باعدات مۋسين الماتىلىقتارمەن كەزدەستى.
سيفرلىق دامۋ، يننوۆاسيالار جانە اەروعارىش ونەركاسىبى مينيسترلىگى الداعى 5 جىلدا قالانىڭ 75%-ىن 5G جەلىسىمەن قامتۋدى كوزدەپ وتىر. بۇگىندە 5G بازالىق ستانساسى شاھاردىڭ 5 جەرىندە ورناتىلعان. سونداي-اق مينيسترلىك مەملەكەتتىك قىزمەتتەردى پرواكتيۆتى فورماتقا كوشىرۋدى مىقتاپ قولعا العان. بۇگىن ۆەدومستۆو باسشىسى باعدات مۋسين الماتىلىقتارمەن كەزدەسىپ، جۇرتتىڭ ساۋالىن تىڭدادى، دەپ حابارلايدى Almaty-akshamy.kz Almaty.tv cىلتەمە جاساپ.
الماتى حالقىمەن كەزدەسكەن باعدات مۋسين سيفرلاندىرۋ سالاسىندا اتقارىلىپ جاتقان جۇمىستاردى باياندادى. سوزىنشە، مەملەكەتتىك قىزمەتتەردىڭ 94%-ى ەلەكتروندى فورماتقا اۋىسقان. بىرنەشە پلاتفورمادا 20 ءتۇرلى سيفرلى قۇجات الۋعا بولادى. ەندى ەلىمىز پرواكتيۆتى جۇمىس باعىتىنا كوشۋى ءتيىس. ياعني بۇدان بىلاي ازامات مەملەكەتتىك قىزمەتتەردى الۋ ءۇشىن ءار جەرگە بارىپ، تابان توزدىرمايدى، كەرىسىنشە سيفرلىق قىزمەتتەر ادامعا باعىتتالادى.
"وسىنداي فورماتقا 26 پرواكتيۆتى قىزمەتتى ەنگىزىپ جاتىرمىز. ءبىزدىڭ باستى ماقساتىمىز - كەلەسى 7 جىلدىققا سيفرلىق مەملەكەتتىك قىزمەتتەردى 90% اۆتوماتتاندىرۋ ەمەس، 90% پرواكتيۆتى فورماتقا كوشىرۋ"، - دەدى مينيستر.
بيىل قالانىڭ حالىققا قىزمەت كورسەتۋ ورتالىقتارى 2 ملننان استام قىزمەت كورسەتكەن. ەگەر پرواكتيۆتى فورماتقا كوشۋ ءساتتى جۇرسە، 7 جىلدان كەيىن جۇرت حالىققا قىزمەت كورسەتۋ ورتالىقتارىنا كەلىپ اۋرە بولمايدى. سونداي-اق ۆەدومستۆو باسشىسى بيىل قۇقىق قورعاۋ ورگاندارىمەن جۇمىس ىستەۋگە ارنالعان «ە-وتىنىش» پلاتفورماسىن ىسكە قوسقان.
ءمينيستردىڭ ايتۋىنشا، وندا ازاماتتار سمارتفون ارقىلى ارىز بەرىپ، سوتتىڭ شەشىمىنە قاتىستى ءوز تالابىن جىبەرە الادى. سول سياقتى كوممۋنالدىق تۇرعىن ءۇي باعىتى دا وڭتايلاندىرىلادى. ماسەلەن، پاتەر ساتىلعان كەزدە ونىڭ كوممۋنالدىق تولەمدەرىن جاڭا يەسىنە اۋىستىرۋدى تەزدەتەتىن ءتيىمدى ءتاسىل قاراستىرىلىپ جاتىر.
"نوتاريۋس قول قويعان كەزدە ءسىزدىڭ قۇجاتقا ءبىز سول اقپاراتتى ءسىزدىڭ كەلىسىمىڭىزدى الىپ، سودان كەيىن بارلىق كۆيتانسيالاردى بەرۋشى، ياعني كوممۋنالدى قىزمەتشىلەرگە جىبەرەمىز. ولار سونى اۆتوماتتى تۇردە اۋىستىراتىن بولادى"، - دەدى باعدات مۋسين.
"وسىلايشا مىڭ سان قىزمەتتى بارىپ، الۋ كەرەك دەپ باس قاتىرمايتىن بولامىز" دەگەن باعدات مۋسين ءوز بايانداماسىنان كەيىن جيىلعان جۇرتتىڭ سۇراعىنا جاۋاپ بەردى.
"ءبىزدىڭ ەلدە، شىنى كەرەك، 4Gء-دىڭ وزىنە قول جەتكىزۋ قيىنداۋ. سوندىقتان 5G تۋرالى ءسوز قىلۋ قانشالىقتى دۇرىس؟ بۇل جەلىنىڭ قۇنى دا قىمبات بولاتىنى انىق. سوندىقتان بۇل قازاقستانعا كەرەك پە؟ ويتكەنى بايلانىس وپەراتورلارى 4G ءۇشىن كۇن سايىن باعالارىن ءوسىرىپ جاتىر"، - دەپ ساۋالىن جولدادى قالا تۇرعىنى.
"ءبىز عالامدىق تەندەنسيالاردان ارتتا قالماۋىمىز كەرەك. 5G عالامتورداعى ەڭ وزىق قىزمەتتەردى ۇسىنۋعا مۇمكىندىك اشادى. الەمدە ونىڭ كومەگىمەن ماشينالار جۇرگىزۋشىسىز جۇمىس ىستەپ جاتىر. وپەراتورلار اراسىندا كۇشتى باسەكەنى تۋدىرۋ ءۇشىن بايلانىس ينفراقۇرىلىمىن جاقسارتىپ وتىرۋىمىز كەرەك. باسەكە بولعان كەزدە عانا ساپا مەن باعا دا رەتتەلەدى"، - دەپ جاۋاپ بەردى مينيستر.
ەندى ءبىرى ۇيلەرگە گاز كىرگىزۋ جۇمىسىن حالىققا قىزمەت كورسەتۋ ورتالىعىنا جۇكتەۋدى سۇرادى. ويتكەنى كوگىلدىر وتىندى تارتۋ مەرزىمى جارتى جىلعا دەيىن سوزىلىپ كەتەدى.
"3 ايدان 6 ايعا دەيىن گاز كىرگىزە الماي وتىرمىز. سونى حقكو-عا جۇكتەسەڭىزدەر، وتە جاقسى بولار ەدى"، - دەدى ول.
"وسى نارسەنى ءبىز جاقسارتساق، حقكو-عا كىرگىزسەك، الماتىعا كەلگەنىمىز بەكەر بولعان جوق دەسەك بولادى. «قازترانسگاز ايماقپەن» كەلىسىپ، وسىنى جارتى جىلدا جاساپ تاستايىق. «قازترانسگاز ايماقتىڭ» جاڭا جەتەكشىسى قارسى بولمايدى دەپ ويلايمىن. ولارمەن مەموراندۋمعا قول قويىپ، ول سول كومپانيانىڭ قىزمەتى بولسا دا حقكو-عا كىرگىزۋ كەرەك"، - دەپ ءسوزىن اياقتادى مۋسين.
ايتا كەتەيىك، پرەزيدەنت «ورتالىق اتقارۋشى ورگانداردىڭ باسشىلارىن حالىقپەن كەزدەسۋ وتكىزۋگە» مىندەتتەگەن. باعدات مۋسين سول جارلىقتىڭ اياسىندا الماتىدان بولەك، ەلىمىزدىڭ 4 وڭىرىنە بارعان بولاتىن.