2023 جىلدىڭ قورىتىندىسى بويىنشا الەمدىك جەل ەنەرگەتيكاسىنىڭ قۋاتى 1 تۆت-تان اسىپ، وتكەن جىلمەن سالىستىرعاندا 12،9%-عا ارتتى. جۇڭگو بۇل سالادا كوش باستاپ، جەل ەنەرگەتيكاسىنىڭ قۋاتى 441،9 گۆت-قا جەتكىزدى. ەكىنشى ورىندا تۇرعان اقش-تىڭ (148 گۆت) كورسەتكىشىنەن ءۇش ەسە كوپ. سونىمەن قاتار، گەرمانيا (69،5 گۆت) جانە ءۇندىستان (44،7 گۆت) دا ايتارلىقتاي ناتيجەلەرگە قول جەتكىزدى، دەپ حابارلايدى aqshamnews.kz.
سونداي-اق، 2023 جىلى كۇن ەنەرگەتيكاسىنىڭ جاھاندىق قۋاتى 32،2%-عا ارتىپ، 1،4 تۆت-قا جەتتى. بۇل جاعىنان دا جۇڭگو الدا تۇر. ونىڭ كۇن ەنەرگەتيكاسىنىڭ قۋاتى 609،9 گۆت-قا جەتىپ، اقش-تىڭ (139،2 گۆت) كورسەتكىشىنەن 4،4 ەسە ارتىق. كۇن ەنەرگەتيكاسىندا جاپونيا (87،1 گۆت)، گەرمانيا (81،7 گۆت) جانە ءۇندىستان (73،1 گۆت) دا ماڭىزدى ءرول اتقاردى.
جەل جانە كۇن ەنەرگەتيكاسىنىڭ قۋاتىنىڭ ايتارلىقتاي وسۋىنە قاراماستان، ولاردىڭ ەنەرگيا ءوندىرۋ كولەمى الەمدەگى ەلەكتر ەنەرگياسىنا دەگەن سۇرانىستىڭ ارتۋىنا سايكەس كەلمەي وتىر. 2023 جىلدىڭ قورىتىندىسى بويىنشا الەمدە وندىرىلگەن ەلەكتر ەنەرگياسىنىڭ جالپى كولەمى 29،9 پۆت⋅ساع (پەتاۆاتت-ساعات) قۇراپ، 2،5%-عا ءوستى. جەل ەنەرگەتيكاسى 10،3%-عا ارتىپ، 2،3 پۆت⋅ساع-قا جەتسە، كۇن ەنەرگەتيكاسى 24،2%-عا ءوسىپ، 1،6 پۆت⋅ساع ءوندىردى. جەل ەنەرگەتيكاسىنىڭ الەمدىك ەلەكتر ەنەرگياسىن وندىرۋدەگى ۇلەسى 7،8%، ال كۇن ەنەرگەتيكاسىنىڭ ۇلەسى 5،5% بولدى.
سوڭعى 10 جىلدا الەمدىك ەلەكتر ەنەرگياسى ءوندىرىسى 6،5 پۆت⋅ساع-قا ارتتى، الايدا جەل ەنەرگەتيكاسى نەبارى 1،7 پۆت⋅ساع، ال كۇن ەنەرگەتيكاسى 1،5 پۆت⋅ساع قوسقان. نەگىزگى ءوسىم قازبا وتىن ەسەبىنەن بولىپ وتىر، بۇل دەكاربونيزاسياعا كەدەرگى كەلتىرەدى.
2023 جىلى قازاقستاندا جەل جانە كۇن ەنەرگەتيكاسى جالپى ەلەكتر ەنەرگياسىن ءوندىرۋدىڭ 5%-ىن قۇرادى (2022 جىلى 3،6% بولعان). دەگەنمەن، قازاقستان الەمدىك كورسەتكىشتەردەن ءالى دە ايتارلىقتاي ارتتا قالىپ وتىر. مىسالى، گەرمانيادا جەل ەنەرگەتيكاسى جالپى ەنەرگيانىڭ 27،7%-ىن، ال كۇن ەنەرگەتيكاسى 11،9%-ىن قامتاماسىز ەتەدى. اقش پەن قىتايدا جەل ەنەرگەتيكاسىنىڭ ۇلەسى سايكەسىنشە 9،6% جانە 9،4%، ال كۇن ەنەرگەتيكاسىنىڭ ۇلەسى 5،4% جانە 6،2%-دى قۇرايدى.