جاتتىقتىرۋشىلار مەن جەكە باپكەرلەر، دارىگەرلەر، ماسساج جاساۋشىلار جانە باسقا ماماندار 1 مىڭنان 15 مىڭ اقش دوللارى كولەمىندە سىياقى الدى
31 مامىر كۇنى الماتىدا بوكستان ەرلەر مەن ايەلدەر اراسىنداعى الەم چەمپيوناتىنىڭ جەڭىمپازدارى مەن جۇلدەگەرلەرىن ماراپاتتاۋ ءراسىمى ءوتتى. سپورتشىلار مەن باپكەرلەر قازاقستان بوكس فەدەراسياسىنىڭ پرەزيدەنتى كەڭەس راقىشيەۆتىڭ جەكە قارجىسىنان اقشالاي سەرتيفيكات الدى، دەپ حابارلايدى Almaty-akshamy.kz.
تاشكەنتتە الەم چەمپيونى اتانعان سانجار تاشكەنباي، ماحمۇد سابىرحان، اسلانبەك شىمبەرگەنوۆ جانە نۇربەك ورالباي 100 مىڭ اقش دوللارىمەن ماراپاتتالسا، كۇمىس جۇلدەگەر دۋلات بەكباۋوۆقا 50 مىڭ اقش دوللارى بەرىلدى.
سونىمەن قاتار، راقىشيەۆ مىرزا دۋلاتقا قىمبات شۆەيسار ساعاتىن دا سىيلادى.
بۇل كۇنى نازىك جاندى بوكسشىلارىمىز دا ماراپاتتالدى. نيۋ-دەليدە وتكەن الەم بىرىنشىلىگىنىڭ فيناليستەرى كارينا يبراگيموۆا مەن لياززات كۇنگەيبايەۆا وتاندىق بوكس باسشىسىنان 30 مىڭ اقش دوللارىن الدى.
قولا جۇلدەگەرلەر: الۋا بالقىبەكوۆا، ۆالەنتينا حالزوۆا جانە فاريزا شولتاي 10 مىڭ اقش دوللارى كولەمىندەگى سىيعا يە بولدى.
قۇرامامىزدىڭ جەڭىسكە جەتۋىنە زور ۇلەسىن قوسىپ جۇرگەن كوماندا وكىلدەرى – باپكەرلىك قۇرام، كەڭەسشىلەر، كەشەندى عىلىمي توپ مۇشەلەرى دە نازاردان تىس قالمادى.
شتاتتاعى جاتتىقتىرۋشىلار مەن جەكە باپكەرلەر، دارىگەرلەر، ماسساج جاساۋشىلار جانە باسقا ماماندار 1 مىڭنان 15 مىڭ اقش دوللارى كولەمىندە سىياقى الدى.
«الەم چەمپيوناتى كەزىندە بىزگە ىستىق قولداۋ كورسەتكەن بۇكىل قازاقستان حالقىنان تاعى دا العىس ايتامىن. فەدەراسيا، كوماندا ءۇشىن بۇل - ۇلكەن مارتەبە. ءبىز ءارقاشان سەنىمدى اقتاۋعا تىرىسامىز. ءقازىر قازاقستان قۇراماسى الەمدىك بوكس رەيتينگىندە كوش باستاپ تۇر. مەملەكەت باسشىسى قاسىم-جومارت توقايەۆ چەمپيوندارىمىزدى العاشقىلاردىڭ ءبىرى بولىپ قۇتتىقتادى. ەلگە ورالعاننان كەيىن بوكسشىلاردى اقوردادا قابىلداپ، ماراپاتتادى. بۇل ەڭبەگىمىزدىڭ ەلەنگەنىن، باعالانعانىن بىلدىرەدى. بۇگىنگى ءىس-شارامىز ەرەكشە ەكەنىن ايتىپ وتەيىن. ويتكەنى، ءبىز سپورتشىلار مەن باپكەرلەردى عانا ەمەس، العاشقى رەت چەمپيوندارىمىزدىڭ انالارىن دا ماراپاتتاپ وتىرمىز. بۇدان بىلاي بۇل داستۇرگە ەنەدى دەپ ويلايمىن. الىپ انادادان تۋادى، سوندىقتان اق انالارىمىزعا ۇلكەن العىس ايتامىن»، - دەدى قۇتتىقتاۋ سوزىندە كەڭەس راقىشيەۆ.
ەلىمىزدىڭ بىرنەشە قالاسىنان ارنايى كەلگەن چەمپيونداردىڭ انالارىنا كەڭەس راقىشيەۆ گۇل مەن 2 ميلليون تەڭگەنىڭ سەرتيفيكاتىن سىيلادى.
وزبەكستان استاناسىنداعى تاماشا ناتيجە ءۇشىن ەرلەر قۇراماسىنىڭ باس جاتتىقتىرۋشىسى مىرزاعالي ايتجانوۆقا 25 مىڭ اقش دوللارىنا قوسا، قبف كولىك مىڭگىزدى.
جەكەلەي سىيلىقتاردى ەسەپتەمەگەندە، ماراپاتتاۋدىڭ جالپى جۇلدە قورى - 600 مىڭ اقش دوللارى.