25 جوعارى وقۋ ورنىنىڭ ستۋدەنتتەرى Coursera پلاتفورماسىندا وقي الادى.
الداعى ءۇش جىلدا 100 مىڭ قازاقستاندىق ستۋدەنت پەن قولدانۋشى Coursera پلاتفورماسىندا ءبىلىمىن جەتىلدىرۋگە مۇمكىندىك الادى، دەپ حابارلايدى Almaty-akshamy.kz قازاقپاراتقا سىلتەمە جاساپ.
قازاقستاننىڭ عىلىم جانە جوعارى ءبىلىم مينيسترلىگىنىڭ باسپا ءسوز قىزمەتىنىڭ مالىمەتتەرىنە قاراعاندا، عىلىم جانە جوعارى ءبىلىم ءمينيسترى ساياسات نۇربەك پەن Coursera حالىقارالىق سەكتورىنىڭ ديرەكتورى مەتيۋ كليايننىڭ كەزدەسۋىندە وسى ماسەلە تالقىلاندى.
باسقوسۋعا ءبىلىم پلاتفورماسىنىڭ ايماقتىق سەرىكتەسىنىڭ وكىلى راۋان كەنجەحان ۇلى قاتىستى.
ءىس-شارادا تاراپتار بۇعان دەيىن عىلىم جانە جوعارى ءبىلىم مينيسترلىگى، سيفرلىق دامۋ، يننوۆاسيا جانە اەروعارىش ونەركاسىبى مينيسترلىگى جانە Coursera كومپانياسى اراسىندا قول قويىلعان ءۇشجاقتى مەموراندۋمنىڭ جۇزەگە اسىرىلۋ بارىسىن تالقىلادى.
«ايماقتاعى 25 جوعارى وقۋ ورنىنىڭ ستۋدەنتتەرى Coursera پلاتفورماسىندا وقي الادى. ولار پلاتفورماداعى كۋرستاردى تاڭداپ، قازاق نەمەسە ورىس تىلىندە ءبىلىمىن جەتىلدىرە الادى. ءساتتى وتكەن كۋرستار جوعارى وقۋ ورىندارىندا كرەديت بولىپ ەسەپتەلەدى. ءقازىردىڭ وزىندە 50 كۋرستى بەيىمدەۋ جانە اۋدارۋ جۇمىستارى جۇرگىزىلۋدە. Coursera-مەن ىنتىماقتاستىق قازاقستاندىق جوعارى وقۋ ورىندارىنىڭ الەۋەتىنە وڭ اسەر ەتەدى دەپ ويلايمىز»، – دەدى ساياسات نۇربەك.
ءتارجىمالانعان العاشقى 50 كۋرس 2023 جىلدىڭ قاڭتارىنا قاراي دايىن بولادى، سوسىن كەلەشەكتە جوو-نىڭ تالاپ-تىلەگى مەن سۇرانىسىنا قاراي جىل سايىن كەمىندە 100 كۋرستى اۋدارۋ جوسپارلانعان. قازاقستاندىق وقىتۋشىلار ءوز كۋرستارىن Coursera پلاتفورماسىندا ورنالاستىرۋعا مۇمكىندىك الدى.
العاشقى 50 كۋرستىڭ تىزىمىنە نەگىزىنەن اقش-تىڭ جەتەكشى جوعارى وقۋ ورىندارىنىڭ ءبىلىم بەرۋ پلاتفورمالارى، سونداي-اق گونكونگ عىلىم جانە تەحنولوگيالار ۋنيۆەرسيتەتىنىڭ از بولىگى كىردى.
ەندى بەلگىلى پروفەسسور جەفري روبەرت چاسنوۆتىڭ ينجەنەرلەرگە ارنالعان ماتەماتيكا كۋرسىن نەمەسە كولورادو ۋنيۆەرسيتەتىنىڭ پورفەسسورى گرەگ ۋيليامستىڭ كيبەرشابۋىلدى انىقتاۋ بويىنشا ءبىلىم بەرۋ باعدارلاماسىن قازاق تىلىندە تىڭداۋعا بولادى.
Coursera – الەمنىڭ الدىڭعى قاتارلى 250 ۋنيۆەرسيتەتى مەن تەحنولوگيا الىپتارىن بىرىكتىرەتىن دۇنيە جۇزىندەگى اسا ءىرى ءبىلىم بەرۋ ۇيىمى. جىل سايىن Coursera پلاتفورماسىندا الەمنىڭ 200 ەلىنەن 100 ميلليوننان استام ادام وقيدى.
اتاپ وتەيىك، قازاقستانداعى Coursera قولدانۋشىلارىنىڭ سانى 361 مىڭ ادامعا جەتتى.