قازاقستان العاش رەت اقش نارىعىنا ەكسپورتتىق ۇن جەتكىزۋدى باستادى.
العاشقى 50 توننا Eurasian Legacy برەندىمەن شىعارىلعان ءونىم Amazon، Walmart ونلاين-دۇكەندەرىندە جانە نيۋ-يورك ناۋبايحانالارىندا ساتىلىمعا شىقتى.
بۇل – اقش-تا ۇلتتىق تاۋارىمىزدى ساتۋدىڭ جاڭا ستراتەگياسى اياسىندا جۇزەگە اسقان العاشقى ءىرى ەكسپورتتىق جوبا. الداعى ۋاقىتتا QazTrade قولداۋىمەن اي سايىنعى جەتكىزىلىم كولەمىن 100 توننادان اسىرۋ كوزدەلىپ وتىر. QazTrade – ق ر ساۋدا جانە ينتەگراسيا مينيسترلىگى جانىنداعى ەكسپورتتى دامىتۋعا جاۋاپتى ءبىرىڭعاي وپەراتور.
Amazon-داعى قازاق ۇنىنىڭ باعاسى – 1،36 كەلى قاپتاماسى ءۇشىن $14،50. قاپتامادا «Product of Kazakhstan» دەگەن بەلگى بار. بۇل بەلگى «قازاقستاندا جاسالعان» برەندىنىڭ تانىمالدىعىن ارتتىرىپ، ەكولوگيالىق تازا ءارى ساپالى ءونىم جەتكىزۋشى ەل رەتىندە ءيميدجىمىزدى قالىپتاستىرادى.
ونلاين ساۋدادان بولەك، ءقازىر قازاقستاندىق ۇندى مەيرامحانالارعا، كوفەحانالارعا جانە جەرگىلىكتى اسحانالارعا جەتكىزۋ جونىندە كەلىسسوزدەر جۇرگىزىلۋدە. سونىمەن بىرگە، اقش-تىڭ ءىرى ساۋدا جەلىلەرى – Costco، Whole Foods جانە Trader Joe’s دۇكەندەرىنە شىعۋ مۇمكىندىگى دە قاراستىرىلىپ جاتىر.
«ءبىز ۇنمەن عانا توقتاپ قالمايمىز. قاراقۇمىق، گرانولا، تالقان، شوكولاد پەن كاكاونى دا تانىستىردىق. نيۋ-يورك، چيكاگو جانە ۆاشينگتونداعى سەرىكتەستەرىمىز بۇل ونىمدەردىڭ ساپاسىن كوردى. امەريكانىڭ نارىعىنا شىعۋ شىلدە ايىندا ۆاشينگتوندا QazTrade كەڭسەسى اشىلعاننان كەيىن مۇمكىن بولدى. ناتيجەسىندە ديستريبيۋتورلار مەن ريتەيلەرمەن تىكەلەي جۇمىس ىستەۋگە جول اشىلدى. ەندى وسى قالالاردا قازاقستاندىق وندىرۋشىلەردىڭ بيزنەس-ميسسياسىن وتكىزگەن دۇرىس بولادى دەپ وتىرمىز. بۇل سەرىكتەستەرمەن بايلانىستى نىعايتىپ قانا قويماي، تابيعي ونىمدەردى جوعارى باعالايتىن HoReCa سەگمەنتىنە شىعۋعا مۇمكىندىك بەرەدى»، – دەدى QazTrade باس ديرەكتورى ايتمۇحاممەد الداجاروۆ.