2023 جىلى ءال-فارابي داعىلىنىڭ تورايعىروۆ كوشەسىندەگى جولايرىقتان دوستىق داڭعىلىنداعى جولايرىققا دەيىنگى ارالىعىنداعى جالپى ۇزىندىعى 9،3 شاقىرىمدى قۇرايتىن بولىگىندە ورتاشا جوندەۋ جۇمىستارى جۇرگىزۋ جوسپارلانعان. قازىرگى كەزدە جوندەۋ جۇمىستارى كولىك قوزعالىسىن ءىشىنارا شەكتەپ قانا جۇرگىزىلۋدە.
جوندەۋ جۇمىستارى اياسىندا جولداعى جيەكتاستاردى تەگىستەۋ قاراستىرىلعان. تەگىستەۋ كەزىندە جيەكتاستار الىنىپ، جولدىڭ بويىندا ءتيىستى دەڭگەيدە قايتا ورناتىلادى.جوندەۋ جۇمىستارى ءجۇرىپ جاتقان اۋماقتا 34 500 م جيەكتاس بولسا، سونىڭ تەك 7683 مەترى عانا الىنىپ، سول جەرگە قايتا ورناتىلادى.
مەردىگەر ۇيىم وكىلدەرى اتاپ وتكەندەي، جيەكتاستار اۋىستىرىلمايدى، سەبەبى ولار گرانيتتەن جاسالعان جانە وتە ءتوزىمدى. ولار تەك تەگىستەلەدى. «تەگىستەۋ دەگەنىمىز – قيسايعان جيەكتاستاردى الىپ، قايتا ورنىنا ورناتۋ. جول قوزعالىسى كەزىندە جيەكتاستارعا ماشينالار ءتيىپ كەتۋى مۇمكىن نەمەسە ارنايى تەحنيكا قار تازالاۋ كەزىندە قيسايتىپ كەتۋى مۇمكىن. جيەكتاس پەن جول جابىنىنىڭ اراسىنداعى ساڭىلاۋلار جول بەتىندە جارىقتاردىڭ پايدا بولۋىنا الىپ كەلۋى مۇمكىن. جۇمىس ساپاسىن ارتتىرۋ ءۇشىن اسفالتتى بەتون جابىنىن توسەر الدىندا جيەكتاستار تەگىس ءارى تىك تۇرۋى ءتيىس»، - دەدى كومپانيا وكىلى.
ەسكە سالا كەتەيىك، ءال-فارابي داڭعىلى بۇعان دەيىن 2010 جىلى جوندەلگەن. جوندەۋارالىق مەرزىمنىڭ وتۋىنە بايلانىستى تەكسەرۋ جۇمىستارى جۇرگىزىلىپ، ناتيجەسىندە جول بويىندا شۇڭقىر، ويىلعان، جارىلعان، وتىرعان جەرلەر انىقتالىپ، جولدىڭ جاعدايى تۋرالى تەحنيكالىق قورىتىندى جاسالدى. تەحنيكالىق قورىتىندى نەگىزىندە اتالعان ۋچاسكەلەردى ورتاشا جوندەۋ جۇمىسى جوسپارىنا قوسىلدى.
الماتى قالالىق موبيلدىلىك باسقارماسى