سەناتتا 3 جىلدىق بيۋدجەتكە ەنەتىن تۇزەتۋلەر تالقىلاندى.
ونىڭ ىشىندە «رەسپۋبليكالىق جانە وبلىستىق بيۋدجەتتەر، رەسپۋبليكالىق ماڭىزى بار قالالاردىڭ، استانانىڭ 2023-2025 جىلدارعا ارنالعان بيۋدجەتتەرى اراسىنداعى جالپى سيپاتتاعى ترانسفەرتتەردىڭ كولەمى تۋرالى» زاڭ جوباسى بار، دەپ حابارلايدى Almaty-akshamy.kz.
بولجام بويىنشا وڭىرلەردىڭ كىرىستەرى 2025 جىلى 6،1 ترلن تەڭگەگە دەيىن، نەمەسە 30 پايىزعا ارتىپ، 2025 جىلعا وزىندىك كىرىستەر ۇلەسى 47 پايىزعا دەيىن وسپەك. زاڭ جوباسىن تالقىلاۋ بارىسىندا ەڭ الدىمەن، قازىرگى كەزدەگى بيۋدجەتارالىق قولدانىستاعى ادىستەمەنى جەتىلدىرۋ ماسەلەسى ايتىلدى. ويتكەنى وڭىرلەردىڭ الەۋمەتتىك-ەكونوميكالىق پارامەترلەرىندە الشاقتىق بار. سەنات وتىرىسىنا ۇكىمەت باسشىسى ءاليحان سمايىلوۆ تا قاتىسىپ، ءوندىرىس كولەمىن ۇلعايتۋ جانە يمپورتتى الماستىرۋ بويىنشا جۇرگىزىلىپ جاتقان جۇمىستار جايلى باياندادى.
جالپى سوماسى 25 تريلليون تەڭگەنى قۇرايتىن 730-عا جۋىق جوبانى جۇزەگە اسىرۋ جوسپارلانىپ وتىرعانىن، ونىڭ ىشىندە 440 جوبا يمپورتتى الماستىرۋعا باعىتتالعانىن ايتتى. بۇدان كەيىن وڭىرلەرگە قارجىلىق دەربەستىك بەرۋ، بيۋدجەتتىك پروسەستەردىڭ اشىقتىعىن قامتاماسىز ەتۋ جانە ءوڭىر باسشىلارىنىڭ قارجىلىق ماسەلەلەردەگى جاۋاپكەرشىلىگىن ارتتىرۋ ماقساتىندا قولدانىستاعى سالىق جانە بيۋدجەت زاڭناماسىنا وزگەرىستەر ەنگىزۋ جايى تالقىلاندى. وسىعان قاتىستى دەپۋتاتتاردان بىرنەشە ۇسىنىس ءتۇسىپ، زاڭ جوباسى وزگەرىستەر ەنگىزۋ ءۇشىن قايتادان ماجىلىسكە جىبەرىلدى.