2024 جىلدىڭ 4-7 جەلتوقسان ارالىعىندا مۇحتار اۋەزوۆ اتىنداعى قازاق ۇلتتىق دراما تەاترى الاتاۋدىڭ كۇنگەيى مەن تەرىسكەيىن قونىس ەتكەن باۋىرلاس قىرعىز ەلىنە گاسترولدىك ىس-ساپارمەن اتتانباق، دەپ حابارلايدى aqshamnews.kz
1926 جىلى ىرگەتاسى قالانعان قازاق ونەرىنىڭ قاراشاڭىراعى، قازاقتىڭ تۇڭعىش كاسىبي تەاترى مۇحتار اۋەزوۆ اتىنداعى قازاق ۇلتتىق دراما تەاترى – قازاقستاننىڭ جەتەكشى ونەر ورداسى. ول ءوز تاريحىندا ۇلكەن بەلەستەردەن ءوتىپ، بۇگىنگى كۇنى ۇلتتىق ونەردىڭ سيمۆولىنا اينالدى. شىعارماشىلىق الەۋەتى جوعارى تەاتر ۇجىمى – بيىك كوركەم ونەر، جاڭا تۇرپاتتى مادەنيەت جاساۋ؛ وتانسۇيگىشتىك، ىزگىلىك، ادامگەرشىلىك، سۇلۋلىقتى دارىپتەۋ؛ الەمدىك مادەني-رۋحاني كەڭىستىككە ەركىن ەنىپ، ۇلتتىق ونەرىمىزدى تانىتۋ جولىندا قالتقىسىز قىزمەت ەتۋدە.
2026 جىلى قازاق ونەرىنىڭ قاراشاڭىراعى مۇحتار اۋەزوۆ اتىنداعى قازاق ۇلتتىق دراما تەاترى 100 جىلدىق مەرەيتويىن اتاپ وتەدى. عاسىرلىق توي قارساڭىنداعى سالتاناتتى گاسترولدىك ساپارىن جەر ءجانناتى جەتىسۋ وبلىسىنان باستاعان ونەر ۇجىمى وزبەكستان، قاراقالپاقستان ەلدەرىن ارالاپ، جەلتوقساننىڭ 4-7 ارالىعىندا باۋىرلاس قىرعىز ەلىنىڭ باس شاھارى بىشكەك قالاسىنا ات باسىن تىرەپ، ت. ابدۋمومىنوۆ اتىنداعى قىرعىز ۇلتتىق اكادەميالىق دراما تەاترىنىڭ ساحناسىندا ونەر كورسەتەدى. گاسترولدىك باعدارلاما بويىنشا شوقتىعى بيىك، قازاق جانە الەمدىك دراماتۋرگيا جاۋھارلارى «قىز جىبەك»، «قوشتاسقىم كەلمەيدى»، «قورقىتتىڭ كورى»، «ماڭگىلىك بالا بەينە» سىندى سپەكتاكلدەر كورەرمەن نازارىنا ۇسىنىلادى. بۇل قويىلىمداردا وزىندىك قولتاڭباسىمەن كورەرمەندى ءتانتى ەتىپ جۇرگەن ءبىرقاتار ونەر يەلەرى قازاقستاننىڭ حالىق ءارتىسى دۋلىعا اقمولدا، قازاقستاننىڭ ەڭبەك سىڭىرگەن قايراتكەرى بولات ءابدىلمانوۆ، قازاقستاننىڭ ەڭبەك سىڭىرگەن قايراتكەرى شىنار جانىسبەكوۆا، قازاقستاننىڭ ەڭبەك سىڭىرگەن قايراتكەرى شىنار اسقاروۆا، قازاقستاننىڭ ەڭبەك سىڭىرگەن قايراتكەرى جالعاس تولعانباي، مادەنيەت سالاسىنىڭ ۇزدىگى كۇنسۇلۋ شاياحمەتوۆا، قازاقستان جاستار وداعى «سەرپەر» جاستار سىيلىعىنىڭ يەگەرى سالتانات باقايەۆا، قازاقستان جاستار وداعى «سەرپەر» جاستار سىيلىعىنىڭ يەگەرى زارينا كارمەن، اسان ءماجيت سىندى تەاتر ارتيستەرى ونەر كورسەتەدى.
گاسترولدىك ساپار ق ر مادەنيەت جانە اقپارات مينيسترلىگىنىڭ قولداۋىمەن وتەدى.
4 جەلتوقسان 18.30-دا ع. مۇسىرەپوۆ «قىز جىبەك» سپەكتاكلى /مۋزىكالىق دراما/ 2 ساعات
5 جەلتوقسان 18.30-دا ا. ۆولودين «قوشتاسقىم كەلمەيدى» /دراما/ 1 ساعات 40 مين
6 جەلتوقسان 18.30-دا ي. عايىپ «قورقىتتىڭ كورى» /دراما/ 2 ساعات
7 جەلتوقسان 18.30-دا ر. مۇقانوۆا «ماڭگىلىك بالا بەينە» /تراگەديا/ 2 ساعات