قالعان 12 جوبا 2026 جىلدان باستاپ كەزەڭ-كەزەڭىمەن ەنگىزىلەتىن بولادى.
2025 جىلعا دەيىن 5 ۋنيۆەرسيتەتتىك جانە 3 كوپبەيىندى اۋرۋحانا سالىنادى. بۇل تۋرالى ۇكىمەت وتىرىسىندا ق ر دەنساۋلىق ساقتاۋ ءمينيسترى اجار عينيات ايتتى، دەپ حابارلايدى Almaty-akshamy.kz قازاقپاراتقا سىلتەمە جاساپ.
مەملەكەت باسشىسى قاسىم-جومارت توقايەۆ بەرگەن تاپسىرماسىندا دەنساۋلىق ساقتاۋ جۇيەسىنىڭ رەسۋرستارىن، اتاپ ايتقاندا، 20 اۋرۋحانانىڭ قۇنىن مەملەكەتتىك-جەكەمەنشىك ارىپتەستىك تەتىكتەرىن پايدالانا وتىرىپ، قايتا قاراۋ قاجەتتىگىن ەرەكشە اتاپ ءوتتى.
«كوپبەيىندى اۋرۋحانالار سالۋ بويىنشا رەسپۋبليكالىق مەملەكەتتىك-جەكەمەنشىك ارىپتەستىك جوبالارىنىڭ تىزبەسىن وڭتايلاندىرۋ ماقساتىندا دەنساۋلىق ساقتاۋ مينيسترلىگى قولدانىستاعى «دەنى ساۋ ۇلت» ۇلتتىق جوباسىن ىسكە اسىرۋ اياسىندا ءبىرىنشى كەزەڭدە 2025 جىلعا دەيىن 5 ۋنيۆەرسيتەتتىك اۋرۋحانا جانە 3 كوپبەيىندى اۋرۋحانا سالۋدى جۇزەگە اسىرۋدى جوسپارلاپ وتىر. بۇل رەتتە قالعان 12 جوبا 2026 جىلدان باستاپ كەزەڭ-كەزەڭىمەن ەنگىزىلەتىن بولادى»، - دەدى اجار عينيات.
ونىڭ اتاپ وتۋىنشە، بۇگىنگى تاڭدا يندۋستريا جانە ينفراقۇرىلىمدىق دامۋ، ۇلتتىق ەكونوميكا جانە قارجى مينيسترلىكتەرىمەن مەديسينالىق بۇيىمدارسىز اۋرۋحانا قۇرىلىسىنىڭ 1 شارشى مەترىنىڭ شەكتى قۇنىن جانە 1 توسەك-ورىنعا ارنالعان شەكتى الاڭ ءنورماتيۆىن ايقىنداۋ جۇمىسى جۇرگىزىلىپ جاتىر. سونداي-اق وڭتايلى قارجى مودەلىن پىسىقتاۋ جانە جوعارى اتالعان 8 جوبا بويىنشا شىعىستاردى وڭتايلاندىرۋدى قولعا الدى.
«جوعارىدا اتالعان تاپسىرمالار اۋرۋحانالاردى سالۋ جونىندەگى باعدارلامانى ىسكە اسىرۋدىڭ ءبىرىڭعاي ءتاسىلى مەن وڭتايلى نۇسقاسى جونىندە ۇسىنىستار ازىرلەۋگە مۇمكىندىك بەرەدى. ۋنيۆەرسيتەتتىك اۋرۋحانالاردى ىسكە اسىرۋدىڭ باسىمدىعى بارلىق قالعان جوبالاردى كادرلارمەن قامتاماسىز ەتۋ جانە ءبىلىم، عىلىم مەن پراكتيكانىڭ ءۇشتۇعىرلىعى قاعيداتىن ءىس جۇزىندە قولدانۋ قاجەتتىگىنەن تۋىندايدى»، - دەدى ول.