مەملەكەت جانە قوعام قايراتكەرى وزبەكالى جانىبەكوۆتىڭ تۋعانىنا - 90 جىل
قالامىزدا كورنەكتى مەملەكەت جانە قوعام قايراتكەرى، بەلگىلى عالىم وزبەكالى جانىبەكوۆتىڭ تۋعانىنا 90 جىل تولۋىنا وراي رەسپۋبليكالىق عىلىمي-پراكتيكالىق كونفەرەنسيا ءوتتءى، دەپ حابارلايدى almaty-akshamy.kz.
عىلىمي كونفەرەنسياعا و. سۇلەيمەنوۆ، م. جولداسبەكوۆ، م. جۇرىنوۆ، س. تەرەششەنكو، ق. سۇلتانوۆ سىندى بەلگىلى قوعام قايراتكەرلەرى قاتىسىپ، ايتۋلى تۇلعانىڭ ەڭبەگى تۋرالى ەستەلىكتەرىمەن ءبولىستى.
«وزبەكالى جانىبەكوۆتىڭ جاساعان جۇمىستارىن ءبىز ەندى ءتۇسىنىپ جاتىرمىز. ونىڭ تىكەلەي ارالاسۋىمەن الاش ارىستارى اقتالعان ەدى. بۇل ءىس بويىنشا ول تىنىمسىز ەڭبەك ەتتى. سونىڭ ارقاسىندا شاكارىم، ماعجان جۇمابايەۆ جانە ت.ب. ەسىمدەرى ەلمەن قايتا قاۋىشتى. مۇنداي باسشىلار بىزگە كەرەك ەدى، بۇگىن دە كەرەك جانە ءارقاشان قاجەت بولادى. سوندىقتان دا ءبىز وزبەكالى جانىبەكوۆتى وسى تيپتەگى باسشى رەتىندە ۇنەمى ەسكە الامىز، دەدى، - ءوز سوزىندە قازاقستاننىڭ ەڭبەك ەرى ولجاس سۇلەيمەنوۆ.
مىرزاتاي جولداسبەكوۆ وزبەكالى جانىبەكوۆپەن بىرگە جۇمىس ىستەگەن كەزدەرىن ەسكە الىپ، ەستەلىكتەرىمەن ءبولىستى.
«مەنى قاسىنان قالدىرمايتىن، ەل ارالاپ بىرگە جۇردىك. قازاقتىڭ وي-ساناسى تۋرالى ايتقاندى جاقسى كورەتىن. سويلەپ كەتسە، كەۋدەسى كەڭساراي ەدى. ءوزى تاريحشى، ەتنوگراف بولدى. ءبىرتالاي كىتاپتار جازدى. جانى تازا ادام ەدى. مەملەكەت مۇلكىنە ەش قول سۇقپاعان ادام»، - دەدى ول.
سەنات دەپۋتاتى التىنبەك نۇح ۇلى ارىستان باب قورىق مۋزەيى ماڭىنداعى جابىلىپ قالعان وزبەكالى جانىبەكوۆ مۋزەيى تاريحي-ەتنولوگيالىق سيپاتتا قاتارعا قايتا قوسۋ، تۇركىستان قالاسىندا كەڭ كوشەگە ەسىمىن بەرىپ، ەسكەرتكىشىن ورناتۋ، 5 تومدىق شىعارمالار جيناعىن تولىقتىرىپ جارىققا شىعارۋ جانە ومىرىنەن دەرەكتى كينو تۋىندىلار جاساۋ، ءوزى وقىعان اباي اتىنداعى قازاق ۇلتتىق پەداگوگيكالىق ۋنيۆەرسيتەتىندە وزبەكالى جانىبەكوۆ اتىنداعى اۋديتوريانى اشۋ، سونداي-اق حالىقارالىق عىلىمي-پراكتيكالىق كونفەرەنسيا وتكىزۋ تۋرالى ۇسىنىستارىن جەتكىزدى.
جيىن بارىسىندا قانىش ساتبايەۆتىڭ مەموريالدىق مۇراجايى تاراپىنان ق ر مەملەكەتتىك مۇراعاتىنان الىنعان قۇجاتتار مەن فوتوسۋرەتتەر قويىلعان وزبەكالى جانىبەكوۆتىڭ ءومىرى مەن قايراتكەرلىك قىزمەتىنە قاتىستى كورمە ۇيىمداستىرىلدى. ولاردىڭ قاتارىندا بۇكىلالەمدىك يۋنەسكو تىزىمىنە ەنگەن مادەني مۇرا قۇجاتتارىنىڭ كوشىرمەسى بار.