جاڭا شاعىناۋداندار، جاسىل ساياباقتار مەن سپورت الاڭدارى – الماتىنىڭ الاتاۋ اۋدانى قالاي وزگەرۋدە
الماتىداعى الاتاۋ اۋدانىنىڭ اكىمى ازامات قالدىبەكوۆ وڭىرلىك كوممۋنيكاسيالار قىزمەتىندە وتكەن بريفينگتە وسى اۋداندا قانداي تۇرعىن ءۇي كەشەندەرى مەن جاڭا ساياباقتار پايدا بولاتىنى، قاي اۋلالار مەن اۋماقتار اباتتاندىرىلاتىنى تۋرالى ايتتى، دەپ حابارلايدى Almaty-akshamy.kz.
ا. قالدىبەكوۆ قازىرگى ۋاقىتتا الاتاۋ اۋدانى جاڭا زاماناۋي تۇرعىن ءۇي كەشەندەرىمەن بەلسەندى تۇردە سالىنىپ جاتقانىن باسا ايتتى. كوپ پاتەرلى تۇرعىن ءۇي قورى 655 ءۇيدى قۇرايدى.
وتكەن جىلى اۋدانى 272 مىڭ ش.م بولاتىن 35 كوپ قاباتتى تۇرعىن ءۇي پايدالانۋعا بەرىلدى، ونىڭ ىشىندە «المالى» كوپ قاباتتى بەس ءۇيى، «الاتاۋ سيتي» تۇرعىن ءۇي كەشەنىنىڭ 7 ءۇيى جانە 13 شاعىن اۋداننىڭ 23 ءۇيى.
«بيىل مەملەكەتتىك باعدارلاما بويىنشا راحات-مادەنيەت شاعىناۋدانىنداعى 22 ۇيدەن تۇراتىن «مادەنيەت» تۇرعىن ءۇي كەشەنىنىڭ قۇرىلىسى اياقتالۋدا. جوبا بويىنشا 44 مىڭ ش.م تۇرعىن ءۇي قۇرىلىسى قاراستىرىلعان»، - دەدى ا. قالدىبەكوۆ.
2021 جىلى ينۆەستيسيالار ەسەبىنەن «الاتاۋ سيتي»، «المالى»، «Shahar City»، «O-JET»، «ىرىستى»، «اقكەنت»، «سيەۆەرنىي»، «دوستىق» سەگىز تۇرعىن ءۇي كەشەنىندە 87 كوپ قاباتتى ءۇي سالىنۋدا. پايدالانۋعا بەرىلەتىن تۇرعىن ءۇيدىڭ اۋدانى 434 مىڭ شارشى مەتردەن اسادى.
سونداي-اق، ا. قالدىبەكوۆ اۋداندى سانيتارلىق تازارتۋ جۇمىستارىن كۇشەيتۋ تۋرالى ايتتى. مىسالى، الاتاۋ اۋدانىنىڭ 23 شاعىناۋدانىندا قوقىس شىعاراتىن 12 كاسىپورىن بار. اۋداندا 45 كونتەينەر الاڭى بار، كونتەينەرلەردىڭ جالپى سانى - 180 بىرلىك. كۇنىنە 1200-1300 تەكشە مەتر قوقىس شىعارىلادى.
اۋداندى كوگالداندىرۋعا جەتە كوڭىل بولىنەدى، جىل باسىنان بەرى 1200-دەن استام اعاش وتىرعىزىلدى. تاعى 3 000 كوشەت كۇزدە وتىرعىزىلادى دەپ جوسپارلانۋدا. جالپى، الاتاۋ اۋداندا 130 مىڭعا جۋىق اعاش وتىرعىزۋ جوسپارلانعان.
ا. قالدىبەكوۆ ءار تۇرعىنعا ءوز جوبالارىن ۇسىنۋعا مۇمكىندىك بەرەتىن «بيۋدجەتكە قاتىسۋ» باعدارلاماسىنىڭ اۋداندا قالاي جۇزەگە اسىرىلىپ جاتقانىن ءتۇسىندىردى.
2020 جىلى وسى باعدارلاما اياسىندا قالا تۇرعىندارىنان 99 جوبا كەلىپ ءتۇستى، ونىڭ ىشىندە تۇرعىنداردىڭ داۋىس بەرۋى بويىنشا بيىل 1 ملرد 300 ملن تەڭگەنىڭ 31 جوباسى جۇزەگە اسادى. بارلىق جوبالار بويىنشا قۇرىلىس-مونتاج جۇمىستارى جۇرگىزىلۋدە، ولار جىل سوڭىنا دەيىن اياقتالادى.
سونىمەن قاتار، قولايلى جاعداي جاساۋ ءۇشىن ۇلجان، شاڭىراق-2، نۇركەنت، العاباس شاعىناۋداندارىنداعى جاسىل ايماققا اعىمداعى جوندەۋ جۇمىستارىن جۇرگىزۋ جوسپارلانۋدا.
«جوبا اياسىندا 2021 جىلدىڭ سوڭىنا قاراي بالالار مەن سپورت الاڭدارى سالىنادى، جاياۋ جۇرگىنشىلەرگە ارنالعان قوسىمشا ايماقتار قۇرىلادى، كوشەلەر جارىقتاندىرىلادى، دەمالاتىن ورىندار پايدا بولادى»، - دەدى اۋدان اكىمى.
اۋداندا 53 اۋلا اۋماعىن اباتتاندىرۋ بويىنشا جۇمىستار باستالدى. سونىمەن قاتار 15 اۋلانى جوندەۋ جوسپارلانعان.