ەنەرگەتيكالىق داعدارىس مەتالدىڭ بيرجاداعى باعاسىنا ايتارلىقتاي اسەر ەتتى. كەيبىر ماتەريالداردىڭ قۇنى ءقازىردىڭ وزىندە كوپجىلدىق ماكسيمۋمگە جەتكەن. بۇل تۋرالى Financial Times باسىلىمى جازدى، دەپ حابارلايدى almaty-akshamy.kz
لوندون مەتالل بيرجاسىنىڭ دەرەگى بويىنشا، قازان ايىندا مىس 10 مىڭ دوللارعا قىمباتتاعان. مۇنداي جاعداي كەيىنگى ون جىلدا ءبىرىنشى رەت تىركەلىپ تۇر. ال مىرىشتىڭ قۇنى ءۇش جارىم مىڭ دوللارعا وسكەن. سوڭعى رەت ونىڭ باعاسى 2008 جىلى قارجى داعدارىسى كەزىندە كوتەرىلگەن.
مامانداردىڭ پايىمىنشا، بۇعان الەمدە مەتالعا دەگەن جوعارى سۇرانىس پەن جەتكىزىپ بەرۋدەگى قيىندىقتار اسەر ەتكەن. ال ونىڭ زاردابىن وندىرۋشىلەر تارتىپ وتىر. ماسەلەن، الەمدەگى ەڭ ءىرى مىرىش جەتكىزۋشىلەرىنىڭ ءبىرى – ناستار ەۋروپاداعى ءۇش زاۋىتتا ءوندىرىس كولەمىن ەكى ەسە قىسقارتاتىنىن مالىمدەدى.
ءقازىر لوندون مەتالل بيرجاسىنداعى قويمالاردا مىس قورى 1974 جىلدان بەرى العاش رەت رەكوردىق دەڭگەيدە ازايدى. قىركۇيەك ايىندا ولاردىڭ كولەمى 200 مىڭ توننا بولسا، بۇگىندە نەبارى 14 مىڭ تونناسى قالعان. گولدمان ساكس ساراپشىلارى جاعداي جىل سوڭىنا دەيىن وڭالمايتىنىن، ال كەلەر جىلى قور تىپتەن تاۋسىلۋى مۇمكىن دەگەندى ايتادى.