Facebook-تە 900 برەند تەگىن ۆەلوسيپەد تاراتىلاتىنى تۋرالى اقپارات جاريالاندى.
جارناما 2023 جىلدىڭ 5 ساۋىرىندە اشىلعان Trek Bicycle Fans اتتى پاراقشاسىندا شىققان، دەپ حابارلايدى Almaty-akshamy.kz
جارناماعا سەنسەك، ولار سىزىلىپ قالعان جەرلەرى بولعاندىقتان ساتىلماي قالعان، سوندىقتان تەگىن بەرىلمەك.
Stopfake.kz فاكچەكينگ سايتى مۇنداي حابارلاندىرۋلارعا نەگە سەنبەۋ كەرەكتىگىن ءتۇسىندىردى.
"جارناما 2023 جىلدىڭ 5 ساۋىرىندە اشىلعان Trek Bicycle Fans اتتى پاراقشاسىندا شىققان. اككاۋنتتىڭ اۆاتارىندا ۆەلوسيپەدتەر مەن سپورتتىق كيىمدەر شىعاراتىن Trek كومپانياسىنىڭ لوگوتيپى پايدالانىلعان. بۇل رەتتە Trek كومپانياسىنىڭ رەسمي سايتىندا دا، Trek Bicycle Fans ەمەس، Trek Bicycle دەپ اتالاتىن Facebook-تەگى رەسمي پاراقشاسىندا دا 900 ۆەلوسيپەدتى تەگىن تاراتۋ تۋرالى اقپارات جوق"، - دەلىنگەن سايتتاعى جازبادا.
تەگىن ۆەلوسيپەد الۋدى ۇسىنعان پاراقشادا بارلىعى وسى حابارلامانى تاراتىپ، مەكەنجايى پروفيلدە كورسەتىلگەن سايتتا تىركەلۋى كەرەك دەلىنگەن.
"بۇل پورتال Trek كومپانياسىنىڭ رەسمي سايتى ەمەس جانە وندا گرامماتيكالىق قاتەلەر كوپ. ياعني، بۇل كۇماندى پورتال جانە وندا جەكە دەرەكتەرىڭىزدى قالدىرماعان ءجون. پورتالدى پايدالانۋشىلاردىڭ تەلەفون نومىرلەرىن، لوگيندەرىن، پارولدەرىن، تولەم كارتالارىنىڭ دەرەكتەرىن جانە باسقا دا اقپاراتتارىن الداپ الۋ ءۇشىن الاياقتار جاساعان سياقتى"، - دەلىنگەن حابارلامادا.