قازاقستاندا كوروناۆيرۋس جاعدايىنا بايلانىستى ەپيداحۋال ءالى دە جاقسارا قويعان جوق. ەلدىڭ ءبىر ءوڭىرى عانا «جاسىل» بەلدەۋدە تۇر. شەكتەۋ شارالارىن الىپ تاستاۋ ءۇشىن، تۇرعىنداردىڭ 70-80% -ى ۆاكسينا الۋى كەرەك دەگەن تالاپ بار.
دۇنيە ءجۇزىن دۇرلىكتىرگەن كوۆيد دەرتىنىڭ ستاتيستيكاسى دا، ءورشۋ ءقاۋپى دە قورقىنىشتى. بۇدان بۇرىن يران مەملەكەتىنىڭ بەسىنشى تولقىن باستالدى دەپ جاريالاعانىن جازعانبىز، -دەپ حابارلايدى Almaty-akshamy.kz ءتىلشىسى.
COVID-19 تارالۋىنا جول بەرمەۋ جونىندەگى ۆاك-تىڭ مالىمەتىنشە، ۆيرۋس جۇقتىرعان ادامدار سانى كۇن سايىن وسۋدە.
سولتۇستىك ماكەدونيادا وتكەن كۇنى 805 كوروناۆيرۋس تاسىمالداۋشىسى انىقتالدى. جۇقتىرعاندار سانىنىڭ ارتۋىمەن قاتار، ءولىم سانى دا ۇلعايىپ كەلەدى – 5 552. ەپيدەميا باستالعاننان بەرى ەلدە COVID-19 ىندەتىنە شالدىعۋدىڭ 162 164 جاعدايى انىقتالدى، ال رەسپۋبليكاداعى جالپى حالىق سانى 2 ميلليوننان ءسال اسادى. جاعدايدىڭ كۇرت ناشارلاۋى ۆاكسينا الماعان ازاماتتار ءۇشىن تاماقتانۋ ورىندارىنا بارۋعا شەكتەۋلەر ەنگىزۋگە اكەپ سوقتىردى.
ليتۆادا دا قاتاڭ كارانتيندىك شارالار ەنگىزىلدى. جاڭا شەكتەۋلەر 13 قىركۇيەككە دەيىن جالعاسادى، ولار COVID-19 ۆيرۋسىنا قارسى ۆاكسيناسيالانباعان ازاماتتارعا قاتىستى. ەكپە الماعان ادامدار ءۇشىن كارانتيندى ساقتاماۋ 1 500-دەن 6000 ەۋروعا دەيىن ايىپپۇل سالۋعا اكەلۋى مۇمكىن. «مۇمكىندىكتەر پاسپورتى» بولماعان جاعدايدا قورعانىس ماسكالارىن كيىپ، جابىق بولمەلەردە 2 مەتر قاشىقتىقتى ساقتاۋ كەرەك، ال مەكەمە باسشىلىعى كەلۋشىلەر مەن قىزمەتكەرلەردىڭ جەكە گيگيەناسىنا، ءۇي-جايلاردى ءجيى جەلدەتۋگە، جيھازداردى دەزينفەكسيالاۋعا جاعداي جاساۋى كەرەك.
موڭعوليادا COVID-19 جۇقتىرۋدىڭ 180 مىڭنان استام راستالعان جاعدايى تىركەلدى، - دەپ حابارلادى ەلدىڭ دەنساۋلىق ساقتاۋ مينيسترلىگى. سوڭعى 24 ساعات ىشىندە 6 530 پتر-تەستىلەۋ وتكىزىلدى، ونىڭ ىشىندە 1 402 وڭ ناتيجە بەردى. 9 080 پاسيەنت مەديسينالىق مەكەمەلەردە ەمدەلۋدە، 191ء-ى وتە اۋىر جاعدايدا، تاعى 2 953ء-ى اۋىر جاعدايدا. جالپىۇلتتىق ۆاكسيناسيا ناۋقانىندا ەرەسەك تۇرعىنداردىڭ كەم دەگەندە 60% - ىن ەگۋ جوسپارلانۋدا.
اۆستراليادا بىرنەشە كۇن قاتارىنان كوروناۆيرۋستىق ينفەكسيا جۇقتىرۋ سانىنىڭ رەكوردتىق ءوسۋى تىركەلدى. ەل بيلىگى سانيتارلىق شەكتەۋلەردى كۇشەيتتى. سيدنەيدە لوكداۋندى ساقتاماعانى ءۇشىن ايىپپۇل كولەمى كوبەيتىلدى. ۇيدەن 5 كم-دەن استام قاشىقتىققا سەبەپسىز كەتىپ قالعان تۇرعىندار 5 مىڭ اۆستراليالىق دوللارعا دەيىن ايىپپۇل تولەۋگە ءماجبۇر بولادى. بۇل 3 مىڭ ەۋرودان استام قارجى. پوليسەيلەرمەن قاتار، مەگاپوليستە 800 اسكەري قىزمەتكەر ەرەجەلەردىڭ ساقتالۋىن باقىلايتىن بولادى.
جۇڭگو 18 جاسقا دەيىنگى بالالارعا ەكپە سالۋدى بەلسەندى تۇردە جۇرگىزىپ جاتىر. كوروناۆيرۋستىق ۆاكسينانىڭ 60 ميلليوننان استام دوزاسى 12 جاستان 17 جاسقا دەيىنگى جۇڭگو جاسوسپىرىمدەرىنە ۇلەستىرىلدى. بۇل تۋرالى قحر ۇلتتىق دەنساۋلىق ساقتاۋ كوميسسياسى حابارلادى. ۆاكسيناسيا Sinovac جانە Sinopharm پرەپاراتتارىمەن جاسالدى. Sinopharm فارماسيەۆتيكالىق كونسەرنى ءوزىنىڭ ۆاكسيناسىن ءۇش جاستان اسقان بالالارعا سىناۋدىڭ ءبىرىنشى كەزەڭىن وتكىزىپ ۇلگەردى جانە سابيلەرگە ارنالعان پرەپارات ءقاۋىپسىز دەپ مالىمدەدى.
يزرايل پرەمەر-مينيسترى نافتالي بەننەت 50 جاستان اسقان تۇرعىنداردى تەزىرەك ۇدەتكىش ۆاكسينا جاساپ، Pfizerء-دىڭ ءۇشىنشى دوزاسىمەن ۆاكسيناسيالاۋعا شاقىردى. ۆاكسيناسيا قارقىنىن توقتاتپاۋ ءۇشىن بەننەت ۆاكسيناسيا ورتالىقتارى شابات ءدىني راسىمىنە قاراماستان، تاۋلىك بويى، اپتاسىنا جەتى كۇن جۇمىس ىستەيتىنىن ايتتى. سەنبىدە ءدىني داستۇرلەر بويىنشا ەۆرەيلەرگە جۇمىستان باس تارتۋعا نۇسقاۋ بەرىلەدى.