ق ر قارجى نارىعىن رەتتەۋ جانە داسىتۋ اگەنتتىگى (قنردا) الاياقتار ءسىزدىڭ اتىڭىزعا نەسيە السا، نە ىستەۋ كەرەكتىرى تۋرالى نۇسقاۋلىق ازىرلەدى.
وندا ءوز قۇقىعىڭىزدى قورعاپ، سالداردى بولدىرماۋ ءۇشىن قانداي شارالار قابىلداۋ كەرەكتىگى جازىلعان، دەپ حابارلايدى aqshamnews.kz stopfake.kz-كە سىلتەمە جاساپ.
«ءسىزدىڭ اتىڭىزعا كرەديت رەسىمدەلگەنىن ءبىلۋ ءۇشىن كرەديتتىك تاريحىڭىزدى ءجيى تەكسەرىپ تۇرۋ قاجەت. ەسەپتى مەملەكەتتىك كرەديتتىك بيۋرودان، ءبىرىنشى كرەديتتىك بيۋرودان، حقكو-دان نەمەسە egov.kz پورتالى ارقىلى الۋعا بولادى. كرەديتتىك تاريحىڭىزدى توقسان سايىن كەمىندە ءبىر رەت تەكسەرىپ تۇرعان ءجون»، – دەپ حابارلايدى ۆەدومستۆو.
الاياقتار كرەديت رەسىمدەگەن جاعدايدا نە ىستەۋ كەرەك:
– قارىز رەسىمدەلگەن كرەديتتىك ۇيىمنىڭ اتاۋىن ءبىلىپ، وندا وتىنىشپەن جۇگىنىڭىز؛
– كرەديتوردان مىندەتتى تۇردە ىشكى قىزمەتتىك تەرگەپ-تەكسەرۋدى جۇرگىزۋدى تالاپ ەتىڭىز؛
– شارتتىڭ، وعان قوسىمشالاردىڭ جانە جەكە باستى كۋالاندىراتىن قۇجاتتاردىڭ كوشىرمەلەرىن، سونداي-اق اقشا اۋدارىلعان شوت دەرەكتەمەلەرىن تالاپ ەتىڭىز؛
– كرەديت بەرگەن جانە شارتتى رەسىمدەگەن قىزمەتكەردىڭ دەرەكتەرىن ناقتىلاڭىز؛
– قۇقىق قورعاۋ ورگاندارىنا ءوتىنىش بەرىڭىز.
«قۇقىق قورعاۋ ورگاندارى ءوتىنىشىڭىزدى تىركەۋى كەرەك. سونىمەن قاتار سىزدە قالاتىن ءوتىنىشتىڭ كوشىرمەسىندە قۇجاتتىڭ قابىلدانعان كۇنى كورسەتىلگەن تىركەۋ ءنومىرى بولۋى شارت»، – دەيدى قنردا وكىلدەرى.
كرەديتتىك ۇيىم قۇجاتتاردى بەرمەسە، ق ر قارجى نارىعىن رەتتەۋ جانە دامىتۋ اگەنتتىگىنە شاعىممەن جۇگىنۋ كەرەك.
«ەگەر كرەديتتىك ۇيىم اقشانى ءسىزدىڭ جەكە كۋالىگىڭىز بويىنشا الاياقتار العانىن دالەلدەي الماسا، ورنالاسقان جەرى بويىنشا سوتقا مامىلەنى جارامسىز دەپ تانۋ تۋرالى تالاپ ارىزبەن جۇگىنۋ قاجەت. ەگەر سوت ءسىزدىڭ پايداڭىزعا شەشىم شىعارسا، وندا كرەديتتىك ۇيىم سىزدەن قارىز تولەۋدى تالاپ ەتۋدى توقتاتادى، بەرەشەكتى ەسەپتەن شىعارادى»، – دەيدى ۆەدومستۆوداعىلار.
سونداي-اق، قارىز بەرگەن ۇيىمعا كرەديتتىك بيۋروعا ءسىزدىڭ نەسيە تاريحىڭىزدان باسقا بىرەۋدىڭ قارىزى بويىنشا اقپاراتتى الىپ تاستاۋ تۋرالى حات جىبەرۋ كەرەك.