اكىمدىكتەر باقىلاماعاندىقتان، الەۋمەتتىك كومىر ماقساتسىز ساتىلعان. بۇل تۋرالى يندۋستريا جانە ينفراقۇرىلىمدىق دامۋ ءمينيسترى مارات قارابايەۆ ۇكىمەت وتىرىسىندا ايتتى، دەپ حابارلايدى اlmaty-akshamy.kz Azattyq Ruhy-نا سىلتەمە جاساپ.
«الداعى 2023 - 2024 جىلدارداعى جىلۋ ماۋسىمىنا دايىندىق ماقساتىندا مينيسترلىك بيۋدجەتتىك ۇيىمدار مەن حالىقتى كومىرمەن قامتاماسىز ەتۋ بويىنشا ناقتى مەرزىمدەرى كورسەتىلگەن ءىس-شارالار جوسپارىن ازىرلەپ، جەرگىلىكتى اتقارۋشى ورگاندارعا جولدادى. الداعى جىلىتۋ كەزەڭىندە كوممۋنالدىق-تۇرمىستىق كومىردىڭ جەتىسپەۋشىلىگىن بولدىرماۋ ماقساتىندا مينيسترلىك كومىر ءوندىرۋشى كاسىپورىنداردى قوسپاعاندا، كومىردى اۆتوكولىكپەن (6 اي مەرزىمگە) جانە تەمىرجول كولىگىمەن اكەتۋدى شەكتەۋگە باعىتتالعان الدىن الۋ شارالارىن قابىلداپ جاتىر»، - دەدى مينيستر.
وتكەن كەزەڭدەگى تاجىريبە كورسەتكەندەي، جىلۋ ماۋسىمى قىزعان شاعىندا الەۋمەتتىك كومىردىڭ ساتۋ نۇكتەلەرىنەن شەتكە كەتۋ فاكتىلەرى بولدى.
«ماسەلەن، ەلىمىزدىڭ 5 وڭىرىندە (سولتۇستىك قازاقستان، جامبىل، تۇركىستان، قىزىلوردا جانە الماتى وبلىستارى) 400 مىڭ تونناعا جۋىق كومىر شەتكە كەتتى. اكىمدىكتەر تاراپىنان باقىلاۋدىڭ بولماۋىنا بايلانىستى، ءبىرقاتار وڭىرلىك وپەراتورلار الەۋمەتتىك كومىردى ماقساتسىز، ياعني بيزنەس سۋبەكتىلەرىنە ساتا باستادى (سەمەنت، كىرپىش زاۋىتتارى جانە جىلىجاي شارۋاشىلىقتارى)»، - دەدى ول.
توتەنشە جاعدايلار مينيسترلىگىنىڭ رەسپۋبليكالىق داعدارىس ورتالىعىنىڭ دەرەكتەرىنە سايكەس، 2022-2023 جىلدارداعى جىلۋ ماۋسىمى كەزىندە تىرشىلىكتى قامتاماسىز ەتۋ جۇيەسىندە 185 تەحنولوگيالىق اقاۋ بولعان.
«بۇل نەگىزىنەن ينجەنەرلىك-كوممۋنيكاسيالىق جەلىلەردىڭ توزۋىنا بايلانىستى بولدى. جەرگىلىكتى اتقارۋشى ورگانداردىڭ جەدەل دەرەكتەرىنە سايكەس، 2022 جىلدىڭ قورىتىندىسى بويىنشا جىلۋمەن جابدىقتاۋ جەلىلەرىنىڭ جالپى ۇزىندىعى شامامەن 14 مىڭ شاقىرىمدى قۇرايدى. 3 جەلىلەردىڭ ورتاشا توزۋى - 54% (7،5 مىڭ كم اۋىستىرۋدى قاجەت ەتەدى). بۇل رەتتە، ەڭ جوعارى توزۋ پاۆلودار (82%)، اباي (68%)، قاراعاندى (68%)، شىعىس قازاقستان (66%) جانە سولتۇستىك قازاقستان (65%) وبلىستارىندا ساقتالىپ وتىر»، - دەدى مينيستر.