الماتىنىڭ اكىمى باقىتجان ساعىنتايەۆ 25 ماۋسىم كۇنى ورتالىق كوممۋنيكاسيالار قىزمەتى الاڭىندا باسپا ءسوز ءماسليحاتىنا قاتىسىپ، ب ا ق وكىلدەرىنىڭ سان ءتۇرلى سۇراقتارىنا جاۋاپ بەرىپ، قالامىزدىڭ دامۋى مەن ەكونوميكا، ەكولوگيا، بيزنەس، ءوقۋ-بىلىم، مەديسينا سالاسىنداعى وزەكتى ماسەلەلەر مەن اتقارىلعان ىستەرگە توقتالدى، بولاشاق جوسپارلارمەن ءبولىستى.
مەگاپوليس باسشىسىنىڭ اتقارىلعان ىستەر جونىندەگى ءسوزىن تىڭداعان قالا تۇرعىندارى بۇگىن ءوز ويلارىن ورتاعا سالدى، دەپ حابارلايدى Almaty-akshamy.kz.
«قالا باسشىسى باقىتجان ساعىنتايەۆ ەلوردادا جۋرناليستەرىمەن كەزدەسۋىندە الماتىنىڭ ەكولوگيالىق جاعدايىن كوتەرۋگە قاتىستى ويلارىمەن ءبولىستى. بۇل رەتتە ەكولوگيالىق جاعدايدى 2025 جىلعا دەيىن جاقسارتۋ جونىندەگى ءىس-شارالاردىڭ كەشەندى جوسپارى ازىرلەنگەنىن جەتكىزدى. بۇل – قۋانتارلىق جاعداي. مەگاپوليس ءۇشىن ەڭ ءبىرىنشى ءارى اسا ماڭىزدى قادامداردىڭ ءبىرى – جىلۋ قۋات ورتالىعىن گازعا كوشىرۋ. ونىڭ قۇرىلىس-مونتاج جۇمىستارى 2022 جىلى باستالىپ، 2025 جىلى اياقتالادى دەپ كۇتىلۋدە. جىلۋ ورتالىقتارى گازعا اۋىستىرۋ – كەزەك كۇتتىرمەيتىن ماسەلە»، -دەيدى ەكولوگيا جانە ورنىقتى دامۋ ينستيتۋتىنىڭ ديرەكتورى.
«سونداي-اق، كولىكتەن شىعاتىن زياندى گاز، بەنزاپيرەن اۋانى ايتارلىقتاي لاستاپ، ادام دەنساۋلىعىنا وراسان زور قاتەر توندىرەدى. سوندىقتان بۇل ماسەلەنى ماسكەۋدەگى سەكىلدى شەشكەنىمىز دۇرىس. ماسەلەن، وندا سىرتتان كەلەتىن كولىكتەر قالاعا كىرگىزىلمەيدى. وزگە وبلىستان كەلگەن حالىق تەمىر تۇلپارلارىن قالا شەتىندەگى اۆتوتۇراققا قويىپ، وزدەرى مەترومەن، اۆتوبۋستارمەن جۇرەدى. ءقازىر بىزدە دە مەترو سالىنىپ، سوزىلىپ جاتىر. نەگە وسى تاجىريبەنى قولعا الماسقا؟ قالانىڭ شەتىنە كولىگىڭدى قويىپ، باراتىن جەرىڭە ەكولوگيالىق تازا اۆتوبۋستارمەن، مەترومەن تەز جەتۋىڭە بولادى. حالىق ءارى جانارماي ۇنەمدەپ، قالانىڭ لاستانۋىنا جول بەرمەيدى. بولاشاقتا بۇل ماسەلە دە شەشىمىن تاباتىنىنا سەنەمىن»، -دەدى قۇرالاي كارىبايەۆا.