ەلدە داۋىس بەرۋگە ارنالعان 191 مىڭنان استام جاشىك ورناتىلعان
تۇركيادا 28 مامىردا جەرگىلىكتى ۋاقىت بويىنشا تاڭعى ساعات 8:00-دەن پرەزيدەنت سايلاۋىنىڭ ەكىنشى تۋرى باستالدى، ول 13ء-شى مەملەكەت باسشىسى كىم بولاتىنىن كورسەتەدى، دەپ حابارلايدى Almaty-akshamy.kz قازاقپاراتقا سىلتەمە جاساپ.
وسىلايشا، بۇكىل ەل بويىنشا سايلاۋ ۋچاسكەلەرى تاڭعى 8:00-دە اشىلىپ، جەرگىلىكتى ۋاقىت بويىنشا 17:00-دە جابىلادى. ەلدە داۋىس بەرۋگە ارنالعان 191 مىڭنان استام جاشىك ورناتىلعان.
تۇركياداعى پرەزيدەنت سايلاۋىنا ەكى كانديدات قاتىسىپ جاتىر - قازىرگى مەملەكەت باسشىسى رەجەپ تايىپ ەردوعان جانە بىرىككەن وپپوزيسيانىڭ جەتەكشىسى كەمال كىلىچداروعلۋ.
14 مامىردا وتكەن داۋىس بەرۋدىڭ ءبىرىنشى تۋرىنىڭ قورىتىندىسى بويىنشا ەل پرەزيدەنتى انىقتالعان جوق، ويتكەنى جەتەكشى كانديداتتار سايلاۋشىلاردىڭ 50+1 داۋىسىنىڭ شەكتى كورسەتكىشىن الا المادى. سونىمەن بىرگە پرەزيدەنتتىككە ۇمىتكەرلەر سينان وگان مەن مۋحاررەم يندجە سايلاۋدان حالىقتىڭ قولداۋى بولماعاندىقتان شىعىپ قالدى.
پرەزيدەنت سايلاۋىندا سايلاۋشىلار جەكە باسىن كۋالاندىراتىن رەسمي قۇجاتتاردىڭ بىرىمەن داۋىس بەرە الادى.
سايلاۋشىلارعا پرەزيدەنتتىككە ۇمىتكەر ەكى كانديداتتىڭ ەسىمى جازىلعان ءبىر بيۋللەتەن بەرىلەدى. دەنساۋلىق جاعدايىنا بايلانىستى سايلاۋ ۋچاسكەلەرىنە كەلە المايتىن ازاماتتار ءۇشىن «ءموبيلدى جاشىكتەر» جۇمىس ىستەيتىن بولادى. سونداي-اق، كورۋ قابىلەتى ناشار ادامداردىڭ جەكە ساناتى ارنايى دايىندالعان شابلون بويىنشا ءوز داۋىستارىن بەرە الادى.
سونىمەن قاتار، تۇركيانىڭ جوعارعى سايلاۋ كوميسسياسى اقپان ايىنداعى جەر سىلكىنىسىنەن زارداپ شەككەن ەلدەگى 11 پروۆينسياسىندا داۋىس بەرۋ ءۇشىن بارلىق قاجەتتى شارالاردى قابىلدادى. بۇل وڭىرلەردە داۋىس بەرۋ جاشىكتەرى ارنايى بولىنگەن كونتەينەرلەر مەن مەكتەپتەردە ورناتىلعان.
شەتەلدەگى ۋچاسكەلەردە داۋىس بەرۋگە 3،5 ملن استام ادام قاتىستى. ولار ءۇشىن 73 ەلدە جانە 156 شەتەلدىك وكىلدىكتە سايلاۋ كوميسسيالارى قۇرىلدى. شەتەلدە تۇراتىن تۇركيا ازاماتتارىنا داۋىس بەرۋ پروسەسى 24 مامىردا اياقتالدى.
سايلاۋ ۋچاسكەلەرى ساعات 17.00-دە جابىلعاننان كەيىن داۋىستاردى ساناۋ باستالادى. سايلاۋ قورىتىندىسى كەشكى ساعات 21:00-دەن كەيىن جاريالانادى.