مەملەكەت باسشىسىنىڭ قازاقستان حالقىنا جولداۋىنىڭ باستى قاعيداتتارى باياندالدى.
د.ا.قونايەۆ اتىنداعى زاڭ اكادەمياسىنىڭ قابىرعاسىندا پرەزيدەنت جولداۋىن تالقىلاۋعا ارنالعان القالى جيىن ءوتتى، دەپ حابارلايدى Almaty-akshamy.kz.
ءىس-شاراعا د.ا.قونايەۆ اتىنداعى زاڭ اكادەمياسىنىڭ رەكتورى ءومىرالى جالايري، زاڭ عىلىمىنىڭ دوكتورى ايتقوجين كوشەك ۇلى، پروفەسسور ەركىنبەك راقىمبايەۆ باستاعان وسى وقۋ ورنىنىڭ وقىتۋشىلارى، ستۋدەنتتەرى، ت.ب. جەتەكشى ماماندار قاتىستى.
جيىن بارىسىندا قازاقستان رەسپۋبليكاسىنىڭ پرەزيدەنتى ق.ك.توقايەۆتىڭ «ادىلەتتى مەملەكەت. ءبىرتۇتاس ۇلت. بەرەكەلى قوعام» اتتى جولداۋىنىڭ ءمان-ماڭىزى، حالىققا بەرەر پايداسى، قۇقىقتىق مەملەكەتكە اينالۋ ماسەلەسى، ازاماتتاردىڭ وي-پىكىرىنىڭ اشىق ءجۇرۋى، كونستيتۋسيالىق رەفورمالار، ت.ب. جايىندا كەڭىنەن ايتىلدى. مەملەكەت باسشىسىنىڭ قازاقستان حالقىنا جولداۋىنىڭ باستى قاعيداتتارى باياندالدى. ول تۋرالى د.ا.قونايەۆ اتىنداعى زاڭ اكادەمياسىنىڭ رەكتورى ءومىرالى جالايري ايتىپ ءوتتى.
– ەل پرەزيدەنتى قاسىم-جومارت توقايەۆتىڭ كەزەكتى جولداۋىن حالىق ىستىق ىقىلاسپەن قابىلدادى. ەندى الدىمىزدا جاڭا باستامالار كۇتىپ تۇر. ونى جۇزەگە اسىرۋ بارىمىزگە ورتاق شارۋا. سونداي-اق، قۇقىقتىق مەملەكەتكە اينالۋىمىز كەرەك. ەگەر وسىنى ىسكە اسىرساق، سوتتىڭ ادىلدىگى، زاڭداردىڭ ورىندالۋى سياقتى دۇنيەلەر بىرتىندەپ شىشىلە بەرمەك، – دەدى ول.
سونداي-اق، دۇنيەجۇزىندەگى ساياسي تاجىريبە، ونىڭ قوعامعا تيگىزەر اسەرى دە ايتىلماي قالعان جوق.
– ءبىز تاريحي كەزەڭگە اياق باستىق. ەلىمىزدەگى ساياسي وزگەرىستەردىڭ اۋقىمى كەڭ. بۇنداي وزگەرىستەر الەمدە بار تاجىريبە. بۇرىنعى پارلامەنت ءوز دەڭگەيىندە جۇمىس اتقارا المادى. سونىڭ ناتيجەسىندە قۇقىقتىق مەملەكەتكە اينالۋدىڭ جولدارى اشىق بولا قويعان جوق. سوندىقتان قۇقىقتىق-نورماتيۆتىك زاڭدار دۇرىس جۇمىس ىستەي المادى. ءالى كۇنگە دەيىن پرەزيدەنتتىڭ وكىلەتتىلىكتەرىنە بايلانىستى پارلامەنت جۇمىسىن ناقتىلاي جۇرگىزە المادىق. مەملەكەت باسشىسىنىڭ 7 جىلدىق مەرزىم دەگەنى وڭ وي. الداعى ۋاقىتتا وسى ماسەلەلەردى قۇقىقتىق جولمەن شەشە الساق، نۇر ۇستىنە نۇر بولماق، – دەدى ايتقوجين قابۋلساميح.
سونىمەن قاتار، جيىندا پارلامەنتتىك رەسپۋبليكاعا قاتىستى پىكىرلەر ايتىلدى. ونىڭ مەملەكەتكە بەرەر اسەرى ءسوز بولدى.
– الەمدەگى احۋال وزگەرىپ بارادى. كورشى قىرعىز ەلى پارلامەنتىك رەسپۋبليكا بولدى. ءبىراق وندا تولقۋلار ءوتىپ، تۇراقسىزدىقتار ورىن الدى. ولار قايتادان پرەزيدەنتتىك باسقارۋ رەجيمىنە قايتىپ كەلدى. ەگەر ءبىز دە پارلامەنتكە بار كۇشتى بەرسەك، قىرىق پىشاق بولىپ قالۋىمىز مۇمكىن. سوندىقتان پرەزيدەنتتىك باسقارۋ بولۋى قاجەت. ەڭ باستىسى، جەمقورلىقتى جويۋ شارت. بۇل – ۋاقىت كۇتتىرمەيتىن ماسەلە. دالىرەك ايتقاندا، بەيجاي قاراۋعا بولمايدى. مەيىلىنشە زاڭ ۇستەمدىگىن ءىس جۇزىندە جۇزەگە اسىرايىق، – دەدى زاڭ عىلىمىنىڭ دوكتورى ەركىن دۇيسەنوۆ.