مەن الپينيستەر، ءورت سوندىرۋشىلەر جانە سونىڭ قۇرامىنداعى مەديسينا، بولجاۋ، باقىلاۋ قىزمەتكەرلەرى دە بار.
جومارت اسقاروۆ، ق ر تجم توتەنشە جاعدايلاردى جويۋ دەپارتامەنتى باستىعىنىڭ ورىنباسارى:
قازىرگى تاڭدا تاۋلىك بويى 3،5 مىڭنان استام ادام، مىڭعا جۋىق تەحنيكا تاۋلىك بويى قىزمەتتە ءقازىر تۇر. استانا، الماتى قالالارىندا ارينە، كوپ. شومىلۋ ماۋسىمى باستالعالعاننان بەرى جانە ونىڭ الدىندا دا كۇننىڭ ورايىنا بايلانىستى بىزدە 153 جىلجىمالى بەكەت، 42 ستاسيونارلى بەكەتتەر ورناتىلعان. ول قوسىمشا اشىلعان.
توتەنشە جاعداي مينيسترلىگىمەن قوسا، جەدەل قۇتقارۋ جۇمىستارىن ىشكى ىستەر ورگاندارى، اتاپ ايتساق، پاترۋلدىك پوليسيا مەن ۇلتتىق ۇلان اسكەري قىزمەتشىلەرى دە اتقارادى. مىسالى ىشكى ىستەر ورگاندارىنان قوعامدىق ءتارتىپتى قامتاماسىز ەتۋگە كۇندەلىكتى 14 مىڭنان استام ادام جۇمىلدىرىلادى.
ايدىن ورازبايەۆ، ق ر ءىىم اكىمشىلىك پوليسيا كوميتەتى باسقارما باستىعىنىڭ ورىنباسارى:
بيىل شومىلۋ ماۋسىمى باستالعاننان باستاپ ىشكى ىستەر ورگاندارىمەن 14 ادام قۇتقارىلدى جانە دە 2 مىڭنان استام رەيدتىك شارا جۇرگىزىلدى. سونداي-اق قالالىق، وبلىس ورتالىقتارىنداعى رۇقسات ەتىلگەن شومىلۋ جەرلەرى بولاتىن بولسا، ولاردىڭ بارلىعىنا بەينەكامەرالار ورناتىلىپ، سول بەينەكامەرالارمەن دە باقىلاۋ جۇمىستارى جۇرگىزىلەدى.
ءاربىر جاساقتىڭ بەكىتىلگەن پاترۋلدىك باعىتى بار. سول باعىت بويىنشا بارلاۋ جۇمىستارى كەزىندە وقىس وقيعا ورىن السا، جەدەل تۇردە وسى جول پوليسياسى نەمەسە ۇلتتىق ۇلان اسكەرلەرى ءتيىستى كومەك كورسەتۋگە مىندەتتى.
ەلىمىزدە ورىن العان تابيعي نەمەسە تەحنوگەندى توتەنشە جاعدايلار بويىنشا بيىلعى جىلعى التى ايدا 112 نومىرىنە 2 688 520 قوڭىراۋ كەلىپ ءتۇستى. ال توتەنشە جاعداي مينيسترلىگى بولىمشەلەرى وقىس وقيعا ورنىنا 41402 رەت شىقتى. قىزمەتكەرلەر جالپى سانى 61494 ادامدى ەۆاكۋاسيالاپ، 9850ء-ىن قۇتقاردى. ال زارداپ شەككەندەر سانى 2985-كە جەتىپ، ولارعا مەديسينالىق كومەك كورسەتىلدى.