قارجى نارىعىن رەتتەۋ جانە دامىتۋ اگەنتتىگى قارجى ساۋاتى جايلى ساۋالناما ناتيجەسىن جاريالادى.
قارجىلىق الاياقتىقتىڭ ەڭ كوپ تاراعان تۇرلەرىنىڭ ءبىرى - تەلەفون ارقىلى(34،2%) جاسالاتىن جانە ينتەرنەت-الاياقتىق (32،7%)، دەپ حابارلايدى Almaty-akshamy.kz قازاقپاراتقا سىلتەمە جاساپ.
ساۋالناما كورسەتكەندەي، رەسپوندەنتتەردىڭ جارتىسىنان كوبى قارجىلىق الاياقتىقپەن تانىس - 55،8%.
كوبىنە بۇل تەلەفون ارقىلى جاسالاتىن الاياقتىق – «ۆيشينگ» (34،2%) جانە ينتەرنەت-الاياقتىق – «فيشينگ» (32،7%).
ساۋالناماعا قاتىسقانداردىڭ 21،6% قارجى پيراميداسى ۇيىمداستىرعان الاياقتىققا كۋا بولعان، ال 11،5% تولەم كارتالارى بويىنشا الاياقتىققا تاپ بولدى.
بۇل رەتتە الاياقتاردىڭ ازاماتتارمەن بايلانىسىنىڭ ەڭ كوپ تاراعان تاسىلدەرى - ۇيالى نەمەسە قالالىق تەلەفونعا قوڭىراۋ شالۋ (51،5%)، سونداي-اق الەۋمەتتىك جەلىلەر مەن مەسسەنجەردەگى حابارلاما (33،4%).
56% جاعدايدا مۇنداي قۇقىق بۇزۋشىلىقتى تانىپ-بىلۋگە بولادى، الايدا رەسپوندەنتتەردىڭ قالعان 44% مۇنداي قۇقىق بۇزۋشىلىقتى ۋاقتىلى انىقتاي الماعان.
الاياقتاردىڭ ايلا-امالدارىنا كوبىنە اعا بۋىن وكىلدەرى سەنىم ارتادى، ويتكەنى ساۋالناماعا قاتىسقانداردىڭ 50،7% (63+) الاياقتىق پيعىلدى اجىراتا الماعان.
بەلگىلى بولعانداي، الاياقتارعا ەرلەرگە (42،6%) قاراعاندا ايەلدەر (45،3%) كوبىرەك سەنىپ قالعان.
وڭىرلەر بويىنشا الماتى جانە شىمكەنت قالالارىندا (49،3%-دان)، شىعىس قازاقستان وبلىسىندا (48،7%) جانە استانا قالاسىندا (48%) «جوق، ءتانىپ-بىلۋ مۇمكىن بولمادى» دەگەن جاۋاپ نۇسقاسى جوعارى كورسەتكىشكە يە بولىپ وتىر.
بۇل كورسەتكىشتەر، ەڭ الدىمەن، ءىرى قالالاردا كاسىبي ەكونوميكالىق الاياقتىقتىڭ دامۋ تاۋەكەلىنىڭ جوعارى دەڭگەيدە ەكەنىن كورسەتۋى مۇمكىن.