قازاقستاندىقتار WhatsApp كومپانياسى اتىنان تەگىن 50 گب ينتەرنەت-ترافيك الۋ جونىندەگى نۇسقاۋلىقپەن بولىسۋدە
ول ءۇشىن پايدالانۋشىلارعا پورتالعا ءوتىپ، قىسقا ساۋالنامادان ءوتۋ ۇسىنىلادى. بۇل الاياقتىق، دەپ حابارلاعان Stopfake.kz سايتى.
WhatsApp كومپانياسىنان تەگىن 50 گب ترافيك الۋ تۋرالى حابارلاما 2020 جىلى جەلىنىڭ اعىلشىن ءتىلدى سەگمەنتىندە كەڭىنەن تاراعان. ونى تەكسەرگەن فاتكچەكەرلەر مۇنداي حابارلامالار فەيك بولىپ تابىلادى دەگەن قورىتىندى جاسادى، دەپ حابارلايدى Almaty-akshamy.kz
حابارلامالاردىڭ فەيك ەكەندىگىن اقىسىز ترافيك الۋ ءۇشىن ساۋالنامادان وتۋگە ارنالعان سىلتەمەدەن بايقاۋعا بولادى. WhatsApp سايتىندا كومپانيانىڭ بارلىق رەسمي حابارلامالارى پورتالدا جاريالاناتىنى، ونىڭ مەكەنجايى whatsapp.com دەپ باستالاتىنى ايتىلعان.
ساۋالناما پاراقشاسىنا اپاراتىن سىلتەمە ldivipvi3.xyz-تەن باستالادى.
«ءبىز پايدالانۋشىلاردىڭ دەربەس دەرەكتەرىن الۋ ءۇشىن ونلاين-ساۋالنامالاردى پايدالاناتىن الاياقتار تۋرالى بىرنەشە رەت جازعان بولاتىنبىز. الاياقتىقتىڭ بۇل ءتۇرى فيشينگ دەپ اتالادى»، - دەلىنگەن حابارلامادا.