الەۋمەتتىك ماڭىزدى كورسەتكىشتەردىڭ مولشەرى ارتتى.
30 قاراشا كۇنى زەينەتاقى جيناقتارىنىڭ 2023 جىلعا بەلگىلەنگەن ەڭ تومەنگى جەتكىلىكتىلىك شەگى جاريالاندى، دەپ حابارلايدى Almaty-akshamy.kz Inbusiness.kz سايتىنا سىلتەمە جاساپ.
جەتكىلىكتىلىك شەگى جاس ەرەكشەلىكتەرىنە قاراي 3 ملن-نان 10 ملن تەڭگەگە دەيىنگى سومانى قۇرايدى. مىسالى، 20 جاستاعىلار ءۇشىن ەڭ تومەنگى جەتكىلىكتىلىك شەگى 3 140 000 تەڭگەدەن 3 260 000 تەڭگەگە دەيىن، 30 جاستاعىلار ءۇشىن – 4 370 000 تەڭگەدەن 4 580 000 تەڭگەگە دەيىن، 40 جاستاعىلار ءۇشىن – 5 790 000 تەڭگەدەن 6 100 000 تەڭگەگە دەيىن ۇلعايدى.
2022 جىلعى 1 جەلتوقسانداعى جاعداي بويىنشا، بجزق سالىمشىلاردىڭ (الۋشىلاردىڭ) تۇرعىن ءۇي جاعدايلارىن جاقسارتۋ ءۇشىن زەينەتاقى جيناقتارىن پايدالانۋ تۋرالى 1 340 016 ءوتىنىشىن ورىندادى. بانكتەردە اشىلعان قازاقستاندىقتاردىڭ ارنايى شوتتارىنا – ۋاكىلەتتى وپەراتورعا بجزق شامامەن 3،2 ترلن تەڭگە قاراجات اۋداردى. ايتا كەتۋ كەرەك، سالىمشىلاردىڭ جەكە زەينەتاقى شوتتارىنا 458 ملرد تەڭگەدەن استام قاراجات قايتارىلدى. ويتكەنى ءبىرجولعى زەينەتاقى تولەمدەرىن قازاقستاندىقتار زاڭنامادا بەلگىلەنگەن مەرزىمدە نە ءوتىنىش بەرۋشىنىڭ ءوتىنىشى بويىنشا جانە وزگە دە سەبەپتەر بويىنشا پايدالانباعان. بۇدان بولەك بجزق جالپى سوماسى 314،9 ملرد تەڭگەگە ەمدەلۋگە بەرىلگەن 398 875 ءوتىنىشتى ورىندادى. بجزق-عا 32،1 ملرد تەڭگە قارجى قايتارىلدى.
ەڭ تومەنگى جەتكىلىكتىلىك شەگىن ەسەپتەۋ ادىستەمەسى ۇكىمەتتىڭ قاۋلىسىمەن بەكىتىلگەن. وعان سايكەس، ەڭ تومەنگى جەتكىلىكتىلىك شەگىنىڭ مولشەرى ءار جاس ءۇشىن جىل سايىن قايتا قارالىپ، بولاشاق زەينەتاقى تولەمدەرى مەن زەينەتاقى جارنالارىنىڭ ءوسۋى ەسكەرىلەدى.
وسى تۇستا ەڭ تومەنگى جالاقى، زەينەتاقىنىڭ ەڭ تومەنگى مولشەرى، ەڭ تومەنگى كۇنكورىس دەڭگەيى سەكىلدى الەۋمەتتىك كورسەتكىشتەر قولدانىلادى. 2023 جىلى ەڭ تومەنگى جالاقى 70 000 تەڭگە، زەينەتاقىنىڭ ەڭ تومەنگى مولشەرى – 53 076 تەڭگە، مەملەكەتتىك بازالىق زەينەتاقى تولەمىنىڭ ەڭ تومەنگى مولشەرى – 24 341 تەڭگە، ەڭ تومەنگى كۇنكورىس دەڭگەيى 40 567 تەڭگە بولىپ بەلگىلەندى. ەڭ تومەنگى جەتكىلىكتىلىك شەگىن ەسەپتەۋ كەزىندە ەسكەرىلەتىن باسقا دا الەۋمەتتىك ماڭىزدى كورسەتكىشتەردىڭ مولشەرى ارتتى.