الاتاۋ اۋدانىندا ناۋرىز مەيرامىن 21-22 ناۋرىزدا تويلاۋ جانە 22 ناۋرىزدا «الماتى ارەنا» سپورت كەشەنىندە «Tynda Music» اۋقىمدى سيمفونيالىق كونسەرتىن وتكىزۋ قارساڭىندا قالا اكىمدىگى جول قوزعالىسى مەن تۇراق ۇيىمداستىرۋداعى ۋاقىتشا وزگەرىستەر تۋرالى حابارلايدى.
2025 جىلعى 19 ناۋرىزدا ساعات 00:00-دەن 24 ناۋرىز كۇنى 00:00-گە دەيىن مومىش ۇلى كوشەسىنەن دوسپانوۆا كوشەسىنە دەيىنگى ۋچاسكەدەگى ۋنيۆەرسيادنايا كوشەسى بويىنشا قوزعالىس ۋاقىتشا شەكتەلەدى. بۇل شەشىم ءىس-شارالارعا قاتىسۋشىلاردىڭ قاۋىپسىزدىگىن قامتاماسىز ەتۋگە، سونداي-اق قالا تۇرعىندارى مەن قوناقتارى ءۇشىن قولايلى جاعداي جاساۋعا باعىتتالعان.
22 ناۋرىز كۇنى ساعات 19:00-دە «الماتى ارەنادا» وتەتىن «Tynda Music» كونسەرتىنە قاتىسۋشىلارعا ىڭعايلى بولۋ ءۇشىن، سونداي-اق ناۋرىز مەيرامىنىڭ مەرەكەلىك ءىس-شارالارى اياسىندا قوسىمشا تۇراق ايماقتارى ۇيىمداستىرىلادى:
* مومىش ۇلى كوشەسىندەگى جاڭا مەشىت اۋماعىندا؛
* «الماتى ارەنا» سپورت كەشەنىنىڭ اۋماعىندا؛
* «الاتاۋ» ءداستۇرلى ونەر تەاترىنىڭ اۋماعىندا.
قالا اكىمشىلىگى الماتى تۇرعىندارى مەن قوناقتارىن مارشرۋتتاردى الدىن الا جوسپارلاۋعا، جول قوزعالىسىنداعى ۋاقىتشا وزگەرىستەردى ەسكەرۋگە جانە ۇسىنىلعان تۇراق ايماقتارىن پايدالانۋعا شاقىرادى.