ءماجىلىس سپيكەرى ۆەناداعى پارلامەنتتەر سپيكەرلەرىنىڭ بەسىنشى دۇنيەجۇزىلىك كونفەرەنسياسىنا قاتىسادى

كەلەلى كەڭەس

قازاقستاننىڭ ءماجىلىس ءتوراعاسى نۇرلان نىعماتۋلين باستاعان پارلامەنتتىك دەلەگاسيا 6-8 قىركۇيەك ارالىعىندا ۆەنا قالاسىندا وتەتىن بەسىنشى دۇنيەجۇزىلىك پارلامەنتتەر سپيكەرلەرىنىڭ كونفەرەنسياسىنا قاتىسادى، دەپ حابارلايدى Almaty-akshamy.kz. قازاقپارات سايتىنا سىلتەمە جاساپ.

پارلامەنتارالىق وداق، اۆستريا پارلامەنتى بۇۇ-مەن ءوزارا ءىس-قيمىل كەزىندە ۇيىمداستىرعان فورۋمدا پارلامەنتشىلەر پاندەميادان كەيىنگى دامۋ، ونىڭ ىشىندە كليماتتىڭ وزگەرۋىمەن كۇرەسۋ جانە ەكولوگيالىق تۇراقتىلىقتى قامتاماسىز ەتۋ ءۇشىن ەكونوميكانى رەفورمالاۋ تۋرالى پىكىر الماسادى.

پارلامەنت وكىلدەرى كوپ جاقتى قاتىناستاردى نىعايتۋ، بەيبىتشىلىك پەن تۇراقتى دامۋدى قامتاماسىز ەتۋ ءۇشىن ديالوگ، ءوزارا تۇسىنىستىك جانە ىنتىماقتاستىق قاعيداتتارى نەگىزىندە نەگىزگى پارلامەنتتىك ءىس-قيمىلداردى انىقتايدى. وسى تاقىرىپتا وتكىزىلەتىن ينتەراكتيۆتى جالپى پىكىرتالاستاردا ءماجىلىس سپيكەرى نۇرلان ءنىعماتۋليننىڭ ءسوز سويلەۋى جوسپارلانعان. سونىمەن قاتار، نۇرلان ءنىعماتۋليننىڭ ەۋروپا جانە ازيا پارلامەنتتەرىنىڭ، حالىقارالىق پارلامەنتتىك ۇيىمداردىڭ باسشىلارىمەن، سونداي-اق ۇلتتىق دەلەگاسيالاردىڭ وكىلدەرىمەن ەكى جاقتى كەزدەسۋلەرى قاراستىرىلعان.

پارلامەنت سپيكەرلەرىنىڭ ءاربىر بەس جىل سايىن وتكىزىلەتىن دۇنيەجۇزىلىك كونفەرەنسياسى قاۋىپسىزدىك، ەكونوميكالىق جانە الەۋمەتتىك دامۋ، حالىقارالىق قۇقىق جانە ادام قۇقىقتارى، دەموكراتيا جانە گەندەرلىك تەڭدىك ماسەلەلەرىن تالقىلاۋعا ارنالادى.