ءقازىر ەلىمىزدە قاريالارعا قۇرمەت كورسەتۋ ايلىعى كەڭىنەن ءوتىپ جاتىر. وسىناۋ پاراساتى مول مەرەكە اياسىندا جەتىسۋ اۋدانىنداعى «كەمەل» ىقشاماۋدانىنىڭ «مادەنيەت ۇيىندە» قاريالاردىڭ قاتىسۋىمەن ۇلكەن مەرەكە ءوتتى. ونى اۋدانداعى «بەلسەندى ۇزاق ءومىر ءسۇرۋ ورتالىعىنىڭ» ۇيىمداستىردى. «ال، كانەكەي، اجەلەر» دەپ اتالاتىن سايىستى اۋدان تۇرعىندارى مەن جاستار دا قىزىعا تاماشالادى.
سونىمەن اتالمىش سايىسقا «بەلسەندى ۇزاق ءومىر ءسۇرۋ ورتالىعىنىڭ» تۇراقتى قاتىسۋشىلارى، ياعگي ونىڭ قىزمەتىن الۋشى قاريالار قاتىستى. اجەلەر «بەۋ-ايداي!»، «الىە سەردسا»، «زوركي»، «زولوتىە رۋچكي»، «سكانديناۆوچكي» دەپ اتالاتىن بەس توپ بولىپ، ونەرلەرىن ورتاعا سالدى.
بايقاۋدىڭ ءبىرىنشى كەزەڭىندە اجەلەر وزدەرىن جاي عانا تانىستىرماي، بىرنەشە ءتىل مەڭگەرگەنىمەن دە جۇرتتى تاڭ قىلدى. ەكىنشى كەزەڭدە اجەلەر ءان سالىپ، مونولوگ وقىدى، ارالارىنان مىڭ بۇرالعان بيشىلەر شىعىپ، ءتىپتى قىزدىرىپ جىبەردى. بايقاۋدىڭ ءۇشىنشى كەزەڭىندە اجەلەر بىلەك سىبانا كىرىسىپ، تاماقتىڭ سان ءتۇرىن جاسادى. ەڭ سوڭعى شەشۋشى سايىستا، اجەلەر ۇلتتىق ناقىشتاعى كيىممەن شىعىپ، تاڭداي قاقتىردى. جالپى، بۇل جولعى سايىسقا قاتىسۋشىلاردىڭ وسالى بولمادى. سودان دا بولار كىل مىقتىلاردى انىقتاۋ قازىلار القاسىنا دا وڭايعا سوقپادى.
سونىمەن، «ال، كانەكەي، اجەلەر!» سايىسىنىڭ باس جۇلدەسىن
«بەۋ-ايداي» اجەلەر توبى يەلەنسە، ءبىرىنشى ورىندى - «زولوتىە رۋچكي»،
ەكىنشى ورىندى - «الىە سەردسا»، ءۇشىنشى ورىندى - «زوركي» اجەلەر توبى لايىق دەپ تانىلدى. سونىمەن قاتار، «ۇيىمشىل جانە بەلسەندى» نوميناسياسى «سكانديناۆوچكي» اجەلەر توبىنا بۇيىردى. اۋدان قاريالارى وسىناۋ قارتتار ايلىعى بارىسىندا قولداۋ كورسەتكەنى ءۇشىن «كەمەل» ىقشاماۋدانىنىڭ «بەلسەندى ۇزاق ءومىر ءسۇرۋ ورتالىعىنىڭ» ديرەكتورى گۇلجازيرا كانىبەكوۆاعا، «تالانت-ك» مەديسينالىق كوللەدج ديرەكتورى تالانت باقىتبەكۇلىنا، «ءسابي تىلەگى» قايىرىمدىلىق قورىنىڭ ءتورايىمى نازىم سماعۇلوۆاعا، «رۋحتى حالىق» قايىرىمدىلىق قورىنىڭ ءتورايىمى ءلاززات تۇتقابەكوۆا زور ريزاشىلىقتارىن ءبىلدىردى.