قازاقستاندا كاسپيي تەڭىزىندە يتبالىقتاردىڭ ولەكسەلەرىنىڭ تابىلۋى بويىنشا العاشقى سىنامالاردىڭ ناتيجەلەرى بەلگىلى بولدى، دەپ حابارلايدى aqshamnews.kz.
ەكولوگيا جانە تابيعي رەسۋرستار ءمينيسترى ەرلان نىسانبايەۆتىڭ ايتۋىنشا، 24 قازاننان باستاپ ولگەن يتبالىقتار تىركەلە باستاعاننان كەيىن، بارلىق جاۋاپتى قىزمەتتەر وقيعا ورنىنا بارعان، سونىڭ ىشىندە ۆەتەرينارلار، ەكولوگتار، گيدروبيولوگتار مەن قوعامدىق ۇيىمداردىڭ وكىلدەرى دە قاتىستى. بارلىق قاجەتتى سىنامالار الىنعان.
العاشقى زەرتتەۋلەر پاستەرەللەز، تىرىسقاق جانە وبا اۋرۋلارىنىڭ بار-جوعىن تەكسەردى، الايدا بۇل ىندەتتەر تابىلماعان. ءمينيستردىڭ ايتۋىنشا، ءقازىر ماماندار سۋ تۇبىندە تابيعي گازدىڭ شىعۋىنان نەمەسە سۋدىڭ لاستانۋىنان يتبالىقتاردىڭ قىرىلۋى مۇمكىن ەكەندىگىن بولجايدى. الايدا، سۋ قۇرامىندا نورمادان اۋىتقۋ بايقالماعان.
عالىمداردىڭ زەرتتەۋلەرىن اياقتاۋعا 3-4 اي ۋاقىت قاجەت. وسى كەزەڭدە قورىتىندى ناتيجەلەر جاريالاناتىن بولادى. سونىمەن قاتار، ەكولوگيا دەپارتامەنتىنىڭ زەرتحانالارى اۋانىڭ، سۋدىڭ جانە توپىراقتىڭ قۇرامىن زەرتتەپ، حالىقارالىق ۇيىمداردان كومەك الماعان.
ايتا كەتەيىك، Lada.kz پورتالىنىڭ جازۋىنشا، ايماقتاعى ەكولوگيالىق كەڭەستىڭ ءتوراعاسى، «ECOJER» قاۋىمداستىعىنىڭ ماڭعىستاۋ وبلىسىنداعى وكىلى جانە ق ر ەكولوگيا جانە تابيعي رەسۋرستار مينيسترلىگى قوعامدىق كەڭەسىنىڭ مۇشەسى ادىلبەك قوزىباقوۆ يتبالىقتاردىڭ جاپپاي قىرىلۋى بويىنشا كەلتىرىلگەن شىعىن شامامەن 1،5 ميلليارد تەڭگەگە باعالاناتىنىن مالىمدەگەن.
«ق ر اۋىل شارۋاشىلىعى مينيسترلىگىنىڭ 2017 جىلعى بۇيرىعىنا سايكەس، ءبىر يتبالىقتىڭ قۇنى 193 اەك نەمەسە 712 556 تەڭگە دەپ بەلگىلەنگەن. بۇل سومانى شامامەن 2000 يتبالىققا كوبەيتسەك، 1 425 112 000 تەڭگە شىعىن شىعادى»، – دەدى ول.
ادىلبەك قوزىباقوۆ بۇل جاعدايدىڭ سەبەبىن انىقتاۋ، كىنالىلەردى قاتاڭ جاۋاپكەرشىلىككە تارتۋ جانە كەلتىرىلگەن شىعىندى وتەۋ بويىنشا ناقتى شارالار قابىلداۋ قاجەت ەكەنىن اتاپ ءوتتى.
جايىق-كاسپيي باسسەيندىك ينسپەكسياسىنىڭ مامانى اندرەي رۋسكييدىڭ ايتۋىنشا، ينسپەكتورلار جاعالاۋدا كۇندەلىكتى مونيتورينگ جۇرگىزىپ ءجۇپ. ول 23 قاراشادا تەڭىز جاعالاۋىندا ءولى يتبالىقتاردىڭ دەنەلەرى تابىلماعانىن، سوندىقتان وڭ بولجام جاساۋعا ءۇمىت بار ەكەنىن جەتكىزدى. سونىمەن قاتار جەلدىڭ باعىتى وزگەرگەنى دە جاعدايعا اسەر ەتۋى مۇمكىن.
ەسكە سالساق، كاسپيي جاعالاۋىنان ءبىر كۇندە 120-دان استام ءولى يتبالىق تابىلعان تۋرالى جازعان ەدىك.