پوشتالىق ماركادا قازاقستان تاۋەلسىزدىگىنىڭ 30 جىلدىعىنىڭ لوگوتيپى بەينەلەنگەن
قازاقستاننىڭ بەلگيا كورولدىگىندەگى ەلشىلىگى، ەلىمىزدىڭ ليۋكسەمبۋرگتەگى قۇرمەتتى كونسۋلدىعى مەن «Eurasian Resources Group» كومپانياسى قازاقستان تاۋەلسىزدىگىنىڭ 30 جىلدىعىنا وراي ليۋكسەمبۋرگتە مەرەيتويلىق پوشتا ماركالارىن شىعارۋ باستاماسىن كوتەردى، دەپ حابارلايدى Almaty-akshamy.kz قازاقپاراتقا سىلتەمە جاساپ.
شىعارىلعان پوشتا ماركالارىن كۇندەلىكتى حات-حابارلاردا، سونداي-اق كادەسىي ونىمدەرى رەتىندە پايدالانۋعا بولادى. ليۋكسەمبۋرگ ءوزىنىڭ پوشتا ماركالارىن العاش رەت 1852 جىلى 15 قىركۇيەكتە شىعاردى، ال العاشقى ۇلتتىق پوشتا ماركالارىنىڭ كورمەسى 1946 جىلى 28-29 شىلدەدە ديۋدەلانج قالاسىندا ۇيىمداستىرىلدى. مەرەيتويلىق ماركا «Post Luxembourg» ۇلتتىق پوشتا كومپانياسىنىڭ قولداۋىمەن شىعارىلدى. 170 جىلدان استام ۋاقىت ىشىندە «Post Luxembourg» جوعارى ستاندارتتى قىزمەتتەردى ۇسىنا وتىرىپ، ەل تۇرعىندارىنىڭ ومىرىندە ماڭىزدى ءرول اتقارادى.
«قازاقستان تاۋەلسىزدىگىنىڭ 30 جىلدىعى» لوگوتيپى بار ماركانىڭ العاشقى دانالارى ليۋكسەمبۋرگ ۇلى گەرسوگتىگىنىڭ مەملەكەتتىك قۇرىلىمدارىنىڭ، ۇيىمدارىنىڭ، كومپانيالارىنىڭ، سونداي-اق ليۋكسەمبۋرگتەگى «قازاقستان-ليۋكسەمبۋرگ» قازاقتار قاۋىمداستىعىنىڭ وكىلدەرىنە بەرىلدى.