«الاتاۋ» ءداستۇرلى ونەر تەاترى تەاتر الەمىندەگى بەدەلدى بايقاۋلاردىڭ ءبىرى - چەحوۆ فەستيۆالىنە جولداما الدى، دەپ حابارلايدى aqshamnews.kz
وندا شىعارماشىلىق ۇجىم ساۋندراما جانرىنداعى «Mamluk. سۇلتان بەيبارىس» قويىلىمىن ساحنالايدى. بۇل تۋرالى تەاتر ديرەكتورى ماقسات نۇرالييەۆ وڭىرلىك كوممۋنيكاسيالار قىزمەتىنىڭ بريفينگىندە مالىمدەدى.
«ءبىزدىڭ تەاتر ءۇشىن وسىنداي ماڭىزدى ءىس-شارادا قازاق تەاتر ونەرىن كورسەتۋ – زور جەتىستىك. مەن «Mamluk. سۇلتان بەيبارىس» سپەكتاكلىنە ءوز جانىن سالعان دارىندى ارتىستەرىمىزدى، رەجيسسەرلارىمىزدى، مۋزىكانتتارىمىزدى، جالپى بارلىق شىعارشاشىلىق قۇرامدى ماقتان تۇتامىن»، - دەدى ماقسات نۇرالييەۆ.
سونداي-اق، تەاتر ترۋپپاسىن فرانسياداعى اۆينون فەستيۆالىنە «التىباقان» پرەمەرالىق سپەكتاكلىمەن شاقىرۋى مۇمكىن. ايتا كەتەرلىگى، «الاتاۋ» تەاترى سوڭعى جىلدارى حالىقارالىق قاتىناس باعىتىنداعى جۇمىستى بەلسەندى دامىتۋدا. 2024 جىلى تەاتر ارتىستەرى قىتايدا ونەر كورسەتتى، سونداي-اق الماتى اكىمدىگىنىڭ قولداۋىمەن جەتەكشى شەتەلدىك مادەني ورتالىقتاردا وقۋدان ءوتتى.
بيىل تەاتر نۇرعيسا تىلەندييەۆتىڭ 100 جىلدىعىنا جانە اباي قۇنانباي ۇلىنىڭ 180 جىلدىعىنا وراي تاريحي تۇلعالاردىڭ ءومىرى مەن شىعارماشىلىعىن دارىپتەيتىن جاڭا قويىلىمدار ۇسىنادى.