جەتىسۋ پوليسەيلەرى بارىمتاشىلىقپەن كۇرەستى كۇشەيتىپ جاتىر

باسقا ايماقتارعا قاراعاندا، الماتى وبلىسىندا مال ۇرلىعى كوپ ورىن الادى.

الماتى وبلىسىنىڭ پوليسەيلەرى مال ۇرلىعىنا قارسى كۇرەستى كۇشەيتىپ جاتىر، دەپ حابارلايدى Almaty-akhamy.kz.

ىشكى ىستەر مينيسترلىگىنىڭ رەسمي سايتىنداعى مالىمەت بويىنشا، الماتى وبلىسى مال شارۋاشىلىعى دامىعان وڭىرلەردىڭ بىرىنە جاتادى. سوندىقتان، باسقا ايماقتارعا قاراعاندا، وبلىستا مال ۇرلىعى كوپ ورىن الۋدا.

«الماتى وبلىسى پد مال ۇرلىعىنىڭ الدىن الۋ جانە ونى اشۋ مىندەتى ءبىرىنشى كەزەككە قويىلعان. اتالعان باعىتتا اتقارىلعان جۇمىستىڭ ناتيجەسىندە سوڭعى بەس جىل ىشىندە الماتى وبلىسى بويىنشا مال ۇرلىعى دەرەكتەرىنىڭ تىركەلۋ سانىنىڭ تومەندەۋىن بايقاۋعا بولادى. جەدەل ىزدەستىرۋ ءىس-شارالارىن جۇرگىزۋدىڭ ناتيجەسىندە جىل باسىنان 20 قىلمىستىق توپ ۇستالىپ، ولاردىڭ 30 شاقتى قىلمىسقا قاتىستىلىعى دالەلدەندى. سونىڭ ىشىندە، اتاپ ايتاتىن بولساق، اعىمداعى جىلى قۇرامىندا بەس ادام بار قىلمىستىق توپ ۇستالدى، ولارمەن 60-تان اسا جىلقى ۇرلانعان. ولار ۇرلانعان جىلقىلاردى شىعىس قازاقستان وبلىسىنا تاسىمالداعان، قازىرگى تاڭدا جىلقىلاردىڭ جارتىسىنان كوبى تابىلىپ، يەلەرىنە قايتارىلدى»، – دەدى الماتى وبلىسى پد كپب اعا جەدەل ۋاكىلى اسكار بايگۋدانوۆ.

2020 جىلدىڭ 11 اقپانىنان باستاپ ق ر قىلمىستىق كودەكسىندە مال ۇرلىعى بويىنشا ارنايى باپ (188-1) ەنگىزىلىپ، وعان قولدانىلاتىن جازا قاتاڭداتىلدى.

«2020 جىلدىڭ قورىتىندىسى بويىنشا، 937 مال ۇرلىعى دەرەگى بويىنشا قىلمىستىق ءىس قوزعالدى، سونىڭ ىشىندە 213 دەرەك بويىنشا مالدار تابىلىپ، يەلەرىنە قايتارىلدى. جىلدىڭ باسىنان اتالعان باپ بويىنشا 6311 قۇقىق بۇزۋشىلىق انىقتالىپ، 345 تۇلعاعا 5 ملن. 164 مىڭ 549 تەڭگە ايىپپۇل سالىندى»، – دەپ تۇيىندەدى ءسوزىن اسكار بايگۋدانوۆ.