بيىل الاش كوسەمى، ەنسيكلوپەديست-عالىم حالەل دوسمۇحامەد ۇلىنىڭ تۋعانىنا 140 جىل. مەديسينا، ءتىل عىلىمى، ت.ب قوعامنىڭ كەز كەلگەن سالاسىندا ولشەۋسىز ءىز قالدىرعان الاش ارىسىنىڭ مەرەيتويىن اتاپ ءوتۋ جاڭالىق اۋىلىنداعى جيىننان باستالدى.
ارىس قورىنىڭ ۇيىمداستىرۋىمەن ساياسي قۋعىن-سۇرگىن قۇرباندارى مۋزەيىندە «عيبراتتى عالىم – حالەل» اتتى دوڭگەلەك ۇستەل ءوتتى. ءىس-شاراعا الاشتانۋشىلار مەن تاريحشى-عالىمدار قاتىسىپ، حالەل دوسمۇحامەد ۇلىنىڭ ۇلت رۋحانياتىنا سىڭىرگەن ەڭبەگى تۋرالى ءسوز قوزعادى. «الاش ارىستارى» مەشىتىندە مارقۇمنىڭ رۋحىنا قۇران باعىشتالىپ، اس بەرىلدى.
«بۇل كىسىنىڭ ارالاسپاعان سالاسى جوق. بارلىق سالانىڭ باسىندا تۇرعان ۇلكەن اعارتۋشى دەسەك ارتىق ايتپايمىز. حالەل دوسمۇحامەد ۇلىنىڭ 150 جىلدىق مەرەيتويىن الەمدىك دەڭگەيدە اتاپ ءوتۋ جوسپاردا بار»، - دەدى ارىس قورىنىڭ پرەزيدەنتى عاريفوللا انەس.
24 ءساۋىر كۇنى ۇلت-ازاتتىق قوعالىسى جەتەكشىلەرىنىڭ ءبىرى، باتىس الاشوردا ۇكىمەتىنىڭ جەتەكشىسى بولعان حالەل دوسمۇحامەد ۇلىنىڭ تۋعانىنا 140 جىل تولدى. وسىعان بايلانىستى ساياسي قۋعىن-سۇرگىن قۇرباندارى مۋزەيىندە حالەلتانۋشىلار، الاشتانۋشى-عالىمداردى شاقىرىپ، الاش قايراتكەرىنە ارناپ دوڭگەلەك ۇستەل وتكىزدىك. ءبىزدىڭ مۋزەي رەپرەسسيا قۇرباندارىنا ارنالعاندىقتان، ۇلت ءۇشىن قۇربان بولعان بارلىق تۇلعانىڭ مەرەيتويى نەمەسە ماڭىزدى داتالاردى ەسكە الۋ شارالارىن وتكىزىپ تۇرۋعا تىرىسامىز. بيىل ساياسي قۋعىن-سۇرگىنگە ۇشىراعان الاش قايراتكەرلەرى شاكارىم قۇدايبەردى ۇلى، ماعجان جۇمابايەۆ، سۇلتانماحمۇت تورايعىروۆ سىندى ءبىراز تۇلعانىڭ مەرەيتويى بولعالى تۇر. الاش قايراتكەرلەرىنىن بولەك، كومپارتيانىڭ مۇشەسى بولسا دا، قازاقتىڭ مۇددەسىن قولداعان ۇلت زيالىلارىمىز بار. ولاردىڭ ءبىرى – جانايدار ءسادۋاقاسوۆتىڭ 125 جىلدىعى. ودان بولەك ت.جۇرگەنوۆتىڭ 125 جىلدىعى مەرەيتويلارى وسى مۋزەيدە وتەدى، - دەيدى ساياسي قۋعىن-سۇرگىن قۇرباندارى مۋزەيىنىڭ مەڭگەرۋشىسى مەيىرجان مۇسابايەۆ.
