"بجزق" اق باسپا ءسوز قىزمەتىنىڭ مالىمەتىنشە، تەلەفون ارقىلى جاسالاتىن الاياقتىقتىڭ جاڭا ءتۇرى – ءوزىن بجزق قىزمەتكەرى رەتىندە تانىستىرىپ، قانداي دا ءبىر كومپانيانىڭ باس بۋحگالتەرىنە قوڭىراۋ شالىپ، سول ۇيىمنىڭ قىزمەتكەرىنىڭ زەينەتاقى شوتى بۇعاتتالعانى تۋرالى حابارلايدى. سەبەبى ونىڭ كومپانيا بسن-ى بار ترانزيتتىك شوتتارىنا تىيىم سالىنعان.
بۇعاتتان شىعارۋ ماقساتىندا بۋحگالتەرلەرگە الاياقتاردىڭ شوتىنا بەرەشەك سومانىڭ جارتىسىن سالۋعا كەڭەس بەرەدى، ايتپەسە كومپانياعا زەينەتاقى جارنالارىن ۋاقىتىلى ەسەپتەمەگەنى ءۇشىن ايىپپۇل سالىنادى دەپ قورقىتادى.
"وسىلايشا، تەلەفون ارقىلى سويلەسۋ بارىسىندا الاياقتار قۇرباندارىن ولاردىڭ شوتتارىنا كوپ سومادا اۋدارىم جاساۋعا يتەرمەلەيدى. زيانكەستەر الەمنىڭ كەز كەلگەن ەلىندە بولۋى مۇمكىن جانە كوبىنەسە تەلەفون نومىرلەرىن ينتەرنەت جەلىسىنەن تابادى، جابىرلەنۋشىنىڭ اتى مەن الەۋمەتتىك جاعدايىن ءارتۇرلى مەسسەندجەرلەر مەن قىزمەتتەر ارقىلى الەۋمەتتىك جەلىلەردەن بىلەدى".ءبىرىڭعاي جيناقتاۋشى زەينەتاقى قورىنىڭ باسپا ءسوز قىزمەتى
تەلەفون الاياقتارىنىڭ قولىنان قانشا قازاقستاندىق زارداپ شەككەنىن بجزق ناقتىلامادى. دەگەنمەن بجزق سۇراقتار تۋىنداعان جاعدايدا ازاماتتارعا تەك 1418 تەلەفونى بويىنشا رەسمي بايلانىس ورتالىعىنا حابارلاسۋعا شاقىردى نەمەسە ءبىرىڭعاي جيناقتاۋشى زەينەتاقى قورىنىڭ قالالىق فيليالدارىنا دا كەڭەس سۇراپ جۇگىنۋگە بولادى.
الاياقتىڭ قۇرىعىنا ءتۇسىپ قالماۋ ءۇشىن مىنا نارسەنى بىلگەنىڭىز ءجون:
- بجزق فۋنكسيالارىنا سالىمشىلار مەن الۋشىلارعا جيناقتاۋشى زەينەتاقى جۇيەسى ماسەلەلەرى بويىنشا اقىل-كەڭەس بەرۋ، مىندەتتى زەينەتاقى جارنالارىن، مىندەتتى كاسىپتىك زەينەتاقى جارنالارىن، ەرىكتى زەينەتاقى جارنالارىن تارتۋ، زەينەتاقى جيناقتارىنىڭ دەربەستەندىرىلگەن ەسەبى جانە زەينەتاقى تولەمدەرىن جۇزەگە اسىرۋ كىرەدى؛
- زەينەتاقى جارنالارىن تولەۋدىڭ تولىقتىعى مەن ۋاقىتىلى جۇرگىزىلۋىن بجزق ەمەس، سالىق ورگاندارى باقىلايدى؛
- زەينەتاقى جارنالارىن ۇزاق ۋاقىت بويى تولەمەگەن جاعدايدا، بجزق قىزمەتكەرلەرى سالىمشىلارعا تولەم جاساماۋ سەبەبىن انىقتاپ، قاجەتتى اقىل-كەڭەس كەڭەس بەرۋ ماقساتىندا عانا قوڭىراۋ شالا الادى؛
- بجزق قىزمەتكەرلەرىنىڭ قاراجاتتى بەلگىلى ءبىر شوتقا اۋدارۋدى تالاپ ەتۋگە قۇقىعى جوق.
بۇل رەتتە ۇلتتىق كاسىپكەرلەر پالاتاسى الاياقتاردىڭ ارەكەتىنەن ءبىرىنشى كەزەكتە جەكە كاسىپ يەلەرى مەن قىزمەتكەرلەرى، سونداي-اق جاۋاپكەرشىلىگى شەكتەۋلى سەرىكتەستىكتەر قارجى تۇرعىسىنان زارداپ شەگۋى مۇمكىن دەپ ەسەپتەيدى.
الماتى قالاسى كاسىپكەرلەر پالاتاسىنىڭ بيزنەستى قورعاۋ جونىندەگى باسقارۋشى ديرەكتورى مەيرامبەك قانىبەكوۆتىڭ ايتۋىنشا، ەسەپشىلەردىڭ تەلەفون الاياقتارىمەن ءسوز بايلاسۋى جاعدايدى ۋشىقتىرۋى مۇمكىن.
"ارينە، مۇنىڭ قىلمىستىق ءمانى بار جانە ونى باسقا بىرەۋدىڭ مەنشىگىنە جاسالعان قاستاندىق رەتىندە قاراستىرۋ كەرەك. بۇل ۇيىمداسقان قوڭىراۋلار بولسا، ودان دا سوراقى. ەسەپشىلەر الاياقتارمەن كەلىسىمگە كەلۋى مۇمكىن. ءبىراق مۇنداي دەرەكتى تەرگەۋ ادىسىمەن دالەلدەۋگە تۋرا كەلەدى. كەيبىر جوسىقسىز ەسەپشىلەر مۇنداي قوڭىراۋلارعا وزدەرى باستاماشىلىق جاساپ، قىزمەتكەردىڭ جەكە دەرەكتەرىن بەرىپ، اقشا بوپسالاۋى مۇمكىن. بۇل باسقا ماسەلە. ەگەر مۇنداي فاكتىلەر بولسا، وندا قۇقىق قورعاۋ ورگاندارىنا حابارلاسۋ كەرەك".مەيرامبەك قانىبەكوۆ
دەگەنمەن، ونىڭ ايتۋىنشا، كاسىپكەرلەر الاياقتىقتىڭ جاڭا تۇرىنە قاتىستى شاعىممەن ازىرگە پالاتاعا جۇگىنبەگەن. ال ءىس قىلمىستىق سيپاتتا بولعاندىقتان، بيزنەسمەندەر كوبىنە تىكەلەي پوليسياعا جۇگىنەدى. بۇل تۇرعىدا ساراپشى جەكە كومپانيانىڭ تابىسىنا بايلانىستى شىعىن كوپ بولۋى مۇمكىن دەپ ەسەپتەيدى. ول ءوزىن قورعاۋ ءۇشىن تەك رەسمي ورگاندارعا سەنۋدى جانە بەلگىسىز نومىرلەردەن قوڭىراۋلاردى قابىلداماۋدى ۇسىندى.