قازاق ونەرىنىڭ كيەلى قارا شاڭىراعى – مۇحتار اۋەزوۆ اتىنداعى ۇلتتىق اكادەميالىق دراما تەاترىنىڭ اكتەرلەرى ۇجىم بولىپ ەكپە سالعىزدى.
بۇگىندە قالامىزدا كوروناۆيرۋس ىندەتىنىڭ دەس بەرمەي تۇرعانى بارشامىزعا ايان. بۇل رەتتە COVID-19-عا توتەپ بەرەتىن بىردەن-بىر جول ۆاكسينا ەكەنىن ايتقان اكتەرلەر تەاتردىڭ 96-ماۋسىمىنىڭ شىمىلدىعىن اشۋعا دايىن ەكەندەرىن جەتكىزدى. سونداي-اق، بىلتىر ۇجىمداعى كەي اكتەرلەردىڭ وسى ءبىر قاتەرلى ىندەتكە شالدىققانىن ايتىپ، سول كۇندەردىڭ قايتالانباۋىن تىلەيدى. سونىمەن قاتار، تەاتر ۇجىمى ءتۇرلى قاۋەسەت اڭگىمەلەرگە قۇلاق تۇرمەي، ەكپە ەكتىرۋ كەرەگىن ايتىپ وتىر.
«بۇل ىندەت ساحنا ونەرىنە دە زيانىن تيگىزدى. ءبىز ەكى جىلعا جۋىق بىردە جابىلىپ، بىردە اشىلىپ، بەلگىلى ءبىر شەكتەۋلەرمەن جۇمىس ىستەپ، بىلايشا ايتقاندا، كورەرمەندەرىمىزبەن ارا قاتىناسىمىز قىل ۇستىندە تۇرعانداي جاعدايدى باستان كەشىردىك. كارانتيندىك رەجيم جەڭىلدەگەن سوڭ، تەاتر ۇجىمىنىڭ بارلىق اكتەرى ەكپە سالعىزدى. ۇجىمنىڭ 90%-ى ەكپەنىڭ ەكى كومپونەنتىن دە الدى. قازىرگى تاڭدا دەنساۋلىعىمىز ءبىرقالىپتى، اۋرۋ-سىرقاۋدان امانبىز، – دەيدى م.اۋەزوۆ اتىنداعى قازاق ۇلتتىق دراما تەاترىنىڭ ديرەكتورى ەركىن جۋاسبەك.
جاقىن ارادا كورەرمەنگە ەسىگىن ايقارا اشاتىن ونەر يەلەرى تىڭ تۋىندىلارىمەن دايىن وتىر. «وسى جازدا ۇجىمداسقان تۇردە ەڭبەك دەمالىسىنا شىقتىق. كۇز مەزگىلىنەن باستاپ ءوز جۇمىسىمىزعا كىرىسكەلى جاتىرمىز. كارانتين تالاپتارى جەڭىلدەي باستاعاندىقتان، باسقا قالالارعا گاسترولدىك ساپارعا، جاڭا سپەكتاكلدەرگە تولىققاندى دايىندىق جۇرگىزىپ جاتىرمىز. ءبىزدىڭ ءومىرىمىز كورەرمەندەرىمىزبەن ءماندى. وزدەرىڭىزبەن قايتا قاۋىشاتىنىمىزعا قۋانىشتىمىز. ءبىر-بىرىمىزدىڭ، اينالامىزدىڭ اماندىعى ءۇشىن بارشا وتانداسىمدى ەكپە الۋعا شاقىرامىن»، – دەيدى ەركىن جۋاسبەك.