«الاتاۋ» ءداستۇرلى ونەر تەاترى كورەرمەندەرگە جاڭا قويىلىمدار دايىنداۋدا. ولاردىڭ قاتارىندا ۇلى اقىن، فيلوسوف اباي قۇنانباي ۇلىنىڭ 180 جىلدىعىنا جانە كورنەكتى كومپوزيتور نۇرعيسا تىلەندييەۆتىڭ 100 جىلدىعىنا ارنالعان سپەكتاكلدەر بار، دەپ حابارلايدى aqshamnews.kz
سونداي-اق، الداعى پرەمەرالاردىڭ ءبىرى – ماڭگىلىك ماحاببات تۋرالى اڭىزعا اينالعان وقيعانى باياندايتىن «ەستايدىڭ قورلانى» مۋزىكالىق دراماسى. بۇل قويىلىمداردىڭ تۇساۋكەسەرى 2025 جىلدىڭ كۇزىنە جوسپارلانعان.
قازىرگى VIII ماۋسىمدا تەاتر رەپەرتۋارى ءتورت جاڭا قويىلىممەن تولىقتى: «Mamluk. سۇلتان بەيبارىس» ساۋندراماسى، QULAN فەەرياسى، Alatau FM radiosy مۋزىكالىق كومەدياسى جانە قازاقتىڭ ايگىلى كومپوزيتورى، اقىنى، ايتىس شەبەرى ءبىرجان سال قوجاعۇل ۇلىنىڭ اندەرىنە نەگىزدەلگەن «تەمىرتاس» رەكۆيەم-سپەكتاكلى.
«تەاتر رەپەرتۋارىنان قىزىقتى ساۋندرامالاردى، جارقىن فەەريالاردى، مۋزىكالىق كومەديالاردى جانە رەكۆيەم-سپەكتاكلدەردى كورۋگە بولادى. بۇل باتىل ەكسپەريمەنتتەر ءبىزدىڭ ترۋپپامىزعا جاڭا كوكجيەكتەردى اشىپ، كورەرمەندەرگە ەرەكشە تەاترلىق اسەر سىيلايدى، ءداستۇرلى تەاتردىڭ شەكاراسىن كەڭەيتەدى. ايتا كەتەرلىگى، وتكەن جىلى تەاتر ساحناسىندا 50-دەن استام قويىلىم قويىلىپ، كورەرمەندەر كوبەيىپ، مازمۇندى مادەني باعدارلاما جاسالدى. جالپى، 2024 جىلى ءبىزدىڭ سپەكتاكلدەرىمىزدى 62 مىڭ ادام تاماشالادى – بۇل سوڭعى ءۇش جىلداعى رەكوردتىق كورسەتكىش»، – دەپ مالىمدەدى تەاتر ديرەكتورى ماقسات نۇرالييەۆ وڭىرلىك كوممۋنيكاسيالار قىزمەتىنىڭ بريفينگىندە.
«الاتاۋ» تەاترىنىڭ قويىلىمدارى 20-دان استام ۇلتتىق اسپاپتا شەبەر وينايتىن «الاتاۋ» ەتنو-فولكلورلىق ءانسامبلىنىڭ جاندى سۇيەمەلدەۋىمەن وتەدى. ترۋپپا قۇرامىندا «الاتاۋ» بي ءانسامبلى، اقىندار، ءداستۇرلى ءان ورىنداۋشىلارى مەن تالانتتى اكتەرلەر بار.
