الەكساندر بۋبليك رولان گارروس ءتۋرنيرىنىڭ ەكىنشى اينالىمىنا شىقتى

قازاقستاندىق-اۋستراليالىق جۇپ ءبىرىنشى پارتيادا برەيك جاساپ، سول باسىمدىلىقتى ساقتادى

قازاقستاندىق الەكساندر بۋبليك جۇپتىق سىندا رولان گارروس ءتۋرنيرىنىڭ ەكىنشى اينالىمىنا شىقتى، دەپ حابارلايدى Almaty-akshamy.kz قازاقپاراتقا سىلتەمە جاساپ.

قازاقستاندىق تەننيسشى اۋستراليالىق تاناسي كوككيناكيسپەن بىرگە باستاپقى كەزدەسۋىن امەريكالىق ناتانيەل لاممونس - پولياك كاميل مايحشاكپەن وتكىزدى.

قازاقستاندىق-اۋستراليالىق جۇپ ءبىرىنشى پارتيادا برەيك جاساپ، سول باسىمدىلىقتى ساقتادى - 7:5.

ەكىنشى سەتتە دە تاعى ءبىر برەيكپەن ماچتى اياقتايتىنداي مۇمكىندىكتەرى بولدى. دەگەنمەن قارسىلاستارى تارازى باسىن تەڭەستىردى. تاي-برەيكتە بۋبليك پەن كوككيناكيس جەڭىستى جۇلىپ الدى - 7:6 (7:5).

ساعات جارىم ۋاقىتقا سوزىلعان ماچتا بۋبليك پەن كوككيناكيس 11 ەيس جاسادى.

ەندى ولار ەكىنشى اينالىمدا يتاليالىقتار سيمونە بولەللي - فابيو فونيني نەمەسە ماجارستاندىق مارتون فۋچوۆيچ - امەريكالىق فرەنسيس تيافو جۇپتارىنىڭ قاي جەڭگەنىمەن كەزدەسەدى.

تاعى ءبىر قازاقستاندىق الەكساندر نەدوۆەسوۆ جۇپتىق سىندا پاكستاندىق ايسام كۋرەشيمەن بىرگە تارتىستى وتكەن باسەكەدە امەريكالىقتار ماككەنزي ماكدونالد - توممي پولعا ەسە جىبەردى - 6:3، 2:6، 3:6.

ەسكە سالا كەتەيىك، بۇدان بۇرىن قازاقستاندىق تەننيسشىلەردىڭ رولان گارروس تۋرنيرىندە باستاپقى كەزدەسۋلەرىن ءساتتى وتكىزگەنىن، 13 جاسار زاڭعار نۇرلان ۇلىنىڭ ەۋروپا رەيتينگىسىندە بەس اي بويى كوش باستاپ كەلە جاتقانىن جازعان بولاتىنبىز.