120-دان استام ەلدە 3 ميلليون گەكتار جەر تەمەكى ءوندىرۋ ءۇشىن پايدالانىلادى
تەمەكى ونىمدەرىن پايدالانۋ سالدارىنان جىل سايىن سەگىز ميلليون ادام كوز جۇمادى، دەپ حابارلايدى Almaty-akshamy.kz El.kz اقپارات اگەنتتىگىنە سىلتەمە جاساپ.
سوعان قاراماستان، الەم ۇكىمەتتەرى تەمەكى ءوندىرۋدى قارجىلاندىرۋدى توقتاتپاي تۇر. قازاقپاراتتىڭ جازۋىنشا، 31 مامىردا اتاپ وتىلەتىن دۇنيەجۇزىلىك تەمەكىگە قارسى كۇرەس كۇنى قارساڭىندا ددسۇ باسشىسى تەدروس گەبرەيەسۋس مالىمدەدى.
ول مەملەكەتتەردىڭ بيلىگىن ميلليونداعان ادامعا ازىق بولاتىن پايدالى داقىلداردى وسىرۋگە شاقىردى. ددسۇ «تاباك ەمەس، تاماق وسىرىڭىزدەر» دەگەن تاقىرىپپەن بايانداما جاريالادى. وندا تەمەكى ءوندىرىسىنىڭ جاي-جاپسارى اشكەرەلەنەدى. وندا جالعان توپتار ارقىلى تەمەكى وندىرەتىن فەرمەرلەردىڭ مۇددەسىن كوتەرىپ، فەرمەرلەردى «بورىشتىق قۇلدىقتا» ۇستاپ، تەمەكى ءوندىرىسىن ناسيحاتتاپ، ونىڭ ەكونوميكالىق پايداسىن اسىرەلەۋ تۋرالى ايتىلعان.
ددسۇ ساراپشىلارىنىڭ پىكىرىنشە، تەمەكىنىڭ زيانى تۇتىنۋشىلارعا عانا اسەر ەتپەيدى. ونى ءوندىرۋ پروسەسى كەزىندە فەرمەرلەر سوزىلمالى وكپە اۋرۋىنا شالدىعىپ، نيكوتينمەن (جاسىل تاباك اۋرۋى دەپ تە اتالادى) ۋلانادى. وعان قوسا تەمەكى وندىرىسىندە الەم بويىنشا ميلليوننان استام بالا جۇمىس ىستەيدى.
«تەمەكىنىڭ ورنىنا ازىق-تۇلىك ونىمدەرىن ءوسىرۋ ارقىلى ءبىز دەنساۋلىقتى ءبىرىنشى ورىنعا قويىپ، ەكوجۇيەنى ساقتايمىز، وندىرىستىك قاۋىپسىزدىكتى نىعايتامىز»، - دەدى دارىگەر تەدروس.
ول الەمدە 300 ميلليوننان استام ادام ازىق-تۇلىك ونىمدەرىنىڭ جەتىسپەۋشىلىگىنەن زارداپ شەگەتىنىن ەسكە سالدى. سوعان قاراماستان 120-دان استام ەلدە 3 ميلليون گەكتاردان استام جەر تەمەكى ءوندىرۋ ءۇشىن پايدالانىلادى، ونىڭ ىشىندە ادامدار اش جۇرگەن ەلدەر دە بار.
بۇگىنگى كۇنگە دەيىن تەمەكى ءوندىرىسى ازيا مەن وڭتۇستىك امەريكانىڭ ماسەلەسى دەپ ەسەپتەلىپ كەلدى. الەمدەگى تەمەكى ءوندىرىسىنىڭ 55 پروسەنتى برازيليا، جۇڭگو مەن ءۇندىستانعا تيەسىلى.
ەۋروپا ايماعىندا تاباك ونىمدەرىن ءوندىرۋ بويىنشا كوشباسشىلار - گرەسيا، يتاليا، يسپانيا، پولشا، سەربيا جانە تۇركيا.
جىل سايىن 31 مامىردا ددسۇ مەن ونىڭ سەرىكتەستەرى دۇنيەجۇزىلىك تەمەكىگە قارسى كۇرەس كۇنىن اتاپ وتەدى. ونىڭ ماقساتى – تەمەكى ونىمدەرىن پايدالانعاننان كەيىن پايدا بولاتىن ماسەلەلەرگە نازار اۋدارتىپ، ونىمەن ءتيىمدى كۇرەس شارالارىن ۇيىمداستىرۋ.
جىل سايىن ددسۇ تەمەكىنى باقىلاۋ سالاسىندا جەتىستىككە جەتكەن ادامدارعا ماراپات تابىستايدى. بيىل بۇل ماراپاتتى كەنيالىق كاسىپكەر سپرينا روبي چاچا الدى. ول تەمەكى ءوندىرۋدى توقتاتىپ، بۇرشاق وسىرۋگە كوشكەن جانە باسقا دا جۇزدەگەن فەرمەرگە وسىنداي ءتاسىلدى ۇيرەتتى.