قۇتتىقتاۋ جەدەلحاتتارى ءالى دە تولاستار ەمەس.
پرەزيدەنت قاسىم-جومارت توقايەۆتىڭ اتىنا رەسپۋبليكا كۇنىنە وراي شەت مەملەكەتتەر مەن حالىقارالىق ۇيىمدار باسشىلارىنان قۇتتىقتاۋ جەدەلحاتتارى كەلىپ جاتىر، دەپ حابارلايدى Almaty-akshamy.kz اقورداعا سىلتەمە جاساپ.
تۇركيا پرەزيدەنتى رەجەپ تاييپ ەردوعان قاسىم-جومارت توقايەۆ پەن باۋىرلاس قازاقستان حالقىن ۇلتتىق مەرەكەمەن قۇتتىقتاپ، ەلىمىزگە باق-بەرەكە تىلەدى.
«ءتىل، تاريح جانە مادەنيەت سياقتى ورتاق قۇندىلىقتارىمىزعا نەگىزدەلگەن قارىم-قاتىناسىمىز ستراتەگيالىق سەرىكتەستىك رۋحىندا قارقىندى دامىپ كەلەدى. ەكى ەلدىڭ ىنتىماقتاستىعى جاڭا سالالارمەن تولىعا تۇسكەنى قۋانتادى. ءبىزدىڭ بىرلەسكەن كۇش-جىگەرىمىزدىڭ ناتيجەسىندە تۇركيا مەن قازاقستان اراسىنداعى بايلانىستار ودان ءارى نىعايا بەرەتىنىنە سەنىمدىمىن. سىزبەن استانا قالاسىندا وتەتىن تۇركى مەملەكەتتەرى ۇيىمىنىڭ ح سامميتىندە كەزدەسەتىنىمە قۋانىشتىمىن»، – دەلىنگەن جەدەلحاتتا.
سلوۆاكيا پرەزيدەنتى زۋزانا چاپۋتوۆا مەملەكەت باسشىسىنا تۇراقتى، ادىلەتتى جانە باقۋاتتى قازاقستاندى دامىتۋعا باعىتتالعان رەفورمالاردى ىسكە اسىرۋدا تابىس تىلەدى. سونداي-اق ول حالىقارالىق قۇقىق قاعيداتتارىن قۇرمەتتەۋگە نەگىزدەلگەن ءوزارا ىنتىماقتاستىقتىڭ ناتيجەسىندە ەلدەرىمىز قازىرگى زاماننىڭ سىن-قاتەرلەرىن بىرگە ەڭسەرەتىنىنە سەنىم ءبىلدىردى.
سەربيا پرەزيدەنتى الەكساندر ۆۋچيچ ءوزىنىڭ جەدەلحاتىندا ەكى ەل اراسىنداعى ءوزارا قۇرمەت پەن تۇسىنىستىككە قۇرالعان ءداستۇرلى دوستىق قاتىناستاردىڭ نىعايىپ كەلە جاتقانىن اتاپ ءوتتى. الەكساندر ۆۋچيچ سەربيا جانە قازاقستاننىڭ مۇددەسى مەن يگىلىگى جولىنداعى ءوزارا ىقپالداستىق الداعى ۋاقىتتا دا كەڭەيەدى دەپ سەنەتىنىن جازعان.
سونىمەن قاتار ءوز قۇتتىقتاۋلارىن ليتۆا پرەزيدەنتى گيتاناس ناۋسەدا، تمد پارلامەنتارالىق اسسامبلەياسى كەڭەسىنىڭ باس حاتشىسى دميتريي كوبيسكيي، اوسشك باس حاتشىسى قايرات سارىباي، ۇقشۇ باس حاتشىسى يمانعالي تاسماعامبەتوۆ جانە باسقالار جولدادى.