الماتى وبلىسىندا جىلقىنى كولىگىمەن باسقان ەر ادام قاماۋعا الىندى

بۇل جازاعا ول بالاعات ءسوز ايتقانى ءۇشىن تارتىلدى.

الماتى وبلىسىندا جىلقىنى قاساقانا كولىگىمەن باسقان ادام 10 كۇنگە قامالدى، دەپ حابارلايدى Almaty-akshamy.kz.

«جىلقىنى كولىگىمەن باسقان تۇرعىن اكىمشىلىك كودەكستىڭ 434-بابى (ۇساق بۇزاقىلىق) بويىنشا 10 كۇنگە قاماۋعا الىندى. بۇل جازاعا ول بالاعات ءسوز ايتقانى ءۇشىن تارتىلدى. ال ۇستىنەن قوزعالعان قىلمىستىق ءىس توقتاتىلعان جوق. قوزعالعان ق ر قك 316 باپ (جانۋارلارعا قاتىگەزدiك جاساۋ) قىلمىستىق كودەكستىڭ 202-بابىنا (مۇلىككە قاساقانا زالال كەلتىرۋ) اۋىستىرىلدى. تەرگەۋ ءجۇرىپ جاتىر»، - دەدى الماتى وبلىستىق پوليسيا دەپارتامەنتىنىڭ باسپا ءسوز قىزمەتى وكىلدەرى.

ايتا كەتەيىك، ەر ادامنىڭ جول تالعامايتىن كولىكپەن جىلقىنى قاساقانا تۇردە باسىپ جاتقان ۆيدەوسى جەلىگە تاراعان بولاتىن. ۆيدەو اۆتورى جىلقىنى باسقان ادامدى پوليسيا الىپ كەتىپ، ارتىنشا بوستاندىققا جىبەرە سالعاندىعىنا شاعىمداندى. ال پوليسيا كۇدىكتىنىڭ ارنايى قولحاتپەن بوساتىلعانىن حابارلاعان بولاتىن.

ەسكە سالا كەتەيىك، 16 شىلدە كۇنى ىلە اۋدانىنداعى مەجدۋرەچەنسك اۋىلىنىڭ 38 جاستاعى تۇرعىنى كورشىسىمەن جانجالداسىپ، ونىڭ جىلقىسىن قاساقانا جول تالعامايتىن كولىكپەن باسقان.