ولار بالالاردىڭ اڭقاۋلىعىن پايدالانىپ، ءارتۇرلى وقيعالار ويلاپ تاۋىپ، ءتۇرلى ايلالارىن ىسكە اسىرۋعا تالپىنادى.
قارجى الاياقتارى بالالار ارقىلى ولاردىڭ اتا-انالارىنىڭ اقشاسىنا قول جەتكىزۋگە تىرىسادى، دەپ حابارلايدى aqshamnews.kz
ق ر قارجى نارىعىن رەتتەۋ جانە دامىتۋ اگەنتتىگى الاياقتار بالالاردى ولاردىڭ اتا-انالارىنىڭ قارجىلىق قاراجاتىنا قول جەتكىزۋ ءۇشىن قالاي الدايتىنىن جانە الاياقتىقتان قالاي قورعانۋعا بولاتىنىن ۇسىندى.
بالا ەلەكتروندىق پوشتا، الەۋمەتتىك جەلى، SMS نەمەسە مەسسەندجەر ارقىلى اقشالاي سىيلىق نەمەسە شەتەلگە جولداما ۇتقانى، ونى اقشاعا ايىرباستاۋعا بولاتىنى تۋرالى حابارلاما الادى. سونداي-اق، شەتەلدە تۇراتىن باي تۋىسىنىڭ مۇراگەرى بولعاندىعى تۋرالى دا حات كەلۋى مۇمكىن.
بۇل رەتتە اقشانى نەمەسە جولدامانى الۋ ءۇشىن بالا ءوز كەلىسىمىن بەرىپ، سىلتەمە بويىنشا ءوتىپ، تىركەلۋى كەرەك. ساۋالنامادا جەكە دەرەكتەردى، ونىڭ ىشىندە كەز كەلگەن قولدا بار تولەم كارتاسىنىڭ ءنومىرىن، ونىڭ قولدانىس مەرزىمىن جانە ارتقى جاعىنداعى ءۇش تاڭبالى كودتى كورسەتۋ تالاپ ەتىلەدى. ەگەر بالالار قاسكۇنەمدەرگە وسى دەربەس جانە تولەم دەرەكتەرىن بەرسە، الاياقتار اتا-اناسىنىڭ اقشاسىنا قول جەتكىزە الادى.
بالاڭىزدىڭ تانىسىنىڭ پاراقشاسىندا قولداۋ كورسەتۋدى جانە مۇمكىندىگىنشە بانكتىك شوتقا نەمەسە ەلەكتروندىق ءاميانعا اقشا جىبەرۋدى سۇرايتىن حابارلاما جاريالانادى. وسى سىندى تاعى ءبىر سحەما – بالاڭىزدىڭ سىنىپتاسى وعان مەسسەندجەر ارقىلى حابارلاسىپ، جاقىن ادامىنىڭ اپاتقا ۇشىراعانىن نەمەسە ءوزىنىڭ سىرقاتتانىپ قالعانىن ايتىپ نەمەسە جاي عانا قارىزعا اقشا سۇراۋى مۇمكىن. ءبىراق ول بۇل تۋرالى ەشكىمگە ايتپاۋدى سۇرايدى. ەگەر ءسىزدىڭ بالاڭىز الاياقتاردىڭ ءوتىنىشىن ورىنداپ، ءوز ەركىمەن جاسىرىن تۇردە اقشا اۋدارسا، ونى قايتارۋ مۇمكىن ەمەس. سوندىقتان مۇنداي جايتتار تۋرالى وعان الدىن الا ەسكەرتكەن ابزال.
الاياقتار بالاڭىزدىڭ گادجەتىنە جىلدام بايۋعا نەمەسە كەز كەلگەن ادامنىڭ ورنالاسقان جەرىن باقىلاۋعا مۇمكىندىك بەرەتىن قوسىمشانىڭ جارناماسى بار سىلتەمە جىبەرۋى مۇمكىن. ەڭ باستىسى، بۇل موبيلدىك قوسىمشا بىرەگەي بولىپ تابىلادى جانە ونى سىلتەمە ارقىلى تەگىن جۇكتەپ الۋعا بولادى.
بالا كۇماندى باعدارلامالىق جاساقتامانى جۇكتەسە، بۇل جەكە اقپاراتتى ءۇشىنشى تۇلعالارعا بەرە الاتىن، بالاڭىزدىڭ جۇرگەن جەرىن قاداعالايتىن جانە تەلەفونداعى باسقا قوسىمشالاردى باسقارا الاتىن شپيوندىق باعدارلاما ەكەنىن بىردەن تۇسىنبەۋى دە مۇمكىن.
اتا-انالار بالالارىن الاياقتاردان قالاي قورعاي الادى؟
بالاڭىزعا بەيتانىس ادامدارعا وزدەرى جانە جاقىندارى تۋرالى اقپاراتتى بەرۋگە بولمايتىنىن ايتىڭىز. الاياقتار زاماناۋي تەحنولوگيالاردىڭ كومەگىمەن كەز-كەلگەن ادامدى الداي الاتىنىن ءتۇسىندىرىڭىز.
بالالارىڭىز قانداي جاعداي بولماسىن بارلىعىن اشىق ايتۋعا بولاتىنى جانە ءسىزدىڭ وعان ۇرىسپايتىنىڭىز تۋرالى ءبىلۋى ماڭىزدى. بالاڭىزبەن قارىم-قاتىناسىڭىز ءوزارا سەنىمگە نەگىزدەلۋى كەرەك.
ەگەر بالا قانداي دا ءبىر سەبەپتەرمەن ۇيدە جالعىز قالسا، وندا ول اتا-اناسىنىڭ، باسقا تۋىستارىنىڭ، كورشىلەرىنىڭ، "102" قىزمەتىنىڭ، سونداي-اق ۋچاسكەلىك ينسپەكتوردىڭ جۇمىس جانە ۇيالى تەلەفوندارىن ءبىلۋى قاجەت.