عالىم الاش قايراتكەرلەرىنىڭ شىعارمالارى مەن ءومىر دەرەكتەرىن زەرتتەپ، عىلىمي ەڭبەكتەر جازدى
بۇگىن جازۋشى، عالىم، فيلولوگيا عىلىمدارىنىڭ دوكتورى، پروفەسسور، پۋبليسيست، قوعام قايراتكەرى تۇرسىن قۇداكەلدى ۇلى جۇرتباي 70 جاسقا تولدى، دەپ حابارلايدى Almaty-akshamy.kz
جۇرتباي تۇرسىن قۇداكەلدى ۇلى 1951 جىلى سەمەي وبلىسى، اباي اۋدانى، شاعان اۋىلىندا تۋعان.
1974-1990 جىلدارى «جەتىسۋ» گازەتىندە، «ءبىلىم جانە ەڭبەك»، «جۇلدىز» جۋرنالدارىندا قىزمەت ىستەدى. 1990-1998 جىلدارى - م.اۋەزوۆ مۇراجايىندا عىلىمي قىزمەتكەر، ءبولىم باستىعى، ديرەكتور. 1998- 2001 جىلدارى - دوكتورانت، قازۇۋ-دا وقىتۋشى. 2001 جىلدان باستاپ «وتىرار كىتاپحاناسى» عىلىمي-زەرتتەۋ ورتالىعىنىڭ ديرەكتورى بوپ ەڭبەك ەتىپ كەلەدى.
«جۇرەگىمدە جۇمىر جەر» ولەڭدەر مەن پوەمالار، «بەسقاراگەر»، «دارا تۇلعا»، «جەر - بەسىك» رومان-نوۆەللاسى، «بەيۋاق» رومان-ەسسەسى، «بەسىگىڭدى تۇزە»، «تالقى» رومان-ەسسەلەرى، «مۋحتار ومارحانوۆيچ اۋەزوۆ»، «كۇيەسىڭ جۇرەك... سۇيەسىڭ!»، «بەسىگىڭدى ايالا!...» كىتاپتارى جارىق كوردى.
تۇرسىن جۇرتباي الاش قايراتكەرلەرىنىڭ شىعارمالارى مەن ءومىر دەرەكتەرى تۋرالى كوپتەگەن ىزدەنىستەر جۇرگىزىپ، سولاردىڭ نەگىزىندە عىلىمي ەڭبەكتەر جازدى. ول «الاش اقيىقتارى» جيناعىن قۇراستىرىپ، الاش قايراتكەرلەرىنىڭ بەيمالىم شىعارمالارىن جالپى جۇرتشىلىققا تانىستىردى. حالىقارالىق «الاش»، ءى.جانسۇگىروۆ اتىنداعى ادەبي سىيلىقتاردىڭ لاۋرەاتى.